د افغانستان او پاکستان د پلاوو د سفرونو په لړ کې دا ځل ټاکل شوې چې د روانې فبرورۍ میاشتې په نهمه نېټه یو پلاوی له کابله اسلاماباد ته ولاړ شي او له ترورېزم سره د مبارزې، سولې او تاوتریخوالي په کموالي، په تدریجي ډول د افغان کډوالو د بېرته راستنېدو او اقتصادي همکاریو په تړاو خبرې وکړي.
د دغه وزارت د ویاند مرستیال صبغت احمد وايي، پاکستان پهدې برخه کې پوره چمتووالی ښودلی او افغان حکومت هیله څرګندوي چې له دې ناستې د پام وړ نتیجه ترلاسه کړي.
ښاغلي احمد وویل، کومه ناسته چې په کابل کې د دواړو هېوادونو د پلاوو ترمنځ شوې وه، پرمختګونه شوي او پاکستاني چارواکو منلې چې طالبان او د حقاني شبکه ترهګرې ډلې دي او له نورو ترورېستي ډلو سره توپیر نهلري.
نوموړی وايي:
"موږ هیلهمند یو، کوم نتایج چې مو د کابل له ناستې ترلاسه کړي دي، د پاکستان ناسته به هم په همدې ډول مخ ته لاړه شي، خو دا ځل وضعیت توپیر کوي، ځکه پاکستان د لومړي ځل لپاره منلې چې طالبان او حقاني شبکه ترورېستي ډلې دي او د نورو ترورېستي ډلو لکه، القاعده او داعش په شان ځای لري."
تر دې وړاندې د ملي امنیت عمومي رئیس معصوم ستانکزی او د کورنیو چارو وزیر ویس احمد برمک هم پاکستان ته تللي وو او د کابل د وروستیو خونړیو حملو په اړهیې اسناد پاکستاني چارواکو ته سپارلي دي.
په وروستیو کې د کابل پر انټرکانټیننټال او صدارت څلور لارې کې خونړي بریدونه وشول.
د کورنیو چارو وزارت: پر کانټیننټال هوټل برید کې د ۱۴ بهرنیانو په ګډون ۱۸ تنه وژل شوي
مجروح: د کابل په نننۍ چاودنه کې ۹۵ تنه وژل شوي او ۱۵۸ ټپیان دي
له هغه وروسته یعنې د روانې اوونۍ په پیل کې د پاکستان د بهرنیو چارو وزارت د مرستیالې تهمینې جنجوعه په مشرۍ يو ملکي او پوځي پلاوی کابل ته راغلی و او د افغانستان د بهرنیو چارو وزارت د مرستیال حکمت خلیل کرزي په مشرۍ یې له افغان پلاوي سره وکتل.
د افغانستان د بهرنیو چارو وزیر د ناستې په پای کې ویلي و چې پهدې ناسته کې مهم پرمختګونه شوي او دواړه لوري په ځينو برخو هوکړې ته رسېدلي دي.
ټاکل شوې ده چې د دواړو لورو ترمنځ په يو لړ نورو مواردو د بحث او خبرو لپاره د فبرورۍ په ۹مه او ۱۰مه له کابله یو پلاوی اسلاماباد ته ولاړ شي.
سره له دې چې افغان او پاکستاني چارواکو له ترورېزم سره د مبارزې او متقابل احترام په تړاو ژمنې کړي، خو له تېرو دوو ورځو راهیسې یو وار بیا پاکستاني پوځیانو د ختیځ ولایت کونړ په یو شمېر سیمو راکټي حملې کړې دي.
په همدې حال کې د افغانستان د مشرانو جرګې دوهم مرستیال محمد اصف صدیقي وایي، د دغو سفرونو نتایجو ته خوشبین نهدي، ځکه په وینا يې پاکستان تل خپلو ژمنو ته رښتینی نهدی پاتې شوی.
دی وايي:
"موږ وليدل چې دا ډول سفرونه هېڅ ډول نتیجه نهلري، یوازې د وخت ضایع کول دي. کله چې موږ د سولې په پروسې تمرکز کړی، پاکستان په غچ اخیستلو پیل کړی او جګړې تهيې زور ورکړی."
د ښاغلي صدیقي په وینا، تر هغې چې د نړیوالې ټولنې په ځانګړي ډول ملګرو ملتونو سازمان فشارونه پر پاکستان ډېر نهشي دغه هېواد به کله هم د افغانستان په اړه خپل سیاست بدل نهکړي.
راپور: ناجیه ساپۍ
