د لاسرسۍ وړ لېنکونه

تازه خبر
شنبه ۲۳ چنګاښ ۱۴۰۳ کابل ۰۱:۳۹

د پاکستان صدراعظم: په افغانستان کې پاتې شوې امریکایي وسلې د ترهګرو ډلو لاس ته ورغلې دي


د تحریک طالبان پاکستان یو شمېر غړي، چې پاکستان یې په افغانستان کې د پټنځایونو د موجودیت ادعا لري
د تحریک طالبان پاکستان یو شمېر غړي، چې پاکستان یې په افغانستان کې د پټنځایونو د موجودیت ادعا لري

پاکستان یو ځل بیا په افغانستان کې د ترهګرو ډلو د پیاوړتیا په هکله اندېښنه څرګنده کړې ده.

د پاکستان د موقت حکومت صدراعظم انورالحق کاکړ ادعا کړې، چې له افغانستانه د امریکا له وتلو وروسته په دغه هېواد کې پاتې شوي پوځي تجهیزات، د ترهګرو ډلو د مجهز کېدو لامل ګرځېدلي.

ښاغلي کاکړ د پنجشنبې په ورځ په یوه خبري کنفرانس کې خبریالانو ته وویل، چې د ترهګرو ډلو پیاوړتیا او تجهیز د پاکستان په ګډون د سیمې هېوادونو ته لوی ګواښ دی.

د طالبانو حکومت بیا دغه ادعاوې تل ردوي.

د پاکستان د موقت حکومت صدراعظم زیاته کړه، چې له افغانستانه د امریکا په بېړني ډول وتلو نه‌یوازې پاکستان؛ بلکې چین، ایران او د منځنۍ اسیا هېوادونه هم اغېزمن کړي دي.

نوموړي وویل:

"دا تجهیزات، د ترهګرو جنګي وړتیا یو څه زیاتوي. که دوی پخوا زما په کوم سرتېري د برید هڅه کوله، نو د هغوی جنګي او د وژلو وړتیا ډېره محدوده وه. اوس، د دې اضافه شوي تجهیزاتو سره که چېرې یوه ګوته حرکت وکړي، نو دوی کولای شي په نښه‌یې کړي. دا نوې انرژي نه، نوي تجهیزات دي."

د پاکستان د موقت حکومت صدراعظم، انورالحق کاکړ
د پاکستان د موقت حکومت صدراعظم، انورالحق کاکړ

د طالبانو حکومت ویاند ذبیح‌الله مجاهد په دې اړه د ازادي راډیو پوښتنې ځواب نه‌کړې، خو له دې مخکې یې دا ډول ادعاوې رد کړي او ویلي یې دي چې پاتې ټول پوځي تجهیزات د طالبانو حکومت په سلاح‌کوټونو کې ساتل کېږي.

مخکې له دې هم د افغانستان په تور بازار کې د امریکايي وسلو او تجهیزاتو د پېر او پلور راپورونه خپاره شوي، خو طالبانو رد کړي دي.

له دې وړاندې هم د ملګرو ملتونو امنیت شورا او د پاکستان او روسیې په ګډون د سیمې ځینو هېوادونو، د طالبانو له بیا ځلي واکمنېدو وروسته په افغانستان کې د ترهګرو ډلو په ځانګړې توګه؛د پاکستان د طالبانو تحریک (ټي‌ټي‌پي) او د اسلامي دولت (داعش) خراسان څانګې د فعالیتونو د ډېرېدو په اړه اندېښنه ښودلې وه، هغه ادعاوې چې د طالبانو حکومت‌یې تل ردوي.

تازه د پاکستان د بهرنیو چارو وزارت ویاندې ممتاز زهرا بلوچ د جمعې په ورځ په یوه خبري ناسته کې وویل، چې د طالبانو حکومت د نړۍ پر وړاندې مسؤلیت لري او د دې ترڅنګ باید د افغانستان، پاکستان او چین ترمنځ د درې اړخیزې غونډې ژمنې عملي کړي.

نوموړې زیاته کړه چې طالبان باید د هغو کسانو او ډلو پر ضد اقدام وکړي چې پاکستان ته ګواښ پېښوي.

د طالبانو حکومت تل ټینګار کړی، چې د افغانستان له خاورې به هېڅ هېواد ته کوم ګواښ پېښ نه‌شي، خو تر دې وړاندې یې د دغه ډول څرګندونو په غبرګون کې ویلي چې افغانستان د سیمې د هېڅ هېواد د نا امنۍ مسؤل نه‌دی او پاکستان باید په خپله خپل امنیتي وضعیت ته پاملرنه وکړي.

پاکستان د طالبانو حکومت د ترهګرو ډلو په نه مخنیوي تورنوي، خو طالبان یې ادعا بې بنسټه بولي
پاکستان د طالبانو حکومت د ترهګرو ډلو په نه مخنیوي تورنوي، خو طالبان یې ادعا بې بنسټه بولي

د پوځي چارو پوه احمد خان اندړ ازادي راډيو ته وویل، د دې احتمال شته چې دغه تجهیزات د ترهګرو ډلو لاس ته ورغلي وي، خو د ده په باور پاکستان باید د دوی ریښې له افغانستانه بهر وپلټي،

اندړ وایي:

"یوازې د وسلو پیاوړتیا نه‌شي کولای ترهګرې ډلې کامیابه کړي. باید د مالي او مادي پیاوړتیا سرچینې پیدا شي او پاکستان باید د ترهګرۍ سره د مبارزې رښتینې لارې پر مخ بوځي، کنه نو دا وسلې چې د ترهګرو په لاس کې لوېدلي دي، نه‌یوازې د پاکستان او افغانستان، بلکې کولای شي د سیمې لپاره خطر ولري."

دا په داسې حال کې ده چې د پاکستان د بهرنیو چارو وزارت سرپرست جلیل عباس جیلاني د تېرې اوونۍ د چهارشنبې په ورځ وویل، چې د طالبانو حکومت اسلام‌اباد ته خبر ورکړی چې یو شمېر کسان‌یې په پاکستان کې د ترسره شویو ترهګریزو بریدونو په تړاو نیولي دي، خو دا ادعا د طالبانو حکومت نه‌ده تایید کړې.

د افغانستان د بیارغونې لپاره د امریکا د ځانګړي سرپلټونکې ادارې (سیګار) د تېر کال د راپور پر بنسټ، امریکايي ځواکونو طالبانو ته د ۷،۲ میلیارده ډالرو په ارزښت وسلې او مهمات لکه ۷۸ الوتکې، ۴۰ زرې پوښه، له ۳۰۰ زره ډېرې وسلې او په زرګونه نور مهمات او مرمۍ، پريښي دي.

اړوند مطالب

XS
SM
MD
LG