د افغانستان د سولې لپاره د واشنګټن ځانګړی استازی وایي، په افغانستان کې د تاوتریخوالي اوسنۍ زیاته شوې کچه د نه منلو ده.
زلمي خلیلزاد ویلي دا مهال په دغه تاوتریخوالي کې زیات افغانان مري.
د افغانستان د سولې لپاره د امریکا د متحدو ایالتونو ځانګړی استازی وايي، دی ځکه مایوسه شوی چې د جګړو د کمولو له ژمنو سره سره تاوتریخوالی نه دی کم شوی.
زلمي خلیلزاد برايي په خپل ټویټر کې ولیکل، د سیاسي جوړجاړي لپاره به کړکۍ د تل لپاره پرانیستې نه وي.
ښاغلي خلیلزاد په خپل ټویټ کې غوښتنه کړې، چې روانه وینه توییدنه باید بنده شي.
د ښاغلي خلیلزاد د مطبوعاتي دفتر په اعلامیه کې د هغه له قوله راغلي چې په افغانستان کې د جګړو اوسنۍ سطحه خورا لوړه شوې ده.
په دوام راغلي: "زیات افغانان مري، ښکېل لوري د تاوتریخوالي کمولو داسې یوې بېړنۍ موافقې ته اړتیا لري، چې د دایمي او هر اړخیز اوربند سبب شي."
د امریکا متحدو ایالتونو او طالبانو افغانستان ته د سولې راوستلو موافقه د فبرورۍ پر ۲۹مه په قطر کې لاسلیک کړه.
طالبانو، د امریکا متحد ایالتونه له دې موافقې په سرغړونه تورن کړی او ویلي یې دي چې امریکايي ځواکونو په هلمند او فراه ولایتونو کې د موافقې خلاف د افغان ځواکونو په ملاتړ هدفمند بریدونه کړي دي.
په تازه مورد کې په افغانستان کې امریکايي ځواکونو د دوشنبې په ورځ په همداسې یوه حمله کې د طالبانو د ۵ جګړه مارو د وژل کېدو خبر ورکړ، چې په وینا یې د افغان ځواکونو په ملاتړ دا حمله په میدان وردګ ولایت کې شوې ده.
د امریکايي ځواکونو ویاند سني لګیت هغه ادعا رد کړه، چې ګواکې امریکا دې په دې ډول حملو سره په قطر کې له لاسلیک شوې موافقې سرغړونه کړې وي.
د افغانستان حکومت، ځینو نورو هېوادونو او سازمانونو په وار وار له طالبانو د جګړو د بندولو او اوربند غوښتنه کړې ده.
خو، پرون ازادۍ راډیو ته وویل، دوی خپلې حملې کمې کړي.
دی ادعا کوي چې برعکس، مقابل لوري پر طالبانو خپلې حملې زیاتې کړي، ځکه نو طالبان خپلې دفاع ته مجبوره شوي دي.
په قطر کې د افغانستان د دولت او طالبانو د مذاکره کوونکو هیئتونو د خبرو او کتنو ۴۰ ورځې کېږي، خو دواړه لوري بیا هم د رسمي مذاکرو پر کړنلار نه دي نه سلا شوي.
