د افغانستان د ملي امنیت عمومي رئیس وايي، پاکستان دا ومنله چې طالبان یې په خاوره کې شته او له هغه ځایه بریدونه پلانوي.
د افغانستان د ملي امنیت عمومي رئیس او د کورنیو چارو وزیر ظاهراً د پاکستان له سفره خوښ او عملي اقداماتو ته یې په تمه دي.
دوی دواړو لوړ پوړو افغان چارواکو د پنجشنبې په ورځ«۱۳۹۶کال سلواغې۱۲» یوې خبرې غونډې ته وویل چې پاکستاني چارواکو ته یې په دغه هېواد کې د طالبانو او حقاني شبکې د موجودیت په اړه داسې اسناد ورکړي چې په هېڅ وجه انکار ترې نه شي کېدای او باید په وړاندې یې اقدام وکړي.
اوس نو توقع د بحث نه بلکې د اقدام ده
د ملي امنیت عمومي رئیس معصوم ستانکزی وايي، پاکستان د دغه سفر پرمهال له دوی سره ومنله چې طالبان یې په خاوره کې شته او تروریستي بریدونه پلانوي.
نوموړي زیاته کړه:
"غواړم په یوې کلمې کې دا مسئله خلاصه کړم چې په تېر کې انکار وه، خو دا ځل اعتراف له ځینو محدودیتونو سره مل وو، اوس نو توقع د بحث نه بلکې د اقدام ده."
د ملي امینت عمومي رئیس د ازادي راډیو د دې پوښتنې په ځواب کې چې که پاکستان بیا هم همکاري نه کوي او طالبان خپلو بریدونو ته دوام ورکوي نو د دوی نور اقدامات به څه وي وویل چې د پوځي عملیاتو ترڅنګ ځینې اقدامات شته، خو په اړه یې زیات جزئیات ورنه کړل.
د ملي امنیت عمومي رئیس او د کورنیو چارو وزیر ویس احمد برمک په کابل او ځینو ولایتونو کې له خونړیو حملو وروسته تېره ورځ اسلام اباد ته تللي وه.
یادې حملې چې تر ټولو خونړۍ هغه یې د تېرې شنبې په ورځ د جمهوریت روغتون ته مخامخ وشوه او ګڼو کسانو ته پکې مرګ ژوبله واوښته طالبانو یې مسؤلیت په غاړه واخیست.
د انټرکانټیننټال پر هوټل حمله چې د بهرنیانو په ګډون پکې ۲۲کسان پکې ووژل شول د افغان حکومت په خبره د حقاني شبکې کار وو.
د کورنیو چارو وزارت: پر کانټیننټال هوټل برید کې د ۱۴ بهرنیانو په ګډون ۱۸ تنه وژل شوي
مجروح: د کابل په نننۍ چاودنه کې ۹۵ تنه وژل شوي او ۱۵۸ ټپیان دي
دفاع وزارت: د ۱۱۱مې فرقې د یو کنډک پر جز و تام حمله کې ۱۱ سرتېري وژل شوي
که څه هم افغان حکومت تل په پاکستان کې د طالبانو، حقاني شبکې او ځینو نورو تروریستي ډلو د امن پټن ځایونو د موجودیت په اړه ويلي، خو دا لومړی ځل دی چې پاکستان پر دې مسئلې اعتراف کوي.
په اسلام اباد کې مرستیال افغان سفیر زردشت شمس د پنجشنبې په ورځ ازادي راډیو ته وویل چې یادو دواړو لوړ پوړو افغان چارواکو په واضح توګه پاکستاني مشرانو ته د افغان حکومت پیغام بیان کړ.
له دې ټولو سره ـ سره د کورنیو چارو وزیر ویس احمد برمک بیا وايي، تمه ده چې د راتلونکې شنبې په ورځ هغه پاکستانی پلاوی چې کابل ته راځي د افغان حکومت د وروستیو غوښتونو په اړه وروستي معلومات له دوی سره شریک کړي.
نوموړي زیاته کړه:
"د پاکستان یو لوړ پوړی پلاوی کابل ته راځي د افغانستان حکومت له لوري یو مشخص سند چې په هغې کې یې غوښتنې مطرح شوي پاکستان ته سپارل شوی کله چې هغوی راغلل د هغه پوښتونو په اړه چې موږ مطرح کړي واضح بحث کېږي او بیا به طبعاً چې د هغې په رڼا کې اقدامات کېږي."
د کورنیو چارو وزیر همدا راز وویل چې اسلام اباد د دواړو هېوادونو ترمنځ د یوه داسې میکانیزم د رامنځته کېدو غوښتنه هم مطرح کړې چې له مخې یې په لوړه کچه د کابل او اسلام اباد ترمنځ استخباراتي معلومات شریک شي.
د پاکستان یو لوړ پوړی پلاوی کابل ته راځي
په ورته وخت کې د ملي امنیت عمومي رئیس معصوم ستانکزی وايي وضعیت په سیمه او نړۍ کې د بدلیدو په حال کې دی او ښايي پاکستان د تروریستانو پر وړاندې د جدي اقداماتو پرته بل انتخاب ونه لري.
راپور: محمد حدیث پردېس
