د ملګرو ملتونو په عمومي اسمبلۍ کې نن جمعه (د مې میاشتې ۱۰مه) هغه پرېکړه لیک ته رایه اچول کېږي چې ښايي فلسطین ته «نوي حقونه او امتیازونه» ورکړي.
په پرېکړه لیک کې له امنیت شورا غوښتنه کېږي چې د ملګرو ملتونو د ۱۹۴م غړي په توګه د فلسطین د منلو پر موضوع غور وکړي.
ملګرو ملتونو د اپرېل میاشتې پر ۱۸مه د یوه پرېکړهلیک په ملاتړ رایه ورکړې وه چې په ملګرو ملتونو کې یې د فلسطین غړیتوب ته لار پرانیستله.
دا هغه هدف دی چې فلسطینیان یې له اوږدې مودې د ترلاسه کولو هڅه کوي او اسرائیل یې د مخنیوي لپاره اقدامات کړي.
درېیو غربي ډیپلوماتانو د نومونو نه ښوولو په شرط اسوشېټېډ پریس خبري اژانس ته ویلي چې اټکل کېږي نن دغه پرېکړه لیک په لوی اکثریت تصویب شي.
له یوې خوا په غزه کې د اسرائیل د جګړې اوومه میاشت ده، بل لوري ته د اوربند د موافقې پر سر د سلا کېدو هڅې هم بریالۍ شوې نه دي.
مصر ویلي، که حماس ډله او اسرائیل غواړي په غزه کې د اوربند د ټینګېدو او د یرغمل شویو د تبادلې پر سر موافقه وشي، باید «انعطاف» وښيي.
راپورونه وايي د تازه مذاکرو تر بې نتیجې ختمېدو وروسته اسرائیل بیا په غزه کې خپلې حملې شدیدې کړې دي.
د مصر د بهرنیو چارو وزارت نن جمعه په یوه اعلامیه کې ویلي، د دغه هېواد د بهرنیو چارو وزیر سامح شکري او د امریکا د بهرنیو چارو وزیر انتوني بلېنکن په ټلیفوني خبرو کې د ښکېلو لوریو د انعطاف منلو پر اهمیت ټینګار وکړ.
هغه د غزې په جګړه کې له ښکېلو لوریو وغوښتل چې د اوربند پر موافقه د سلا کېدو او په غزه کې د بشري غمیزې د ختمېدو لپاره هره لازمه هڅه وکړي.
حماس چې د امریکا متحد ایالتونه او اروپايي ټولنه یې یو تروریستي سازمان ګڼي نن جمعه ویلي، هغه مرکچیان یې چې روانه اوونۍ د اوربند پر سر د خبرو لپاره په قاهره کې وو، اوس دوحې ته روان شوي دي.
حماس وايي، اسرائیل د اوربند هغه پېشنهاد چې منځګړو ورسپارلی و، رد کړی او ورباندې اعتراض لري.
د مصر له حکومت سره نږدې خبري اژانس القاهره پرون پنج شنبه راپور ورکړی و چې د اسرائیل مرکچیان هم له قاهرې روان شوي دي.
له کله چې اسرائیل د غزې په جنوبي ښار رفح کې د دوشنبې ناوخته خپل عملیات پیل کړل، د فلسطیني کډوالو لپاره د ملګرو ملتونو د ملاتړ ادارې نن ویلي چې له هغې راهیسې له رفح ښار څخه شا و خوا یولک او ۱۰زره کسان نورو ځایونو ته په کډه کولو مجبوره شوي دي.
د غزې تړانګې په نورو برخو کې د جګړو له کبله یو ملیون او درې لکه فلسطینیانو چې د ټولې غزې د وګړو نیمايي برخه جوړوي په رفح ښار کې پناه اخیستې ده.
د اکتوبر میاشتې له اوومې په غزه کې د روانې جګړې له کبله د حماس تر ولکې لاندې د غزې د روغتیا وزارت په وینا تر ۳۴زره ۵۰۰ ډېر کسان وژل شوي، هغه شمېرې چې خپلواکو سرچینو تایید یا رد کړي نه دي.
