د افغان حکومت اجرائیه رئیس عبدالله عبدالله وايي، د سولې د وړاندیز سره ـ سره بیا هم د طالبانو له لوري د جنګ دوام نورو تروریستي ډلو ته د افغان وژنې موقع په لاس ورکړې ده.
ښاغلي عبدالله د چهارشنبې په ورځ د مطبوعاتو د نړیوالې ورځې په مناسبت کابل کې جوړې شوې غونډې ته وویل چې د بیان ازادي د خلکو حق دی او هېڅوک دغه حق ترې نهشي اخېستلای.
نوموړی وايي:
"موږ ټول باید دا ومنو چې ولس ته ملامت یو، هغه څه چې د مصؤنیت په کمېټه کې یې وعده شوې، د عملي کېدو په اړه یې زه ډاډ درکوم. موږ د خبریالانو او رسنیو د قربانیو او سرښندونو قدرداني کوو چې د ستونزو با وجود بیا هم له خپل سنګره نهدي په شا شوي."
د مې د میاشتې ۳مه نېټه هر کال په نړۍ کې د مطبوعاتو د نړیوالې ورځې په مناسبت لمانځل کېږي.
دغه ورځ په افغانستان کې په داسې حال کې لمانځل کېږي چې دوه ورځې وړاندې د روانې اوونۍ د دوشنبې په ورځ په کابل کې د دوو حملو په نتیجه کې د ۹ خبریالانو په ګډون ۲۹ تنه ووژل شول او له ۵۰ زیات ټپیان شول.
په وژل شوېو کې د ازادي راډیو درې همکاران سباوون کاکړ، عبادالله حنانزی او فرشته محرم درانۍ هم شامل وو.
په همدې ورځ په خوست ولایت کې د بي بي سي راډیو ولایتي خبریال احمد شاه او له دې نېږدې یوه اوونۍ وړاندې په کندهار کې د کابل نیوز خبریال عبدالمنان ارغند د نامعلومو وسلهوالو په ډزو ووژل شول.
که څه هم حکومت د خبریالانو د خوندیتوب په برخه کې د ځانګړو اقداماتو خبره کوي، خو د افغانستان د خبریالانو د خوندیتوب د کمېټې غړی صدیق الله توحیدي وايي چې نور خبریالان د حکومت په ژمنو بې باوره شوي دي.
ښاغلي توحیدي د مطبوعاتې د نړیوالې په مناسبت جوړې شوې غونډې ته وویل چې حکومت د امنیت ور اخوا د بې وزله خبریالانو په لاسنیوي کې هم پاتې راغلی.
نوموړی وايي:
"دا چې موږ د مطبوعاتو په نړیواله ورځ کې د امنیتي ځواکونو د ضعف او د هغو خبریالانو چې شهیدان شوي او کورنۍ یې په بې وزله حالت کې ژوند کوي، د لاسنیوي په اړه خبرې کوو له بدهمرغه د خوښۍ او لمانځلو لپاره هېڅ نهدي پاتې."
یادې غونډې ته د افغان ولسمشر محمد اشرف په پیغام کې د خبریالانو وژنه بشري جنایت بلل شوې و او ټینګار شوی و چې ترورېستان نهشي کولای په دا ډول بریدونو د ولس غږ چوپ کړي.
راپور: محمد حدیث پردېس
