د بلغاریا پولیسو پرون جمعه یوه بې خاونده لارۍ ومونده، چې په کې د ۱۸ پناه غوښتونکو مړي ترلاسه شوي دي.
د بلغاریا د کورنیو چارو وزارت ویلي، د لومړنیو معلوماتو له مخې په دې لارۍ کې ۴۰ پناه غوښتونکي روان وو چې اتلسو یې د اکسیجن د کموالي له کبله ساه ورکړې ده.
د کورنیو چارو وزارت ویلي، ژغورل شوي کسان نږدې روغتونونو ته لېږدول شوي دي.
د رسنیو په راپورونو کې ویل شوي چې ټول مړه شوي پناه غوښتونکي د افغانستان وګړي وو.
د بلغاریا د روغتیا وزیر اسین میدژیدیف ویلي، اکثر ژغورل شوي کسان په بد روغتیايي وضعیت کې دي.
د هغه په خبره د دغو پناه غوښتونکو کالي لانده وو، یخنۍ وهلي او ښکاره خبره ده چې له څو ورځو راهیسې یې څه نه وو خوړلي.
دغه لارۍ پلازمېنې صوفیه ته څېرمه د یوې لویې لار تر څنګ موندل شوې ده، خو چلوونکی یې نه دی نیول شوی.
په راپورونو کې ویل شوي چې پولیسو درې کسان د دې قضیې په تړاو نیولي دي.
زیات پناه غوښتونکي چې په هغوی کې افغانان هم شامل دي، هڅه کوي په خطرناکو لارو تر مزله وروسته ځانونه د اروپايي ټولنې غړو هېوادونو ته ورسوي.
بلغاریا چې نږدې ۷ ملیونه وګړي لري، د افغانستان او منځني ختیځ د پناه غوښتونکو عمده لار ګڼل کېږي.
د دغو پناه غوښتونکو لږ شمېر یې د اروپايي ټولنې په نېستمن هېواد بلغاریا کې له پاتې کېدو سره لېوالتیا لري.
د ۲۰۱۹م کال په اکټوبر میاشت کې بیا د بریتانیا پولیسو په یوه کانتینري یخچال کې د ۳۹ کسانو مړي موندلي وو.
هغه وخت پولیسو ویلي وو چې د دغو کسانو عمرونه د ۱۵ او ۴ کلونو ترمنځ دي او د ویټنام وګړي وو.
دې ته ورته بله پېښه د ۲۰۱۵م کال په اګست کې شوې وه چې د اتریش پر یوه لوه لار په یوه لارۍ کې ۷۱ تنه پناه غوښتونکي چې د اکسیجن د کموالي له کبله مړه شوي وو، موندل شول.
