د لاسرسۍ وړ لېنکونه

تازه خبر
سه شنبه ۳۰ مرغومی ۱۳۹۹ کابل ۰۷:۰۶

د سولې خبرو اجنډا کې د اوربند او قربانیانو د حقونو شاملولو غوښتنه وشوه


قطر کې د سولې د بين الافغاني مذاکراتو د پرانيسغونډې انځور- 12.9.2020

د افغانستان د بشري حقونو خپلواک کمېسیون د سولې د خبرو په اجنډا کې د دایمي اوربند او د بشري حقونو د قربانیانو د حقونو د شاملولو غوښتنه وکړه.

د افغانستان د بشري حقونو خپلواک کمېسیون غوښتنه لري، چې په قطر کې دې د سولې د مذاکرو په اجنډا کې د دایمي اوربند او د بشري حقونو د مدافعانو او قربانیانو د دفاع موضوع هم شامله شي.

د دغه کمېسیون رئیسې شهرزاد اکبر پرون ناوخته ازادۍ راډیو ته وویل، دوی تېره اوونۍ په یوه لیک کې هم دا موضوع د دواړو مذاکراتي هیئتونو له مشرانو سره شریکه کړې وه.

شهرزاد اکبر
شهرزاد اکبر

هغې وویل: "لومړۍ غوښتنه دا ده چې ژر تر ژره دې پر اوربند موافقه وشي، چې نور د ملکي افغانانو د قرباني کېدو مخه ونیول شي. د دې تر څنګ دې د تاوتریخوالي پر مشخصو ډولونو بحث وشي، چې ملکیان په نښه کوي، لکه هدفي وژنې، په دې برخه کې دې دوی ګډې څېړنې وکړي. بله مو دا غوښتنه مطرح کړې، چې دواړه لوري دې د جګړې د قربانیانو غږ واوري."

د بشري حقونو خپلواک کمېسیون دا غوښتنه په داسې حال کې کوي، چې په پام کې وه په قطر کې د مذاکرو دویم پړاو نن سې شنبه تر شل ورځنۍ وقفې وروسته بیا پیل شي، خو پرون د دولت د هیئت سفر وځنډېد، چې دلیل یې ظاهراً د هوا خرابوالی ښوول شوی دی.

د دولت مذاکره کوونکي هیئت ویلي، چې دوی به د مذاکرو په پاتې پړاوونو کې پر دایمي اوربند، د نظام پر څرنګوالي او د بشري حقونو پر ارزښتونو هم بحث وکړي.

په قطر کې د طالبانو د سیاسي دفتر ویاند محمد نعیم ازادۍ راډیو ته ویلي، د بحث لپاره د مذاکرو د اجنډا موضوعات د دواړو لوریو په توافق ټاکل کېږي.

محمد نعيم
محمد نعيم

پرون په کابل کې د امریکا د متحدو ایالتونو د سفارت شارژدافیر راس وېلسن د دولت د مذاکره کوونکي هیئت له درېیو ښځینه غړو سره په کتنه کې د یوه ډیموکراتیک، ټولشموله او سوله ییز افغانستان لپاره د دوی هڅې ستایلي دي.

د بین الافغاني مذاکرو لومړی پړاو د سپټمبر پر ۱۲مه په قطر کې پیل شو، خو دواړه لوري تر درېیو میاشتو وروسته وتوانېدل د اصلي مذاکرو پر اجنډا او مقدمه موافقه وکړي.

په دې موده کې په افغانستان کې جګړې هم شدیدې شوې وې او هدفي وژنې هم زیاتې شوې.

په بېلابېلو ولایتونو کې ګڼ خبریالان، مدني فعالان او نور ملکي چارواکي ووژل شول.

د افغانستان د سولې لپاره د واشنګټن ځانګړي استازي زلمي خلیلزاد تېره شپه په یو لړ ټویټونو کې ویلي، د هدفي وژنو په ګډون د تاوتریخوالي اوسنۍ سطحه د منلو نه ده.

د ښاغلي خلیلزاد په خبره، هغه کسان چې تاوتریخوالی غزوي، غواړي د سولې بهیر او د افغانستان راتلونکی زیانمن کړي.

XS
SM
MD
LG