جمهوري غوښتونکی کېوېن مک کارټي د امریکا د استازیو جرګې مشر وټاکل شو.
د امریکا د استازیو جرګې اکثریت او مشري د جمهوري غوښتونکو لاس ته ولوېده.
د امریکا ولسمشر جوبایډن د ادارې یو کلک منتقد کېوېن مک کارټي شنبه سهار وختي په پنځلسم دور رایګیري کې د استازیو جرګې د مشر په توګه وټاکل شو.
هغه په خپله لومړۍ وینا کې ټينګار وکړ چې له ټولو مسوولو کسانو سره به حساب کتاب کوي.
هغه وویل: "موږ به له ټولو مسوولو اړخونو سره حساب کتاب کوو. له افغانستانه د راوتلو له قضیې را نیولې د کوېډ تر مرکز او د اف بي ای تر وسله وال کولو پورې."
اکثر جمهوري غوښتونکي له افغانستانه د امریکا په راوتلو او د طالبانو لاس ته د دغه هېواد د لوېدو په خاطر د ولسمشر بایډن اداره ګرمه بولي.
کېوېن مک کارټي د ۲۰۲۱ کال په اګست کې د افغانستان تر سقوط وروسته د ولسمشر بایډن کړنلاره تر سختو نیوکو لاندې نېولې وه.
دا په داسې حال کې ده چې د دوحې هوکړهلیک د ۲۰۲۰ کال د فبروري میاشتې په ۲۹مه د امریکا د جمهوري غوښتونکي ولسمشر ډونالد ټرمپ د ادارې او د طالبانو ترمنځ لاسلیک شو چې د ۲۰۲۱ کال په وړي کې یې له افغانستانه د ټولو امریکايي سرتېرو وتلو ته لاره پرانیسته.
هغه ویلي و چې امریکا څنګه د دوو لسیزو له حضور وروسته افغانستان په یو نامعلوم حالت کې پرېښود او تر راووته.
د افغانستان په مسئله سربېره په امریکا کې د کوېډ۱۹ د مخنیوي په کړنلارو باندې هم جمهوري غوښتونکو نیوکې کولې.
خو ولسمشر جوبایډن د کېوېن مک کارټي د ټاکل کېدو په اړه هغه ته مبارکي ورکړې ده.
سپینې ماڼۍ په یوه بیان کې د ولسمشر بایډن په حواله لیکلي: "مهمه ده اقتصادي وده همداسې جاري وساتو او مخه یې ډب نه کړو."
ولسمشر بایډن دا هم ویلي: 'باید په ملي امنیت باندې پانګونه وکړو نه دا چې بودیجه یې کمه کړو."
هغه ویلي له جمهوري غوښتونکو سره د کار لپاره چمتو دی، خو جمهوري غوښتونکي هم باید له ده سره کار وکړي.
د کېوېن مک کارټي تر ټاکل کېدو دمخه د ډیموکراټ ګوند غړې ننسي پلوسي د استازیو جرګې مشره وه، خو داسې ښکاري چې د مک کارټي په ټاکل کېدو سره به د ډیموکراټانو په مشرۍ حکومت له ځینو ننګونو سره مخ وي.
په امریکا کې د استازیو جرګه ځینې ځانګړي واکونه لري چې د چارواکو استیضاح یې تر ټولو مهمه برخه جوړوي.
