د افغانستان جمهوري ریاست، په هېواد کې د تاوتریخوالي او د افغان وژنې د دوام مسئول وسله وال طالبان وبلل.
د افغانستان حکومت وايي، په قطر کې د طالبانو او واشنګټن له تړون سره- سره په افغانستان کې تاوتریخوالی کم شوی نه دی.
د افغانستان جمهوري ریاست په هېواد کې د روانو جګړو مسئولیت پر وسلوالو طالبانو اړوي.
تر دې مخکې د افغانستان د سولې لپاره د واشنګټن ځانګړي استازي په افغانستان کې د تاوتریخوالي پر کمولو ټینګار وکړ.
زلمي خلیلزاد پرون د قاصد ستراتیژیکو څېړنو د مرکز د مشر او د سولې د فعال پوهنوال عبدالباقي امین د وژنې په تړاو په یوه ټویټ کې ویلي: "د ډاکټر امین یاد ته سم درناوی دا دی چې ټول اړخونه تاوتریخوالی کم او بین الافغاني مذاکرې پیل کړي."
عبدالباقي امین د چهارشنبې په ورځ د کابل په کمپنۍ سیمه کې د هغه په موټر پورې د یوه نښلول شوي ماین په چاودنه کې ووژل شو.
که ښاغلی خلیلزاد د تاوتریخوالي د کمولو غوښتنه کوي، جمهوري ریاست په افغانستان کې د تاوتریخوالي او د افغانانو د وژنې د دوام مسوول وسلوال طالبان بولي.
د جمهوري ریاست مرستیال ویاند دوا خان مینه پال پرون جمعه ازادۍ راډیو ته وویل: "له هغې موافقې وروسته چې د امریکا د متحدو ایالتونو او طالبانو ترمنځ لاسلیک شوه، د افغانستان حکومت کافي اقدامات کړي دي، تاسو ولیدل چې د افغانستان حکومت اوربند او اورکم کاملاً رعایت کړ خو دا طالبان دي چې لا یې تاوتریخوالي ته دوام ورکړی دی او لا یې هم له افغانوژنې لاس نه دی اخیستی."
ذبیح الله مجاهد، چې ځان د وسله والو طالبانو ویاند معرفي کوي پرون جمعه ازادۍ راډیو ته په یوه لیکلي پیغام کې وویل: "د جګړې د دوام او شدت مسئول هغه څوک دي چې د مذاکراتو او سیاسي حل مخه ډب کوي او هره ورځ په موانع ایجادولو پسې ګرځي."
وسله والو طالبانو او د امریکا متحدو ایالتونو د فبرورۍ پر ۲۹مه، په قطر کې په خپلو کې موافقه لاسلیک کړه، چې د نورو موضوعاتو تر څنګ طالبانو په کې په افغانستان کې د تاوتریخوالي کمولو ژمنه کړې وه.
خو د ملي امنیت شورا ویلي، چې د موافقې تر لاسلیک ۵ میاشتې وروسته هم د تاوتریخوالي اندازه کمه شوې نه ده.
د افغانستان د بشري حقونو خپلواک کمېسیون ویلي، د روان میلادي کال په لومړیو شپږو میاشتو کې په افغانستان کې د تاوتریخوالي تر ۸۸۰ زیاتو پېښو کې له ۱۲۰۰ زیات ملکیان وژل شوي او تر ۱۷۰۰ زیات نور ټپیان شوي دي.
