د لاسرسۍ وړ لېنکونه

تازه خبر
شنبه ۹ زمری ۱۴۰۰ کابل ۱۱:۱۱

افغانستان

افغان ولسمشر په کابل کې پر خبریالانو برید د بیان پر ازادۍ برید وباله

افغان ولسمشر په کابل کې پرخبریالانو پرونی برید د بیان پرازادۍ برید او د بشریت ضد جنایت وباله او ویې ویل چې عاملان به یې د قانون او عدالت منګولو ته وسپارل شي.

اشرف غنې نن سې شنبه د ملي امنیت د شورا په غونډه کې چې د افغانستان د امنیتي وضعیت په تېره بیا د کابل د تېرې ورځې د برید په اړه چې د ازادي راډیو د درې خبریالانو په ګډون نهه خبریالان پکې ووژل شول، مسئلې ته ځانګړې شوې وه، د امنیتي او دفاعي ارګانونو مسؤلینو د کابل د حملې د څرنګوالي په اړه خپل راپور وړاندې کړ.

د ارګ له خوا په خپاره شوي بیان کې ویل شوي چې ولسمشر د بیان ازادي او د ازادو رسنیو فعالیت د حکومت لپاره ځانګړی اهمیت لرونکی وباله او مسؤلو چارواکو ته یې سپارښتنه وکړه چې د دغې پېښې د څرنګوالي او امنیتي خلاوو په اړه څېړنه وکړي او جزیات یې له رسنیو او خلکو سره شریک کړي.

په عین حال کې د افغانستان د ازادو رسنیو د ملاتړ اداره یا نی له حکومته وغوښتل چې په کابل کې پرخبریالانو د تېرې ورځې د برید په غندنو دې بسنه نه کوي، بلکې دا پېښه دې په هر اړخیز ډول وڅېړي او عاملان دې د قانون منګولو ته وسپاري.

د ورځې تازه خبرونه دلته ولولئ

جلال اباد کې نامعلومو وسله والو ۳ تنه وژلي

د جلال اباد ښار عمومي منظره.

په تېرو شااوخوا ۴۰ ساعتونو کې په جلال اباد ښار کې درې تنه د نامعلومو وسله والو له خوا په ډزو وژل شوي او دوه تنه ټپیان شوي دي.

نن هم د جلال اباد په کهنه فروشۍ سیمه کې په ډزو یو تن ووژل شول او دوه لارویان ټپیان شول.

د والي ویاند عطا الله خوګیاڼي په دې اړه زیات جزییات نه دي ورکړي، خو ویلي یې دي چې وژل شوی کس امنیتي او ټپیان شوي کسان ملکیان دي چې عاملان یې تښتېدلي خو د نیولو هڅې یې روانې دي.

همداشان تېره او وړمه ورځ هم د جلال اباد ښار په دوو جلا پېښو کې دوه تنه چې یو یې انجینر و، د نامعلومو کسانو له خوا په ډزو وژل شوي دي.

د دې پېښو په تړاو بیا له هڅو سره-سره ځایي چارواکو او امنیتي مسؤلانو معلومات نه دي شریک کړي او نه یې هم په تړاو څوک نیول شوي دي.

د دې پېښو مسؤلیت هم تر دې دمه چا نه دی منلی.

۲۰۹ شاهین قول اردو: بلخ کې ۱۵ طالبان وژل شوي

ارشیف، عکس تزئیني بڼه لري

په بلخ ولایت کې ۲۰۹ شاهین قول اردو په هوايي حملو کې د ۱۵ وسله والو طالبانو د وژل کېدو خبر ورکړ.

د دې قول اردو ویاند حنیف رضايي، نن شنبه (د زمري ۹مه) ازادي راډیو ته وویل، دغه حملې نن په چمتال ولسوالۍ کې شوي دي: "پنځلس تروریست طالبان وژل شوي، ۱۱ عرادې موټرسایکلونه او اووه بېلابېل ډوله وسلې او قرارګاه یې کاملاً له منځه وړل شوي دي."

وسله والو طالبانو په دې اړه څه نه دي ویلي.

راپورونه وايي، د چمتال په ګډون د بلخ ولایت اته ولسوالۍ دا مهال د وسله والو طالبانو په کنټرول کې دي.

د نورستان والي وايي، سېلابونو کې د مړو شمېر ۱۱۳ ته زیات شوی

نورستان کې راوتلي سیلابونه

د نورستان والي وايي، په وروستیو سېلابونو کې د مړو شمېر ۱۱۳ ته زیات شوی دی.

حافظ عبدالقیوم نن ازادي راډیو ته وویل، دغو سېلابونو په کامدېش ولسوالۍ کې د سر او مال درانه زیانونه اړولي: "اخري ګزارش کې ۱۱۳ کسان شهیدان شوي،۱۷ ټپیان دي،۱۷۳ کورونه مکمل ویجاړ شوي،۱۲ کیلو متره سرک هم بشپړ تخریب شوی دی،۱۱۰۰ جریبه ځمکه ۱۷ ژرندې ویجاړې شوي دي."

