انټرسپټ:
امریکايي انټرسپټ خپرونې د طالبانو تر واکمنۍ لاندې پخوانیو افغان څارنوالانو او وکیلانو ته د ورپېښ ګواښ په اړه یوه مقاله خپره کړې ده.
په دې مقاله کې ادعا شوې چې د طالبانو له بیا واکمنېدو راهیسې لږ تر لږه ۲۹ افغان څارنوالان وژل شوي دي.
انټرسپټ وايي، طالبانو کلونه کلونه څارنوالان تعقیبول او د هغوی د نیولو هڅې یې کولې.
انټرسپټ خپرونې داسې وخت د طالبانو له خوا پخوانیو افغان څارنوالانو او یا هم مدافع وکیلانو ته د ورپېښ جدي ګواښ یادونه کړې چې د طالبانو رهبر هبتالله اخندزاده د بخښنې عمومي فرمان هم ورکړی دی.
اوس د راپورونو له مخې امریکايي وکیلان سره متحد شوي او غواړي له خطر سره مخ افغان وکیلان او څارنوالان له افغانستانه وباسي.
انټرسپټ لیکلي د امریکا او بهرنیو ځواکونو په راوتلو سره دا له خطر سره مخ او زیانګالي افغانان یواځې پرېښودل شول.
په دې مقاله کې د افغانستان د جمهوري نظام پر مهال د پخواني لوی څارنوال فرید حمیدي خبرې راخیستل شوي چې طالبان په هغو څارنوالانو پسې ګرځي چې د دوی دوسیې یې مخته وړې دې.
د حمیدي په حواله لیکل شوي چې افغان څارنوالانو کلونه کلونه د عدالت د تامین لپاره له نړیوالو سره اوږه په اوږه کار وکړ.
پخوانی لوی څارنوال له ځینو امریکايي بنسټونو او د امریکا د مدافع وکیلانو له ټولنې سره په ګډه د شاوخوا ۱۵۰۰ افغان پخوانیو څارانوالانو او د هغوی د کورنیو د غړو د را ایستلو په لټه کې دي.
نېشنل ورځپاڼه:
د متحده عربي اماراتو نېشنل ورځپاڼې هم په یوه مقاله کې افغان ښځینه قاضیانو ته د طالبانو د متوجه ګواښ په اړه تمرکز کړی دی.
نېشنل ادعا کړې چې ۳۸۰۰ افغان څارانوالان او قاضیان خوندي ځای ته د لېږد جدي اړتیا لري.
په مقاله کې د یوې افغان څارنوالې نورا هاشمي په اړه لیکل شوي چې نږدې یوه لسیزه یې کار وکړ.
هغې په خپل کار کې تر ډېره پورې له ښځو او ماشومانو سره د تاوتریخوالي قضیې څېړلې.
خو نن د نشنل په خبره نورا هاشمي مجبوره شوې چې خپل اصلي نوم بدل کړي او په پټه اوسېږي.
ورځپاڼې لیکلي چې د ۲۰۲۱ کال له اګست راهیسې چې طالبان واک ته ورسېدل د نورا هاشمي په ګډون ګڼو نورو ښځینه قاضیانو او څارنوالانو ته د طالبانو له خوا پرلهپسې ګواښونه شوي دي.
طالبانو له بیا واکمنېدو راهیسې دې او ګڼو نورو ښځینه قاضیانو ته په وار وار ګواښونه شوي دي.
