نړۍ
عراقچي: پر اسراييل د ايران اقدامات پای ته رسېدلي
د ایران د بهرنیو چارو وزیر عباس عراقچي پر اسراییلو د دې هېواد له توغنديي حملو څو ساعته وروسته اعلان وکړ چې، د تهران اقدامات پای ته رسېدلې دي.
ښاغلي عراقچي بېګا ناوخته پر ایکس شبکې په یو بیان کې پر اسراییلو حمله د ایران مشروع حق وباله او ویې ویل، ایران یوازې د اسراییلو پوځي او امنیتي تاسیسات په نښه کړې دي.
عراقچي اسراییل ته خبرداری ورکړ چې د غچ اخیستنې د اقداماتو په صورت کې به د تهران ځواب پرېکنده او په ډېر ځواک سره وي.
د اسراییلو پوځ د ایران توغندويي حمله جدي وبلله، خو ویې ویل چې د تلفاتو او زیانونو اړوند راپورونه یې نهدي ترلاسه کړي.
د اسراییلو پوځ د ایران له حملو وروسته ويلي، د اسراییلو هوايي ځواک به په ټول منځني ختیځ کې هوايي حملو ته دوام ورکړي.
د ورځې تازه خبرونه دلته ولولئ
پزشکیان: که اسراییل له خپلو اقداماتو لاس وانهخلي، د ایران له جدي ګواښ سره به مخامخ شي
د ایران ولسمشر مسعود پزشکیان نن چهارشنبه د تلې ۱۱مه ویلي، که اسراییل له خپلو اقداماتو لاس وانهخلي، د ایران له جدي ګواښ سره به مخامخ شي.
د ایراني رسنیو د راپورونو پر بنسټ، پزشکیان دا خبرې خبریالانو ته، قطر ته د هغه د پلان شوي سفر وړاندې کړي دي.
ایران تېره شپه پر اسراییلو ۲۰۰ توغندي وتوغول، خو د اسراییلو پوځ ویلي، د ایران له لوري توغول شوي ۱۸۰ توغندي يې شنډ کړي دي.
د اسراییلو د پوځ په خبره، د دې توغندیو د توغولو په پایله کې دوه ملکیان ټپیان شوي دي.
د ایران توغندیزو بریدونو د بېلابېلو هېوادونو غبرګونونه هم راپارولي دي.
فرانسې نن وویل، د ایراني توغندیو پر وړاندې د اسراییلو په دفاع کې ښکېله ده.
جرمني پر اسراییلو د ایران توغندیز بریدونه غندلي او خبرداری یې ورکړی چې دا بریدونه به په منځني ختیځ کې د شخړو لمن لا پسې پراخه کړي.
د امریکا پخوانی ولسمشر جیمي کارټر نن سل کلن شو
د ښاغلي کارټر کورنۍ، ملګري او مینهوال د هغه په ټاټوبي جورجیا کې د دې ورځې د نمانځلو لپاره راټول شوي وو.
جیمي کارټر د امریکا لومړنی ولسمشر دی چې سل کلنۍ ته رسیږي.
هغه د ۱۹۷۷ څخه تر ۱۹۸۱ پورې د خپل هېواد د ۳۹م ولسمشر په توګه دنده ترسره کړې.
د خپلې دورې له پای ته رسېدو وروسته یې د کارټر مرکز مشري په غاړه واخیسته.
د دې مرکز یوه له مهمو پروژو څخه د ګلوبل ۲۰۰۰ نړیوال سازمان جوړول دي، چې دنده یې د درېیمې نړۍ په هېوادونو کې د ناروغیو کنټرول او کرنیز تولید ته وده ورکول دي.
کارټر په ۲۰۰۲ کال کې د نوبل د سولې جایزه ترلاسه کړه، هغه د امریکا درېیم ولسمشر دی چې دا معتبره جایزه ترلاسه کوي.
د فلسطين روغتيايي چارواکي: پر غزه د اسراييلو تازه بريدونو کې ۳۲ تنه وژل شوي
د فلسطین روغتیايي چارواکو نن چهارشنبه د تلې په ۱۱مه نېټه وویل چې، د غزې پر جنوبي سیمو د اسرايیل په نویو بریدونو کې په یوه ورځ او شپه کې لږ تر لږه ۳۲ تنه وژل شوي دي.
دا پهداسې حال کې ده چې اسرايیلي ځواکونو پر خان یونس ښار خپل پراخ ځمکني بریدونه پیل کړل.
په خان یونس کې اروپايي روغتون خبر ورکړی، چې پر دغه ښار د اسرايیلو له هوايي او ځمکنیو بریدونو وروسته یې یوولس مړي موندلي چې په وژل شویو کې ښځې او ماشومان هم شامل دي.
