د افغانستان د بهرنيو چارو وزارت وایي، له طالبانو سره د سولې د خبرو د دوهم پړاو د بریالي کېدو لپاره یې نړیوال کمپاین پیل کړی دی.
د بهرنیو چارو وزارت ویاند ګران هېواد د شنبې (د مرغومي ۲۰مه) په ورځ رسنیو ته په يوه استول شوي ويډيويي پيغام کې ویلي چې محمد حنیف اتمر له تېرو دوو ورځو را په دېخوا د يو شمېر نړيوالو سازمانونو له استازو او چارواکو سره خبرې کړي چې د افغان سولې له پیل شوي بهیره ملاتړ وکړي.
ښاغلي هېواد زیاته کړه: "د بهرنیو چارو وزیر تېرو دوو ورځو کې د بېلابېلو هېوادونو د بهرنیو چارو وزیرانو، له ځانګړو استازو او د ملګرو ملتونو او متحده ایالاتونو له استازو سره خبرې وکړې او هڅه یې وکړه چې د دوی ملاتړ د دغه بهیر د بریالي کېدو لپاره ترلاسه کړي، په دې ترڅ کې د بهرنیو چارو وزیر د ترکمنستان، هندوستان، اسټرالیا، کاناډا، ناروې او اندونیزیا د بهرنیو چارو وزیرانو سره مفصلې او اغېزمنې خبرې درلودلې."
د افغانستان د بهرنیو چارو وزارت د دغه بهیر د بریالي کېدو لپاره په داسې وخت کې نړیوال ډیپلوماټیک ډیالوګ پیلوي چې دا مهال د افغان حکومت او طالبانو د سولې مرکچي پلاوي د قطر په پلازمېنه دوحه کې د خبرو د اجنډا پر سر بحثونه پیلوي.
د تېرې چهارشنبې په ورځ په مقدماتي ناسته کې دواړو خواوو پرېکړه وکړه چې د اجنډا پر سر بحثونه به د شنبې په ورځ یعنې نن شنبه پیلېږي.
د افغانستان د ملي مصالحې عالي شورا ویاند فریدون خوځون چې په دوحه کې په دغو خبرو کې ګډون لري په دې اړه ازادي راډیو ته وویل چې بحث پیل شي د دوی له لوري لومړنۍ موضوع به اوربند وي.
دی وايي: "زموږ په اجنډا کې زموږ له لوري لومړنۍ موضوع به اوربند وي، طالبان به هم خپل لومړیتوبه لري، خو د دواړو خواوو له توافق وروسته به په اساسي موضوع بحث پیلوي نن د افغاستان د اسلامي جمهوریت مرکچي پلاوي د بحثونو پیلېدو ته بشپړ چمتوالی لري."
د افغان حکومت له لوري پر اوربند ټینګار ځکه ډېر دی چې په دې وروستیو کې د پلازمېنې کابل په ګډون په بېلابېلو ولایتونو کې ماين چاودنې، هدفي وژنې او تاوتریخوالی زیات شوی. حکومت تل په دا ډول پېښو کې طالبان په لاس لرلو تورن کړي.
خو طالبانو بيا دا ادعاوې رد کړي او ویلي یې دي چې هدفي وژنې د سولې د مخالفينو کار دی.
