د افغانستان دفاع وزارت وايي، د سپینبولدک او چمن تر منځ د افغانستان او پاکستان وروستۍ لانجه حل شوه.
د افغانستان او پاکستان د حکومتونو یو شمېر پوځي او ملکي استازو پرون شنبه د سپینبولدک او چمن تر منځ د وروستۍ وسلهوالې نښتې پر عواملو د خبرو لپاره دوهمه غونډه وکړه.
د افغانستان د ملي دفاع وزارت مرستیال ویاند محمد رادمنش وویل چې له پاکستاني لوري سره لانجه په خبرو حل شوې ده.
محمد رادمنش زیاته کړه:
"پهدې بحث کې دواړو خواوو قناعت کړی چې د افغانستان سرحدي سیمو کې د وروستیو نښتو علت دا وو چې پاکستاني پوځیانو اشتباه کړې وه. یقیناً، د لقمان او نظر کلي دواړه د افغانستان خاوره کې دي او پاکستاني لوري د افغانستان د پوځ له اجازې پرته په سیمه کې د وګړو شمېرنه کوله."
خو یوه سیمهییز چارواکي چې پرونۍ غونډه کې وو، د نوم نهښودلو په شرط د ازادي راډیو خبریال ته ویلي چې د افغانستان او پاکستان د استازو پرونۍ کتنه بېنتیجې پای ته رسېدلې ده.
له پاکستاني لوري سره په پرونیو خبرو کې د افغانستان د پوځي پلاوي مشري د کندهار امنیه قوماندان جنرال عبدالرازق کوله.
د غونډې له جریانه په یوه وېډیو کې چې له خبریالانو سره شریکه شوې، جنرال عبدالرازق پاکستاني لوري ته وايي:
"موږ تر خپلې خاورې نهشو تېرېدلی. دا کارونه باید تکرار نهشي. موږ غوښتنه کوو چې لهدې کارونو لاس واخیستل شي."
د چمن او سپینبولدک تر منځ، د ډیورند پر کرښه د پاکستان او افغانستان د سرحدي ساتونکو وسلهواله نښته د جمعې په سهار پیل شوه چې له املهیې دواړو خواوو ته ملکي او پوځي تلفات رسېدلي دي.
پهدې نښته کې د افغانستان د سرحدي پولیسو دوه غړي ووژل او ۱۱ تنه زخمیان شول.
د افغانستان لور ته یوه ښځه ووژل او ۱۴ ملکي کسان زخمیان شول.
جنرال عبدالرازق د جمعې په ورځ ازادي راډیو ته وویل چې د نظر او لقمان کلي د افغانستان د خاورې برخه او د سپینبولدک ولسوالۍ مربوط دي.
هغه څرګنده کړه چې پاکستاني ملېشه دې سیمې ته د وګړو د شمېرنې لپاره ورغلي وو.
خو د پاکستان پوځ د جمعې په ورځ په یوه خبرپاڼه کې وویل چې د افغانستان سرحدي پولیسو پر هغو پوځیانو ډزې کړي چې خپله سیمه کې یې د سرشمېرنې ډلې بدرګه کولې.
د ازادي راډیو خبریال د یو شمېر سرچینو په حواله وايي چې لقمان کلي او نظر کلي کې تر ۱۵ زره زیات خلک اوسي، اکثر په قوم اڅکزي دي او ډېر ځوانانیې د افغانستان د سرحدي پولیسو په لیکو کې خدمت کوي.
د افغانستان او پاکستان د سرحدي ځواکونو تر منځ د نښتې له امله سلګونه کورنۍ له دواړو کلیو تښتېدلي او د سپینبولدک بازار او شااوخوا سیمو تهیې پناه وړې ده.
په همدې حال کې، د پاکستان دفاع وزیر خواجه محمد اصف پرون خبریالانو ته ویلي چې کابل او اسلاماباد باید د اوږد مهالې سولې لپاره همکاري زیاته کړي.
د پاکستان اسوشیټېډ پرس په حواله، خواجه اصف ټینګار کړی چې خپلې پولې په دقت څاري د "دښمن تېري ته به اغېزمن، مناسب او بېړنی" ځواب ورکوي.
