د امریکا ولسمشر جو بایډن وایي، د ایران د اټومي پروګرام په اړوندو سیمو به د اسراییل د برید ملاتړ ونه کړي.
جو بایډن یوه ورځ وروسته تر دې دا خبرې وکړې چې ایران شاوخوا ۱۸۰ توغندي د اسراییل په لور وویشتل.
ولسمشر بایډن مخکې دا برید بې اغېزې بللی و، خو د اسراییل صدراعظم بنیامین نتنیاهو په ټینګار ویلي چې ایران به د دې حملې تاوان پرې کوي.
بایډن پرون مخکې تر دې چې د امریکا د جمهوري ریاست په الوتکه کې سکاټلنډ ته سفر وکړي او هلته د نړۍ د اوو سترو صنعي هېوادونو یا جي اووه په غونډه کې برخه واخلي د خبریالانو د دې سوالونو په ځواب کې چې که اسراییل د ایران پر اټومي تاسیاستو برید وکړي، واشنګټن به یې ملاتړ وکړي؟ وویل: "ځواب یې نه دی. موږ به له اسراییلیانو سره په دې موضوع خبرې وکړو چې دوی به څه کوي. د جي اووه ټول غړي موافق دي چې اسراییل دا حق لري چې ځواب ورکړي، خو دوی باید متناسب ځواب ورکړي."
رویټرز اژانس د یو شمېر کتونکو په وینا څرګندوي چې د اسراییل ځواب به د اپرېل د میاشتې به تناسب چې هغه وخت هم ایران د اسراییل په لور توغندي ویشتلي وو، دا ځل سخت وي او دا امکان هم شته چې دا ځل د ایران اټومي تاسیسات یا د تېلو تصفیه خانې په نښه کړي.
د امریکا ولسمشر وایي، پر ایران به بندیزونه زیات کړي او ټاکل شوې چې د اسراییل له صدراعظم سره هم وګوري.
د بایډن په وینا، ایران له لارې وتلی دی.
د امریکا د بهرنیو چارو د وزارت مرستیال کارت کمپبل وایي منځنی ختیځ د چاړې له څوکي سره مخ دی او د جګړې پراختیا به د اسراییل او متحد ایالتونو ګټې زیانمنې کړي.
کمپبل چې په واشنګتن کې د کارنیګي اینډونمنټ څېړنیز مرکز ته پرون انلاین خبرې کولې د امریکا دریځ یوځل بیا په ډاګه کړ او ویې ویل چې ایران یو ډېر غیرمسوولانه کار کړی چې یو ځواب باید ورکړل شي.
نوموړي زیاته کړه چې امریکا د اسراییل د ځینو اقداماتو د ملاتړ په برخه کې خپل دریځ روښانه کړی او په لبنان کې یې د اسراییل د عملیاتو پراختیا ته خپله ژوره اندېښنه څرګنده کړې ده.
د اسراییل پوځ په خپلو شمالي پولو کې د لبنان له حزبالله ډلې سره په جګړه دی.
د چهارشنبې په ورځ د دې جګړې په ترڅ کې اته اسراییلي عسکر ووژل شول چې دا په یو ځای د تېر یوه کال په ترڅ کې د حزبالله له وسلهوالې ډلې سره تر ټولو زیات تلفات ي چې اسراییلي پوځیانو ته اوړي.
ایران پرون وویل چې پر اسراییل یې د توغندیو ستر برید پای ته رسېدلی او غوښتل یې چې له دې لارې د نورو ځوښتونو او تحرکاتو مخه ونیول شي.