د نورستان والي وایي، په سېلابونو کې د برښنا د تولید فابرېکې او نورې ټولګټې پروژې هم ویجاړې شوي دي.

تر دې مخکې په سېلابونو کې د مړینو شمېر ضد و نقیض ښوول شوی و.

د تخار چارواکي: د تالقان اړوند شااوخوا ۲۰ کلي له طالبانو پاک شوي

تخار کې امینتي ځواکونه

د تخار ولایت امنیه قومانداني وايي، د مرکز تالقان اړوند شااوخوا ۲۰ کلي له وسله والو طالبانو تصفیه شوي او حملې یې په شا تمبول شوي دي.

د امنیې قوماندانۍ ویاند خلیل اسیر وویل، د امنیتي ځواکونو په پرونیو عملیاتو کې چې ولسي پاڅونوالو یې هم مرسته کوله، د تالقان شااوخوا ۲۰ کلي له وسله والو تصفیه شوي دي.

ښاغلی اسیر وايي، وسله والو طالبانو تېره شپه هم د تالقان پر ځینو حوزو او سیمو حملې پلان کړې وې چې شنډې کړای شوي دي، خو وسله والو طالبانو دا موضوع رد کړې ده.

په وسله والو نښتو کې د یوه پاڅونوال د وژل کېدو او درېیو نورو د ټپي کېدو خبر ورکړل شوی دی.

جرمني کې لسګونه افغانانو د پاکستان قونسلګرۍ مخې ته لاریون کړی

فرانکفورت کې راوتلی لاریون

د جرمني په فرانکفورت ښار کې پرون ناوخته په لسګونو افغانانو د پاکستان د قونسلګرۍ مخې ته لاریون وکړ.

د لاریون یوه تنظیموونکي خالد یوسفي، د دې حرکت د موخې په اړه ازادي راډیو ته وویل: "لومړۍ موخه مو دا وه چې د افغانستان له ملي اردو او جمهوري نظامه خپل ملاتړ څرګند کړو. دویمه موخه مو دا وه چې د پاکستان لاسوهنه او دوه مخیتوب وغندو او خلکو ته یې ښکاره کړو."

پاکستان تردې مخکې د طالبانو د ملاتړ تورونه رد کړي او ویلي یې دي، د افغانستان جګړې اسلام اباد هم اغېزمن کړی دی.

بل خوا ټاکل شوې سبا یکشنبه (د زمري پر لسمه) د فرانسې په پلازمېنه پاریس کې هم په لسګونو افغانان د ایفل ټاور مخې ته لاریون وکړي.

په دغو لاریونونو کې برخوالو وسله وال طالبان تورن کړي چې د پاکستان په همکارۍ یې په افغانستان کې خپلې جګړې شدیدې کړي دي.

تر دې مخکې د کابل تر څنګ د امریکا د متحدو ایالاتونو په څو ښارونو، بلجیم، بریتانیا او نورو هېوادونو کې هم ورته لاریونونه شوي دي.

چارواکي: په لوګر کې د هندواڼو حاصلات لس سلنه زیات شوي

ارشیف،عکس تزئیني بڼه لري

د افغانستان د کرنې، اوبو لګولو او مالدارۍ وزارت وايي، روان کال په لوګر ولایت کې د هندواڼو حاصلات لس سلنه زیات شوي دي.

د دغه وزارت ویاند اکبر رستمي ازادي راډيو ته وویل چې روان کال دغه ولایت کې په ۳۵۷ هکتاره ځمکه کې هندواڼې کرل شوي چې ۱۵ زره ۶۱۸ مټریک ټنه هندواڼې حاصل یې ورکړی.

‎د نوموړي په وینا د لوګر هندواڼې د کابل په ګډون د ګاونډیو ولایتونو په بازارونو کې ښه پلور لري چې د یو من هندواڼو بیه تر ۱۷۰ افغانیو پورې رسېږي.

ښاغلي رستمي ونه ویل چې تېر کال په یاد ولایت کې د هندواڼو کرنیز حاصلات څومره و؟

د وزارت د معلوماتو له مخې په لوګر ولایت کې زیاتره بزګرانو د هندواڼو کرکیلې ته مخه کړې او په کښت کې له نویو میتوډونو کار اخلي.

سوداګرۍ وزارت: د چین په نندارتونونو کې افغاني توکو ښه بازار درلود

په چین کې یو نندارتون

د افغانستان د صنعت او سوداګرۍ وزارت وايي، د چین په نندارتونونو کې افغاني صنعتي توکو ښه پلور او بازار درلود.

د دغه وزارت ویاند فواد احمدي د دغو ننداتونونو په اړه نن شنبه (د زمري په ۹مه) ازادي راډيو ته وویل، یو د لانژو نړیوال سوداګریز نندارتون و چې د دغه هېواد په ګانسو ولایت کې د جولای په اتمه جوړ شوی و او څلور ورځې یې دوام وکړ.

