د افغانستان دفاع وزارت وايي چې د حکومت له لوري د اوربند له پیل سره سم د امنیتي ځواکونو پر ضد د وسلهوالو طالبانو فعالیتونه کم شوي دي.
دفاع وزارت تأييدوي چې له تېرې ورځې را پهدېخوا د افغان امنیتي ځواکونو پر وړاندې د وسلهوالو طالبانو په فعالیتونو کې ۷۰ په ۱۰۰ کې کموالی راغلی دی.
د دې وزارت د ویاند دفتر سرپرست محمد رادمنش د چهارشنبې په ورځ «۱۳۹۷ کال د غبرګولي ۲۳» ازادي راډيو ته وویل چې له تېرې ورځې راهیسې افغان امنیتي او دفاعي ځواکونه په دفاعي حالت کې دي او د وسلهوالو طالبانو پر ضد هر ډول عملیات درول شوي دي.
خو ښاغلي رادمنش وویل چې د ننګرهار په ولایت کې د داعش یا اسلامي دولت نومې وسلهواله ډله د افغان امنیتي ځواکونو تر سختو حملو لاندې ده.
دی وايي:
"وضعیت الحمدالله یو څه ارام دی او د طالبانو په فعالیتونو کې ۷۰ په ۱۰۰ کې کموالی راغلی دی، خو په یو شمېر مواردو کې له غیر مسؤله وسلهوالو ګروپونو سره مخ کېږو، خو موږ ته چې کومه دنده راکړل شوې په ډېر جدیت ترې دفاع کوو."
د حکومت له لوري اعلان شوی اوربند تېره ورځ پیل شو او د کوچني اختر تر پنځمې به دوام وکړي.
افغان ولسمشر محمد اشرف غني افغان امنیتي ځواکونو ته دستور ورکړی چې پهدې موده کې باید د وسلهوالو طالبانو پر ضد هېڅ ډول عملیات ونهکړي، خو که په دوی حمله وشوه، باید په جدیت دفاع وکړي.
همدا شان افغان امنیتي ځواکونه اړ دي چې د اوربند په ورځو کې د داعش او نورو ترورېستي شبکو پر ضد خپلو عملیاتو ته زور ورکړي.
بلخوا د افغانستان د کورنیو چارو وزارت ویاند نجیب دانش د چهارشنبې په ورځ «۱۳۹۷ کال د غبرګولي ۲۳» په کابل کې خبریالانو ته وویل چې په ځینو سیمو کې په افغان امنیتي ځواکونو بریدونه شوي دي.
خو نوموړی وايي، دا لا نهده معلومه چې دغه بریدونه د کومې ډلې لهخوا په امنیتي ځواکونو شوي دي.
ښاغلي دانش زیاته کړه:
"له پرون راهیسې په غزني، سرپل، فاریاب او هلمند کې د وسلهوالو مخالفینو لهخوا تحرکات وجود لري، خو دا به له وخته وړاندې وي چې ووایو دا بریدونه طالبانو کړي، مقابل لوري ته درانه تلفات اوښتي او له بدهمرغه په ۱۴ مواردو کې شااوخوا ۲۰ تنه امنیتي ځواکونه هم شهیدان شوي دي."
طالبانو هم د حکومت د اوربند لنډ مهالې غوښتنې ته مثبت ځواب ویلی او د اختر په درېیو ورځو کې یې اوربند اعلان کړی دی.
د حکومت او طالبانو لهخوا د لنډ مهال لپاره د اوربند اعلانول ډېرې هیلې راټوکولي او پراخ هرکلی یې شوی.
عام خلک، د سولې عالي شورا، سیاسي ګوندونه او ملي شورا غواړي چې دغه اوربند وغځېږي او د سولې خبرو اترو ته دې زمینه برابره شي، څو نور د جګړې او وینې تویېدنې مخه ونیول شي.
راپور: اکرامالله اکرام
