د افغانستان د ولسي جرګې اداري پلاوی وايي، ټول د اوربند د تمدید غوښتونکي دي او حکومت او د سولې عالي شورا باید د دې مسئلې لپاره یوه سمه کړنلاره جوړه کړي.
د افغانستان د ولسي جرګې اداري پلاوی وايي، یوازې په غوښتنو اوربند نهشي تمدید کېدای، بلکې د دغې مسئلې لپاره باید عملي او حساب شوی پروګرام طرحه شي.
د ولسي جرګې دوهم منشي عرفانالله عرفان وايي، حکومت او د سولې عالي شورا باید پهدې برخه کې ځانګړې تګلاره رامنځته کړي او سیاسیون هم لازمې هڅې وکړي.
ښاغلي عرفان د پنجشنبې په ورځ «۱۳۹۷ کال د غبرګولي ۲۴» ازادي راډیو ته وویل چې رامنځته شوی فرصت باید له لاسه ورنهکړل شي او د طالبانو له با صلاحیته کسانو سره دې اړیکې ټینګې شي.
هغه زیاته کړه:
"باید پر یوې داسې کړنلارې تمرکز وشي چې وکړای شي په افغانستان کې دایمي سولې او ثبات ته لاره هواره کړي، افغان حکومت او د سولې عالي شورا پهداسې حال کې چې د طالبانو له لوري شین څراغ ورکړل شوی، باید د سولې په خبرو کې ښکېل شي او د طالبانو له با صلاحیته کسانو سره اړیکې ونیسي، څو دایمي اوربند ته ورسېږو."
دا څرګندونې پهداسې حال کې مطرح کېږي چې افغان حکومت او طالبانو د یو بل په مقابل کې مؤقت اوربند اعلان کړی دی.
دغه څو ورځنی اوربند د خلکو، د سولې عالي شورا، سیاسي ګوندونو، ملي شورا او د ځینو هېوادونو له هرکلي سره مخ شوی دی.
د دغه اوربند له اعلان سره هممهاله داسې غوښتنې هم مطرح شوي چې د اوربند موده باید وغځول شي.
دیني عالم نجیبالله زاهد وايي چې سوله الهي حکم دی او په هېواد کې یې د ټینګېدو لپاره باید په جګړه کې ښکېلې خواوې اوربند تمدید کړي.
دی وايي:
"په هماغه ډول چې روژه الهي حکم دی او ادا مو کړه، سوله هم الهي فریضه ده، زموږ هیله دا ده چې علماء، طالبان، حکومت او ملت دا درک کړي چې سولې ته اړتیا لرو او تر هغې چې دغه الهي حکم عملي نهکړو، په افغانستان کې به جګړه دوام کوي او دغه جګړه بهرنۍ ده."
افغان حکومت او نړیوالې ټولنې تل دا ویلي چې په افغانستان کې د جګړې د پای ته رسېدو لپاره تر ټولو ښه لاره سیاسي روغه جوړه ده، خو طالبانو بیا له هېواده د بهرنیانو پر وتلو ټینګار کړی دی.
افغان چارواکو له طالبانو سره د مؤقت اوربند اعلان نېک ګام بللی او هیلهیې ښودلې چې دغه اقدام د افغان حکومت او طالبانو ترمنځ د سولې خبرو ته زمینه برابره کړي.
په همدې حال کې د سولې عالي شورا مرستیال عزیزالله دین محمد بیا وايي چې د اوربند تمدید جدي او هر اړخیزو هڅو ته اړتیا لري.
دی وايي:
"دا لومړنی ګام و، د دوام لپارهیې نهیوازې د سولې عالي شورا، بلکې باید ټول په ګډه کار وکړي، ځکه دا د ټول ملت غوښتنه ده، په عین حال کې پر طالبانو هم عمومي فشار دی او زه باوري یم چې طالبان مجبوره کېږي او دا به درک کړي چې جګړه نوره د حللاره نهده."
د افغان حکومت او طالبانو ترمنځ مؤقت اوربند پهداسې حال کې اعلان شوی چې په وروستیو کې په هېواد کې سوله غوښتونکي حرکتونه زیات شوي دي.
له ډلې یې په ځینو ولایتونو کې د پرلت خیمې او له لښکرګاه څخه کابل ته د پلي ځوانانو راتګ یادولی شو.
اوس به ولیدل شي چې طالبان د اوربند د تمدید په اړه د خلکو غوښتنو ته مثبت ځواب وايي او که منفي؟
