د کندهار ولایت مرستیال والي وايي، د افغانستان او پاکستان ګډو تخنیکي ټیمونو د چمن-سپینبولدک تر منځ پر ډیورند کرښه د پرتو کلیو جیولوجیکي سروې او د رامنځته شوې نښتې تحقیقات پیل کړي.
د کندهار سپینبولدک کې د ډیورند کرښې ته نېږدې د لقمان او نظر په نومونو هغه کلي چې پنځه ورځې وړاندې پهکې د دواړو هېوادونو د سرحدي ځواکونو تر منځ سخته جګړه وشوه او دواړو لورو ته پهکې مرګ ژوبله واوښته، افغان چارواکي وايي چې د دواړو هېوادونو ګډو ټیمونو د دغو کلیو جیولوجیکي سروې او د رامنځته شوې نښتې تحقیقات پیل کړي.
د کندهار د ولایت مرستیال حاجي اغالالي دستګیري ازادي راډیو ته وویل چې دغه ټیمونه چې د سرحدي پولیسو جنرالانیې مشري کوي د ډیورند کرښې په اوږدو کې پرتو کلیو ته رسېدلي او کار یې پیل کړی دی.
نوموړی وايي:
"زموږ لهخوا جنرال انور خان د تخنیکې ټیم مسؤلیت لري سبا ته به انشاءالله پایلې معلومې شي موږ به مرکز په جریان کې کړو بیا پرېکړه مرکز کوي."
د ولایت مرستیال دغهراز د جګړې د بیا پیل کېدو اندیښنې ته په جواب کې وویل چې د دواړو هېوادونو د استازو تر منځ تر موافقې وروسته د دوشنبې په ورځ د ډیورند کرښې له صفري برخې څخه افغان او پاکستاني ځواکونه پر شا شوي.
په عین وخت کې د چمن-سپینبولدک لار چې د تېرو پنځو ورځو راهیسې تړلې ده افغان سوداګر يې د پرانیستل کېدو غوښتنه کوي.
د کندهار د سوداګرو د اتحادیې غړي رحمالدین حاجياغا ازادي راډیو ته وویل چې د افغان سوداګرو شااوخوا ۲۰۰ موټره د کرښې دواړو غاړو ته بند پاتې دي.
د چمن-سپینبولدک پر لار هره ورځ تر ۲ زرو زیات کسان د سوداګرۍ کاروبار او ناروغانو د درملنې په هدف تګ راتګ کوي.
راپور: محمد صادق رښتینی
