پر غزې د اسراییل د هوایي بریدونو له تېزېدو سره ملګري ملتونه په سیمه کې د بشري وضعیت د خرابېدو خبرداری ورکوي.
د فلسطیني کډوالو لپاره د ملګرو ملتونو ادارې خبرداری ورکړ چې که غزې ته سمدستي تېل ونه رسېږي نو په دې سیمه کې مرستندویه فعالیتونه زښت زیات کم کړي.
دغه خبرداری داسې مهال ورکول کېږي چې په غزه کې روغتیایي چارواکو وویل چې د روغتونونو امکانات ډېر محدود شوي او د ګڼو ټپیانو په درملنه کې له سختو ستونزو سره مخ دي.
چارواکو په سیمه کې د اسراییلي جېټ الوتکو د تېرې ورځې په بمباریو کې د په سلګونو کسانو د وژل کېدو خبر ورکړی دی.
ملګرو ملتونو ویلي چې په دې وروستیو ورځو کې یې هغو روغتونونو ته چې د ټپیانو درملنه کوي، یوڅه مرستې لېږدولي، خو د فلسطیني کډوالو لپاره د ملګرو ملتونو ادارې چې په غزه کې د بشري خدمتونو تر ټولو لویه چمتو کوونکې اداره ده، ویلي چې تېل یې په ختمېدو دي.
د دې ادارې ویاندې لیلي ایسپوزیتو وویل چې له تېلو پرته یې لارۍ نه شي کولای په غزې تړانګه کې لیرې ځایونو ته مرستې ورسوي او مجبوره دي چې پرېکړه وکړي، په کمو تېلو سره کوم فعالیتونه سرته ورسوي او کوم نه.
ملګري ملتونه وایي، د غزې له ۲،۳ ملیون وګړو شاوخوا ۱،۴ میلیون یې له خپلو مینو بې ځایه شوي چې تقریباً شپږ لکو یې د ملګرو ملتونو په پناه ځایونو کې اړولي دي.
د اسوشېټېډپرېس آژانس د راپور له مخې د اسراییل پوځ پرون سې شنبې وویل چې په تېره یوه ورځ کې یې په غزه کې ۴۰۰ هوایي بریدونه کړي چې هغه د مخکېنۍ ورځې د ۳۲۰ بریدونو پرتله زیات وو.
پوځ ویلي، په دغو بمباریو کې یې سخت دریځي وسله وال وژلي او د هغوی ترځمکې لاندې تونلونه، د قوماندې مرکزونه، وسلتونونه او نور پوځي تاسیسات له منځه وړي دي.
پوځ همدارنګه حماس تورن کړی چې په غزه کې د ملکیانو په منځ کې ځانونه پټوي.
د حماس تر ولکې لاندې غزه کې د روغتیا وزارت وویل چې د دوشنبې او سې شنبې ورځو ترمنځ لږترلږه ۷۰۴ کسان چې زیاتره یې ښځې او ماشومان دي، وژل شوي دي.
خو دې آژانس ویلي چې د مړو دغه شمېر چې حماس وایي، د روغتونونو له رییسانو یې ترلاسه کړي، په خپلواکه توګه نه شي تاییدولی.
دا د اسراییل او فلسطین ترمنځ د څو لسیزو کړکېچ په ترڅ کې په ۲۴ ساعتونو کې د اسراییل په بمباریو کې د فلسطینیانو د مرګ ژوبلې تر ټولو لوړه شمېره ده.
د راپور له مخې په غزه کې به د مړو شمېر لا زیات شي چې کله اسراییل له پلان سره سم په سیمه کې ځمکني عملیات پیل کړي.
په واشنګټن کې د سپینې ماڼۍ د ملي امنیت شورا ویاند جان کربي پرون سې شنبې خبریالانو ته وویل چې متحده ایالات نه شي کولای چې د یوې ورځې د مړو دغه شمېره تایید کړي.
هغه وویل، د روغتیا وزارت د حماس له خوا اداره کېږي او د ده په باور په هر هغه څه کې چې حماس یې په ښکاره اعلانوي باید له دقته کار واخیستل شي.
د اسراییل پر جنوبي ښارونو د حماس له لوري د اکټوبر د اومې له برید وروسته چې اسراییل غزه کلابنده کړې، وګړي یې د خوراکي موادو، اوبو او درملو له سخت کمښت سره مخ دي.
