په پاکستان کې د وروستیو بې مخینې بارانونو او سیلابونو له امله د مړو شویو کسانو شمېر تر یو نیم زرو تنو اوښتی دی.
په پاکستان کې د مونسون بې ساري بارانونو له امله وروستیو سېلابونو شاوخوا ۳۳ میلیونه کسان اغېزمن کړي او سلګونه زره یې بې کوره کړي دي.
د سند د اوبو د طغیاني کېدو او د سیلابونو له امله سلګونه کلي، سړکونه او پلونه نړېدلي او د پاکستان شاوخوا یو پر دریمه برخه خاوره سېلابونو اغېزمنه کړې.
د اسوشیتد پرس د راپور له مخې ، د دغو سېلابونو له امله د ۵۵۲ ماشومانو او ۳۱۵ ښځو په ګډون ۱۵۴۵ کسانو خپل ژوند له لاسه ورکړی او زرګونه نور ټپیان شوي دي.
دا مهال په پاکستان کې ډاکټران او روغتیايي کارکوونکي د ساري ناروغیو د مخنیوي لپاره هڅې کوي او د ناروغانو په درملنې سربېره سیلاب ځپلو ته درملو، خواړو او خیمو مرستې کوي.
خو د خیبرپښتونخوا د ټانک سیمې ځینې اوسیدونکي له هغې ډلې رحیم خان او مولوي محمد وايي مرستې نه دي ور رسېدلي.
د پاکستان د طبیعي پیښو د مدیریت ملي ادارې پرون د سپتمبر ۱۹مه وویل چې په ډیرو سیندونو، ډنډونو او د اوبو په زیرمو کې د اوبو کچه بېرته عادي حالت ته راګرځیدلې ده.
د پاکستان د سند ایالت د روغتیا اداره وايي، د وروستیو سېلابونو له امله یې ټولټال ۶۸۴۱۸ ټپیان او ناروغان ثبت کړي دي.
تیره اونۍ، روغتیایی چارواکو وویل چې دوی په سند ایالت کې په موقتي روغتیایي کیمپونو کې د شاوخوا ۹۰ زره ناروغانو درملنه کړې.
پاکستاني چارواکو د سند صوبې په سېلاب ځپلو سيمو کې تر ۱۳۰۰۰ زيات روغتيايي کمپونه جوړ کړي دي.
د سند ایالت د روغتیا ریاست په وینا ، ډېری کسان په ځانګړي توګه ښځې او ماشومان د ککړو اوبو له امله د نس ناستو ناروغیو، د پوستکي انتاناتو او ډینګي تبې څخه کړېږي.
په پاکستان کې د یونېسف استازی عبدالله فاضل وايي، وروستیو سېلابونو ۱۶ میلیونه ماشومان اغېزمن کړي دي.
د پاکستان صدراعظم شهباز شریف چې د ملګرو ملتونو په عمومي غونډه کې د ګډون لپاره په نیویارک کې دی، له نړیوالې ټولنې یې غوښتي چې په هغه هېواد کې د وروستیو سېلابونو زیانمنو ته نورې مرستې ولېږي.
