د افغانستان دفاع وزارت وایي، پاکستان له دې کبله چې له سیاسي انزوا سره مخامخ دی، نو د افغانستان په ختیځو سیمو کې خپلو راکټي بریدونو ته دوام ورکوي.
د دغه وزارت ویاند جنرال دولت وزیري ازادي راډیو ته وویل، د ملي اردو ځواکونو ته سپارښتنه شوې چې د پولې له هاغاړې هر توغندي ته باالمثل ځواب ووایي.
نوموړی وايي:
"پاکستان په بد وضعیت کې دی، نړیوال فشارونه پرې ډېر دي او هره ورځ لا یوازې کېږي. دا د افغانستان د حکومت د هڅو او مثبت سیاست نتیجه ده چې پاکستان د انزوا لوري ته روان دی. موږ خپلو سرحدي ځواکونو ته سپارښتنه کړې چې له هرې سیمې انداخت ورباندې کېږي، دوی هم ورته عمل وکړي."
پاکستان د انزوا لوري ته روان دی.
تر دې وړاندې د کونړ ولایت اوسېدونکو او چارواکو ویلي وو چې پاکستان د شنبې په ماښام ۱۸۵ توغندي پر دانګام او سرکاڼو ولسوالیو ویشتلي دي چې په نتیجه کې یې څلور ملکي وګړي ټپیان شوي دي.