په غزه کې د اسرايیلو او حماس تر منځ جګړه له یوه کال راهیسې روانه ده.
امریکا او اروپايي ټولنه حماس د یوې ترهګرې ډلې په توګه پېژني.
پر غزې د اسرايیلو پراخ بریدونه وروسته له هغه پیل شول چې د ۲۰۲۳ کال د اکټوبر په اوومه د حماس جنګیالیو د اسرايیلو پر بېلابېلو سیمو بریدونه وکړل، چې ۱۲۰۰ کسان یې ووژل او شاوخوا ۲۴۰ یې یرغمل کړل.
د حماس تر ادارې لاندې د فلسطین د روغتیا وزارت وايي، د جګړې له پیل راهیسې تر اوسه شاوخوا ۴۵ زره او ۵۰۰ کسان وژل شوي دي.
دغه شمېر تر اوسه خپلواکو سرچینو نهدي تایید کړي.
شمالي وزيرستان کې د اتمانزيو جرګې د ټولو دولتي ادارو د تړل کېدو اعلان کړی
په شمالي وزیرستان کې د اتمانزیو جرګې د اعتراض په توګه له نن څخه په سیمه کې د ټولو دولتي ادارو د بندېدو اعلان کړی.
دې جرګې له تېرې دوشنبې د سپټمبر له ۳۰مې راهیسې اعتراض پیل کړی او د بنو او غلام خان لویه لاره یې هم تړلی ده.
د جرګې ویاند مولانا بیت الله پرون خبریالانو ته وویل، حکومت له ژمنې سره سم د امنیت په ټینګولو کې پاتی راغلی دی، نو ځکه له چارواکو غواړي چې ټول دولتي دفترونه دې وتړي او کارکوونکي دې کار ته نه راځي.
د شمالي وزیرستان مرستیال کمېشنر محمد یوسف د اتمانزیو د جرګې دا اقدام تروریستي عمل بللی او ټولو دفترونو ته په یوه مکتوب کې یې له پولیسو او امنیتي ادارو څخه د دولتي ادارو د امنیت د یقیني کولو غوښتنه کړې ده.
د فرانسې ولسمشر پر اسراييلو د ايران بريد غندلی او د اسراييلو پر خونديتوب يې ټينګار کړی
د فرانسې ولسمشر امانویل مکرون پر اسراییلو د ایران برید په کلکه غندلی او د اسراییل پر خوندیتوب د ټینګار په ترڅ کې یې ویلي دي چې، فرانسې په منځني ختیځ کې خپلې ټولې پوځي سرچینې چمتو کړې دي.
د فرانسې د جمهوري ریاست د بیان لهمخې ښاغلي مکرون ویلي دي، د لبنان حزبالله ډله باید د اسراییل او د هغه د وګړو پر وړاندې تروریستي اقدامات بند کړي.
د حزبالله سیاسي او پوځي ډلې ته چې د لبنان جنوبي سیمې اداره کوي، امریکا د یوه تروریستي سازمان په سترګه ګوري، خو اروپايي ټولنې یې یوازې پوځي څانګه د تروریستي سازمانونو په لېست کې شامله کړې.
د فرانسې ولسمشر همداراز د ملګروملتونو د امنیت شورا د پرېکړه لیکونو لهمخې د لبنان د ارضي تمامیت او ملي حاکمیت د اعادې غوښتنه کړې ده.
له بلې خوا د امریکا ولسمشر جوبایډن پر اسراییلو د ایران پرونۍ حمله بېاغېزې بللې او ویلي یې دي چې د ایران پر وړاندې د اسراییلو د اقداماتو پوره ملاتړ کوي.
د ښاغلي بایډن په وینا امریکايي ځواکونو د راکټي حملو پر وړاندې د اسراییلو د دفاعي عملیاتو ملاتړ وکړ.
د ایران د بهرنیو چارو وزیر پر اسراییلو د دې هېواد له توغندی حملو څو ساعته وروسته اعلان وکړ چې، د تهران اقدامات پای ته رسېدلې دي.
ښاغلي عراقچي بېګا ناوخته پر ایکس شبکې په یوه بیان کې پر اسراییلو حمله د ایران مشروع حق وباله او ویې ویل، ایران یوازې د اسراییلو پوځي او امنیتي اډې په نښه کړې دي.
پر اوکراين د روسيې په تازه بريدونو کې د اته کسانو د وژل کېدو خبر ورکړل شوی
لږ تر لږه اته کسان پر اوکراین د روسیې په هوايي حملو کې وژل شوي او ګڼ نور ټپیان شوي.
د اوکراین ولسمشر ولودیمیر زیلینسکي بېګا پر خپله ایکس پاڼه ولیکل چې، د روسیې دا هوايي حملې پر خرسون، زاپوريژیا او سومي ښارونو شوې دي.
