د پکتیا ولایت په امنیه قوماندانۍ کې سرچینو ازادي راډیو ته ومنله چې پرون په ډیورنډ کرښه د ځاځي اریوب ولسوالۍ په سپینه شګه سیمه کې د دوی د ځواکونو او پاکستاني عسکرو ترمنځ نښته شوې ده.
سرچینې د خپل غږ او نوم نه خپرولو په شرط ازادي راډیو ته وویل، نښته پرون مازدیګر نږدې ۴ بجې وروسته تر دې پیل شوه چې پاکستاني عسکرو د عمر په نوم د دوی په یوې امنیتي پوښتې ډزې وکړې.
د سرچینې له قوله؛ نښته د شپې تر ۸ نیمو بجې روانه وه او د دوی امنیتي ځواکونو ته په کې کومه مر ګژوبله نهده اوښتې.
د طالبانو حکومت د ملي دفاع وزارت ویاند عنایتالله خوارزمي په دې اړه د ازادي راډیو پوښتنه ځواب نهکړه.
د پاکستان حکومت بیا رسماً په دې اړه غبرګون نهدی ښودلی، خو یو شمېر ایکسپاڼو چې د پاکستاني حکومت د استخباراتي چینلونو تر کنټرول لاندې نشرات لري دا جګړه تایید کړې ده.
دې ایکسپاڼو لیکلي، نښته د ډیورنډ کرښې د خرلاچي او ډنډپټان له ۱۰ تر ۱۲ کیلومټره سیمو کې د دواړو لوریو ترمنځ شوې ده.
د افغانستان په نقشه کې پکتیا ولایت
دوی تور پورې کړی چې لومړی ډزې د طالبانو ځواکونو کړي او پاکستاني عسکر مقابل برید ته مجبور شوي دي.
دغو ایکسپاڼو په نښته کې د ۱۳ طالب ځواکونو د مرګژوبلې ادعا هم کړې، خو د پکتیا په امنیه قوماندانۍ کې یوې معتبرې سرچینې ازادي راډیو سره خبرو کې دا ادعا رد کړه.
په ورته وخت کې د پکتیا په ځاځي اریوب ولسوالۍ کې د سیمې خلکو هم د خپل غږ او نوم نه خپرولو په شرط ازادي راډیو سره خبرو کې پرونۍ جګړه تایید کړه، خو زیاتوي؛ د مرګژوبلې په اړه یې ځکه معلومات نهلري چې د طالبانو عسکر هیچا ته د نښتې سیمې ته د تلو اجازه نهورکوي.
دا نښته وروسته تر دې کېږي چې پاکستاني جېټ الوتکو د پنجشنبې په ورځ د پکتیکا په وړممۍ ولسوالۍ بمبار وکړ.
په افغان خاوره د پاکستاني الوتکو له هوايي حملې وروسته، کندهار ته د پاکستاني پلاوي سفر چې تمه وه د یکشنبې په ورځ وشي، لغوه شو.
پاکستان وروستیو کې په خورا تُنده لهجه تور لګوي چې د افغانستان خاوره د ټيټيپي وسلهوالو لهخوا د بریدونو لپاره کارول کېږي، هغه ادعا چې د طالبانو حکومت یې ردوي.
د تېر میلادي کال په وروستیو کې د پاکستان د بهرنیو چارو وزارت ویاندې زهرا بلوچ دا ادعا هم وکړه چې د طالبانو په حکومت کې یو شمېر قوماندانان د تحریک طالبان پاکستان له غړو ملاتړ کوي او هغوی ته یې د وسلو په ګډون خوندي ځایونه هم ورکړي دي.
خو د طالبانو حکومت یې دا ادعا رد کړه.