په کندهار کې د سرحدي زون قوماندان جنرال محمد انور انبیا او د پاکستان د سرحدي ملېشې د قول اردو قوماندان جنرال ندیم پرون هغو کلیو ته لاړل چې په وروستیو ورځو کې د دوو هېوادونو سرحدي ځواکونو پرې شخړه وکړه.
دې چارواکو پر ډیورند کرښه د لقمان او نظر کلیو پر سر د شخړې د حل کولو لپاره پرون دوشنبه بیا خبرې وکړې.
په دغو دوو کلیو کې د جمعې په ورځ د دواړو هېوادونو د سرحدي ځواکونو تر منځ وروسته له دې خونړۍ نښته وشوه چې پاکستان هڅه وکړه هغو کې سرشمېرنه وکړي او د خپل هېواد خاورهیې وشمېري.
افغانستان وايي چې دا سیمه د کندهار د سپینبولدک ولسوالۍ برخه ده.
د جمعې له نښتې وروسته د افغانستان او پاکستان د سرحدي قوماندانانو تر منځ دوه غونډې وشوې خو اختلاف تهیې د حل لار ونهموندلای شوه.
د کندهار د والي ویاند صمیم خپلواک ازادي راډیو ته وویل چې پرون یو وار بیا د دواړو هېوادونو سرحدي چارواکي لقمان کلي ته لاړل چې سیمه له نېږدې وګوري او خبرې پرې وکړي.
د کندهار د والي ویاند صمیم خپلواک
په همدې حال کې پاکستاني چارواکو لوېدیځو خبري اژانسونو ته ویلي چې دواړه هېوادونه د سیمو په اړه د خپلو ادعاوو د ثابتولو لپاره د ګوګل له نقشو کار اخلي.
د فرانس پرس خبري اژانس د راپور له مخې، د پاکستان یوه امنیتي چارواکي د خپل نوم د نهښودلو په شرط وویل چې د دوو هېوادونو د جیولوژیکي سروې ادارو خپل مأمورین د لانجمنو سیمو د سروې لپاره لېږلي دي او دوی به له ګوګل مپ یا نقشې هم کار واخلي.
په کوټه کې یوه بل پاکستاني چارواکي هم تائید کړه چې دواړه هېوادونه د سیمې پر سروې کولو راضي شوي دي.
خو د کندهار د والي ویاند صمیم خپلواک دا خبره ردوي، وايي چې د ګوګل د نقشې پر اساس د سیمې په اړه د پرېکړې موضوع نهده مطرح شوې.
خپلواک د پاکستاني چارواکو دا ادعا هم رد کړه چې ګنې په لقمان او نظر کلیو کې د پاکستان د سرشمېرنې ادارې سرشمېرنه بېرته پیل کړې ده.
پرون پاکستاني چارواکو وویل چې په دغو کلیو کې یې سرشمېرنه پیل کړې ده.
د جمعې په ورځ د پاکستان له لوري پر ډیورند کرښه پر دغو پرتو کلیو د افغان او پاکستاني سرحدي ځواکونو په نښته کې شااوخوا ۱۰ تنه ووژل شول.