د ښاغلي زیلینسکي په وینا د خرسون په مرکز کې پر یوه مارکېټ په پرونۍ حمله کې د ۶ کسانو مړینه او د ۶ نورو ټپي کېدل تایید شوي دي.
جو بايډن: د اسراييل له لوري ايران ته د توغندويي بريد د ځواب په اړه جدي بحث روان دی
د امریکا د متحدهایالتونو ولسمشر جو بایډن وایي، پهدې اړه چې اسراییل د ایران د بالسټیک توغندیو برید ته په څه ډول ځواب ووایي، جدي بحث روان دی او زیاته یې کړه چې دا به ولیدل شي چې دغه برید د ایران لپاره څه نتیجې لري.
د رویترز خبري اژانس د راپور لهمخې بایډن چې تېره شپه یې پر اسراییل د ایران له توغندویي برید وروسته په سپینه ماڼۍ کې څرګندونې کولې، یوځل بیا له اسراییل سره د متحدهایالتونو په کلک ملاتړ ټینګار وکړ او ویې ویل چې، دی به پهدې اړه د اسراییل له صدراعظم بنیامین نتنیاهو سره خبرې وکړي.
هغه وویل داسې ښکاري چې د ایران دغه برید بېاغېزې و.
د اسراییل د پوځ ویاند ډانیل هګاري دغه برید جدي وباله او زیاته یې کړه چې هغه به عواقب ولري.
هغه زیاته کړه، تر اوسه پورې پوځ ته د احتمالي ځاني او مالي زیانونو راپورونه نهدي ورکړل شوي.
په عین حال کې د ایران سپاه پاسدران انقلاب ځواک وویل، پر اسراییل یې په لسګونو بالسټیک توغندي وتوغول او اسراییل ته یې خبرداری ورکړ، چې که غچ اخیستونکي اقدام ته مخه کړي، نو د تهران له لا ویجاوړونکي او وروانونکي اقدام سره به مخ شي.
اسراييل د حزبالله له وسلهوالو سره د سختې جګړې خبر ورکړی
اسراییلو د لبنان پر جنوبي سیمو له ځمکنو بریدونو وروسته وویل چې، ځواکونه یې په سیمه کې د لبنان د حزبالله له وسلهوالو سره په "سختو جګړو" بوخت دي.
د امريکا له مخالفت او په منځني ختيځ کې د جګړې د پراخېدو له وېرې سره سره اسراييلو د دغه هېواد په جنوب کې د لبنان د حزبالله د ځواکونو پر ضد خپل ځمکني عمليات پيل کړل.
د لبنان حزبالله یوه پوځي-سیاسي ډله ده چې د امریکا لهخوا د ترهګرو په توګه پېژندل کېږي.
اروپایي ټولنې د دغې ډلې پوځي څانګه تور لېست کې شامله کړې ده.
حزبالله چې د لبنان په پارلمان کې غړي هم لري، د لبنان پر جنوبي برخې تر ډېره واک چلوي.
د اسرايیلو د پوځ د عربي ژبې ویاند افیحای ادرعي په خپل ټلېګرام پیغام کې لیکلي، د لبنان په جنوب کې سختې نښتې روانې دي.
نوموړي د سيمې له خلکو وغوښتل، د خپل ځاني خونديتوب په موخه دې د ليتاني سيند جنوبي سيمې ته په موټرو کې تګ راتګ نهکوي.
تر دې مخکې د اسرايیلو پوځ اعلان کړی و چې، د دغه هېواد په جنوب کې یې د لبنان د حزبالله پر ضد "دقیق او هدفي" عملیات پیل کړي دي.
د اوکراين پر يوشمېر سيمو د روسيې په بريدونو کې اته کسان وژل شوي
د اوکراین پر خرسون، زاپوریژیا او سومي سیمو د روسیې په نننیو بریدونو کې لږ تر لږه ۸ تنه وژل شوي دي.
تر ټولو زیاته مرګژوبله په خرسون کې د روسیې په یوه هوایي برید کې اوښتې او هلته د لږ تر لږه شپږو کسانو وژل کېدل تایید شوي دي.
د اوکراین ولسمشر ولودمیر زيلينسکي ویلي، خرسون کې د شوي برید له کبله شپږ نور کسان ټپيان شوي هم دي.
بل لور ته د ناټو نوي ټاکل شوي سرمنشي مارک روټې چې نن یې خپل کار پيل کړ، اوکراین ته د کلک پوځي ملاتړ ډاډ ورکړی دی.
روټې نن په بروکسل کې خپله دنده داسې مهال پيل کړه چې، پر اوکراین د روسیې د ناموجه یرغل زر ورځې پوره شوې.