د ایران دولتي خبري اژانس ایرنا خبر ورکړی چې د دې هیواد په کرمان ښار کې د تېرې چهارشنبې ورځې په دوه چادونو کې ۱۲ افغان کډوال هم وژل شوي دي.
د دې خبري اژانس د خبر له مخې، په وژل شویو کې ۷ یې ښځې دي.
ایرنا خبری اژانس د کرمان ولایت د کډوالو د ادارې له قوله خبر ورکړی چې رضا نورزی، محمد قاسم احمدي،مریم تاجک، محمد متین احمدی، محمد تاجک هند، نازنین فاطمه عزیزي،زهرا فیضي، نظیفه غفوري، نعمت الله اڅکزی، لطیفه اڅکزۍ ، معصومه اڅکزۍ ، رازګل علیزۍ د دې پیښو قربانیان دي.
خو د ایران اړوند یوې بلې رسنۍ «سحر» په دغو چاودنو کې د وژل شویو افغان کډوالو شمېر ۱۳ ښودلی دی.
راز ګل علیزۍ او د هغې دوه لوڼې معصومه اڅکزۍ او لطیفه اڅکزۍ د دغې پېښې په قربانیانو کې شامل دي.
د رازګل علیزۍ د خور زوی میرا جان ازادي راډیو ته وویل :
" رازګل عليزۍ زما خاله وه معصومه او لطیفه اڅکزۍ یې لوڼې وې ، یاد مراسم د دوی کور ته په نږدې سیمه کې و زما د خاله دوه کوچنۍ لوڼې مراسمو ته تللې وې ځکه هلته یې خواړه ورکول ، خاله مې په خپلو لوڼو پسې تللې وه چې کور ته یې راولي، دوه چاودنې وشوې او هغوی په کې ووژل شوې."
د میراجان په خبره، رازګل علیزۍ ۴۱ کلنه او خیاطه وه.
دی وايي یوه لور یې معصومه اڅکزۍ اته کلنه او لطیفه اڅکزۍ چې تر دې کوچنۍ وه د ښوونځي زده کوونکې وې.
دغې کورنۍ له ۲۵ کلونو را هیسې د ایران په کرمان ښار کې ژوند کاوه .
د ایران په کرمان ښار کې د چهارشنبې د ورځې د پېښې د نورو قربانیانو په ډله کې د نعمت الله اڅکزي د تره زوی علي احمد اڅکزي ازادي راډیو ته وویل:
" د قاسم سلېماني تلین مراسمو ته تللي وو، کله چې لومړۍ چاودنه وشوه، یوه لاره د خلکو د وتلو لپاره خلاصه وه کله چې ټولو خلکو هغې لاړې ته مخه کړه په هماغه ځای کې دوهمه چاودنه وشوه ، نعمت الله اڅکزی ۱۵ کلن او د خپلې کورنۍ یوازېنی زوی و، د خپلې کورنۍ د نفقې پیدا کولو لپاره ایران ته په غریبۍ تللی و، د ټولې کورنۍ هیلې نعمت ته وې هغه هم ووژل شو ."
د علي احمد اڅکزي په خبره، نعمت الله ۱۵ کلن و او د ښوونځي د اووم ټولګي زدکونکی وو د ورځې دوه وخته یې د خپلې شپږ کسيزې کورنۍ د لګښتونو د پوره کولو لپاره کار کولو.
دغې پېښې په ایران کې د یو شمېر افغان کډوالو اندېښنې راپارولې دي.
په ایران کې یو تن افغان کډوال حفیظ الله نایبي ازادي راډيو ته وویل چې پنځه کاله وړاندې د ناامنیو د زیاتېدو له امله له افغانستان څخه ایران ته کډوال شوی، خو اوس په دغه هېواد کې هم امنیت نشته.
نایبي زیاتوي:
" موږ د فاریاب ولایت په یوې لیرې سیمې کې ژوند کولو، بد بختانه زموږ سیمه ډیره ناامنه وه ، له چاودنو، انتحاري او ورور وژنې څخه وتښتیدو، اوس دلته هم د امنیت په برخه کېاندیښمن یو ،پاکستان هم له خپل هیواد څخه افغان کډوال وباسي او ایران هم، مخکې به په رخصتیو کې وتلو د عاشورا مراسم به مو نمانځل خو اوس له ویرې له کوره د وتلو جرت نه شو کولای هره شېبه د یوې پېښې خطر وي. "
د تېرې چهارشنبې د ورځې په ماسپښین په کرمان ښار کې د سپاه پاسداران انقلاب د قدس ډلې د پخواني قومندان قاسم سلېماني د مړینې د څلورم تلین د نمانځنې په مراسمو کې چې ګڼ شمېر خلک راټول شوي وو، دوه خونړۍ چاودنې وشوې.
د طالبانو د حکومت ویاند ذبیح الله مجاهد او د طالبانو د حکومت د بهرنیو چارو د وزارت مرستیال حافظ احمد ضیا تکل په دې اړه د ازادي راډیو پوښتنو ته ځواب نه دی ویلی، خو د طالبانو د حکومت د بهرنیو چارو وزارت د یوې بیانیې په خپرولو سره د ایران په کرمان ښارکې شوې چاودنې غندلې دي.
د ایراني رسنیو د راپورونو له مخې په دغو دوو چاودنو کې شاوخوا ۹۰ کسان وژل شوي او ۲۸۴ نور ټپیان شوي دي.
دا چې د ټپیانو په ډله کې افغان کډوال شامل دي او کنه، جزیات نه دي ورکړل شوي .
د دې پېښو د قربانیانو جنازې د جمعې په ورځ ترسره شوې .
دا په ایران کې د ۱۹۷۹ کال د اسلامي انقلاب راهیسې تر ټولو خونړي بریدونه ګڼل کیږي.
د ایران حکومت د پنجشنبې په ورځ د دغې خونړیو پېښو له امله ملي ماتم اعلان کړی و.
