د لاسرسۍ وړ لېنکونه

تازه خبر
پنجشنبه ۷ تله ۱۴۰۱ کابل ۰۰:۳۰

نړیوال سازمانونه د افغان نجونو پر مخ د ښوونځیو تړل ناهیلې کوونکې بولي


آرشیف - په فاریاب کې د نجونو یو ښوونځی

د بشر حقونو د څار نړیوال سازمان په خپل تازه راپور کې ویلي دي، چې افغانستان د طالبانو له واکمنۍ راوروسته په نړۍ کې د نجونو د زده کړو په برخه کې په یو نوم بدي هېواد بدل شوی دی.

زهرا د رخشانې په نوم د ښځو د ځانګړې رسنۍ مسووله او د ټایم مجلې د ۲۰۲۲ کال غوره مېرمن بلل شوې.

نوموړې پر افغانستان د طالبانو د تېر ځل واکمنۍ پر مهال په بامیانو کې په پټه لومړنۍ زده کړې وکړې، وروسته د نورو زده کړو لپاره اړ شوه چې د هلکانو کالي واغوندي او خپل نوم په محمد بدل کړي.

خو هغې ته نږدې شل کاله وړاندې د نظام بدلون طلايي چانس ورکوي او خپلې زده کړې بشپړوي او وروسته د خبریالۍ نړۍ ته ورننوځي.

هغې په ۲۰۲۰ میلادي کال کې د رخشانې په نوم د مېرمنو لپاره یوه ځانګړې رسنۍ جوړه کړه، خو اوس چې پر افغانستان یو وار بیا طالبان حاکم دي زهرا د تاریخ له تکرار او د مېرمنو له وروسته والي وېرېږي.

هغه زیاتوي: "زه د داسې یوې مېرمنې په توګه چې د زده کړو د ترلاسه کولو لپاره مې مبارزه وکړه او وجنګېدم، له نړیوالې ټولنې او د بشر حقونو له نړیوالو بنسټونو غواړم چې د افغان نجونو د زده کړو د حق د غوښتلو ملاتړ وکړي او افغان مېرمنې په دغسې یو حالت کې ځانته پرېنږدي او پر طالبانو فشار راوړي څو هر څه ژر د افغان نجونو په وړاندې د ښوونځيو دروازې خلاصې کړي."

زهرا د هغه شپږو مېرمنو له ډلې ده چې تازه ورسره د بشر حقونو د څار سازمان مرکه کړې او ترې پوښتنه يې کړې چې که زده کړې يې نه وای کړې په ژوند کې به يې کوم بدلونونه راغلي وای؟

د بشر حقونو د څار نړیوال سازمان په خپل تازه راپور کې ویلي دي، چې افغانستان د طالبانو له واکمنۍ راوروسته په نړۍ کې د نجونو د زده کړو په برخه کې په یو نوم بدي هېواد بدل شوی دی.

دغه سازمان ویلي دي، چې طالبانو د افغانستان په یو شمېر محدودو ښارونو کې د سیمه ییزو مشرانو په ډېر فشار له شپږمو ټولګیو پورته نجونو ته د زده کړو اجازه ورکړې خو دا موارد ډېر نادر او ناکافي دي.

د بشر حقونو د څار سازمان د ښځو د برخې مسوولې هیدبار ازادي راډيو سره په خبرو کې وویل، چې له تېرو درې سوه ورځو راپه دېخوا د افغان نجونو پر وړاندې د ښوونځيو د دروازو تړل ناهیلې کوونکې دي.

د بشر حقونو د څار سازمان د ښځو د برخې مسووله هیدبار
د بشر حقونو د څار سازمان د ښځو د برخې مسووله هیدبار

بار وویل: "موږ د یو شمېر فعاله افغان مېرمنو په ځانګړي ډول د بې بې سي نړیوال برخې له خبریالې یلدا حکیمي، فلم جوړونکې تمنا ایاز او د رخشانه رسنۍ بنسټ ایښودونکې زهرا جویا سره خبرې وکړې. دوی په تېرو شلو کلونو کې د زده کړو له برکته له لاسته راوړونو ډکې کیسې درلودې. دا نو اوس څومره ناهیلي کوونکې ده، چې د طالبانو له لوري هره ورځ میلیونونه نجونې له زده کړو بې برخې کېږي."

نږدې یولس میاشتې کېږي، چې طالبانو له شپږم ټولګي پورته د افغان نجونو پر وړاندې د ښوونځيو دروازې تړلي دي.

که څه هم طالبانو د ښوونځيو د خلاصېدو په اړه تازه د ازادي راډیو د خبریال پوښتنې ځواب نه کړې خو له دې وړاندې يې ویلي دي، چې په دې اړه د خپل مشرتابه امر ته منتظر دي.

زهرا جویا، د بشر حقونو د څار په سازمان کې د څېړونکې مرستیاله سحر فطرت، سندرغاړې الهه سرور، په افغانستان کې د سولې د ځوانو سفیرانو ټولنې بنسټ اېښودونکې هیله یون، او خبریاله یلدا حکیم هغه مېرمنې دي چې د بشر حقونو د څار سازمان ورسره مرکې کړي په وروستیو شلو کلونو کې يې زده کړې کړي او په ټولنه کې یې ځانونو ته ځایونه پیدا کړي دي.

خو اوس، چې د طالبانو له لوري د نجونو په وړاندې د ښوونځيو دروازې تړل شوي وېره داده چې ښايي د نجونو یو بل نسل د تړلو دروازو تر شاه په تیارو کې ژوند تېر کړي.

اړوند مطالب

XS
SM
MD
LG