د ملي امنیت شورا وايي، د ۷۰۰۰ نورو طالب بندیانو خوشې کېدل به د سولې له پروسې سره مرسته ونه کړي.
د افغانستان د ملي امنیت شورا وايي، څرنګه چې د ۵۵۰۰ طالب بندیانو خوشې کېدو، د سولې پروسې له چټکتیا سره مرسته ونه کړه، د طالبانو د نورو ۷۰۰۰ بندیانو خوشې کېدل به هم د دې پروسې له بریا سره مرسته ونه کړي.
د ملي امنیت شورا ویاند، رحمت الله اندړ تېر ماښام له ازادۍ راډیو سره په خبرو کې وویل: "د بندیانو خوشې کول یا نه خوشې کول د سولې پروسې پر چټکتیا خاص تاثیر نه لري، دا تېر ۵۵۰۰ بندیان چې د حکومت له خوا خوشې شول، نه یوازې یې د سولې پروسې پر چټکتیا اغېز ونه کړ، بلکې حکومت لا هم د عامو خلکو تر اعتراض لاندې راغی، لا هم اعتراض کوي، چې له طالب بندیانو د تاوتریخوالي نه کولو ژمنه اخیستل شوې وه، خو دوی تاوتریخوالی کم نه کړ."
تېره یکشنبه په کابل کې د امریکا د متحدو ایالتونو د سفارت شارژدافېیر راس وېلسن په یوه انلاین کنفرانس کې ویلي وو، طالبان غوښتنه لري، چې ۷۰۰۰ نور بندیان یې خوشې شي.
د نورو طالب بندیانو پر خوشې کېدو تېره شنبه په قطر کې د طالبانو د سیاسي دفتر مشرانو د افغانستان د سولې لپاره د واشنګټن له ځانګړي استازي زلمي خلیلزاد سره هم خبرې وکړې، خو د دغو خبرو زیات جزییات نه دي خپاره شوي.
په قطر کې د طالبانو د سیاسي دفتر ویاند محمد نعیم وايي، دوی د امریکا او طالبانو ترمنځ د لاسلیک شوې موافقې له مخې د خپلو پاتې بندیانو خوشې کېدل غواړي.
د هغې موافقې له مخې چې د فبرورۍ پر ۲۹مه په دوحه کې د واشنګټن او طالبانو ترمنځ لاسلیک شوه، طالبانو د خپلو ۵۰۰۰ بندیانو د خوشې کېدو په بدل کې بین الافغاني مذکرو ته چمتووالی ښوولی.
د هغې موافقې له مخې طالبانو په لویو ښارونو کې د لویو حملو د نه کولو ژمنه هم کړې وه.
تر اوسه نه یوازې دا چې د افغانانو ترمنځ اصلي مذاکرې پیل شوې نه دي، بلکې د سپټمبر له ۱۲مې د دولت او طالبانو د مذاکره کوونکو ترمنځ خبرې ټکنۍ روانې دي.
تېره چهارشنبه د دولت او طالبانو مذاکره کوونکو اعلان وکړ، چې دوی د اصلي مذاکرو پر کړنلار او مقدمه موافقه وکړه او اوس د اصلي مذاکرو پر اجنډا او موضوعاتو بحث کوي.
طالبانو په دوحه کې د موافقې له مخې په افغانستان کې خپل تاوتریخوالی کم کړی هم نه دی، چې پر دې مسئلې د امریکا، افغان حکومت او نورو هېوادونو په ګډون ځینو سازمانونو انتقاد کړی دی.
خو طالبانو په وار- وار د تاوتریخوالي د زیاتېدو او د ملکي مرګ ژوبلې عاملان افغان امنیتي ځواکونه بللي دي.