د نوموړي په وینا بل نندارتون د ورېښمو لار سیاحتي نندارتون و چې په شانشي ولایت کې د جولای په ۱۶مه جوړ شوی و چې دوه ورځې یې دوام وکړ.

د ښاغلي احمدي په وینا دغو نندارتونونو کې په شپږو غرفو کې افغاني غالۍ، زعفران، ګاڼې او لاسي صنایع نندارې ته اېښودل شوي وو.

د نوموړي په خبره په یادو نندارتونونو کې ګډون کوونکو افغاني شرکتونو خپل ډېری محصولات وپلورل او چینایي پانګه والو او سوداګریزو شرکتونو سره یې بېلابېل سوداګریزو تړونونه هم لاسلیک کړل.

د کابل- جلال اباد پر لویه لار ترافیکې پېښې ۲۰ تنه وژلي

د عزیزخان کڅ پېښه

د کابل- جلال اباد پر لویه لاره د موټرو د ټکر په دوو جلا پېښو کې ۲۰ تنه مړه او ۱۸ نور ټپیان شوي دي.

د لغمان د والي ویاند اسدالله دولتزي نن شنبه (د زمري ۹مه) رسنیو ته وویل چې دغه ټکرونه په قرغیو ولسوالۍ کې شوي: "تېره شپه ناوخته د کابل- جلال اباد پر لویه لار د قرغیو ولسوالۍ اړوند په نارنج باغ سیمه کې د یوې سراچې او کاسټر موټرو د ټکر له امله ۸ تنه شهیدان شوي او ۱۰ ټپیان دي. دغه راز نن سهار د قرغیو ولسوالۍ په عزیز خان کڅ سیمه کې د یوې ټوډي او دوو سراچه ډوله موټرو په ټکر کې ۱۲ تنه شهیدان او ۸ کسان سخت ټپیان شوي دي."

د والي ویاند وايي په دغو پېښو کې ټپي شوي کسان روغتون ته انتقال شوي دي.

امریکا، ناټو او ملګرو ملتونو هرات کې د یوناما پر دفتر برید وغانده

د افغانستان او د ملګرو ملتونو ګډ بیرغونه

د امریکا متحد ایالاتونو، ناټو او ملګرو ملتونو په هرات کې د یوناما پر دفتر برید په سختو ټکو وغانده.

د هرات ښار په شااوخوا سیمو کې پرون جمعه (د زمري ۸مه) د طالبانو او دولتي ځواکونو ترمنځ درنې نښتې وشوې.

یوناما په یوه بیان کې چې تېر ماښام خپور شو ویلي چې په دې برید کې د دوی د دفتر یو پولیس وژل شوی او یو شمېر نور پولیس افسران ټپیان شوي دي، خو د ملګرو ملتونو کار کوونکو ته زیان نه دی اوښتی.

یوناما وايي، د دولت ضد وسله والو مخالفینو د ملګرو ملتونو د دفتر دروازه په داسې حال کې په توغندي او مرمیو په نښه کړې ده چې د ملګرو ملتونو نښې او علامې په روښانه ډول پرې ښکاري.

د یوناما په بیان کې یادونه شوې چې د ملګرو ملتونو پر دفتر او ملکي کار کوونکو برید د نړیوال قانون پر اساس منع دی او کېدای شي چې جنګي جرم وبلل شي.

یوناما غوښتنه کړې چې د دې برید ترسره کوونکي باید وپېژندل شي او حساب کتاب ورسره وشي.

د طالبانو ویاند ذبیح الله مجاهد په ټویټر کې لیکلي دي چې د یوناما دفتر د جګړې سیمې ته نژدې دی چې ښایي د جګړې پر مهال یې ساتونکو ته زیان رسیدلی وي، خو سیمې ته د طالبانو له رسېدو سره دا دفتر خوندي شو.

د غزني چارواکي: د ښار ساتنې په موخه ګارنېزیون جوړ شو

د غزني ښار لپاره جوړ شوی ګارنیزیون

د غزني سیمه ییز چارواکي وايي، د ګډو افغان ځواکونو له ترکیبه یې یو ځانګړی او مجهز ګارنېزیون جوړ کړی، څو د دغه ولایت د مرکز غزني ساتنه وکړي.

والي محمد داوود وايي، په دغه ګارنېزیون کې ۱۲۰ تنه د پولیسو، ملي امنیت او ملي اردو سرتېري شامل دي چې په پرمختللو وسلو سمبال دي.

نوموړی زیاتوي، دغه ګارنېزیون د ښار ټولو برخو او کمربندونو کې د منظمو ګزمو او وسله والو د ځپلو ترڅنګ د غیر مسوول وسله والو، تورو ښیښو موټرو او بې اسناده وسلو په راټولولو او د جنایي ډلو په ځپلو کې له بشپړ صلاحیته برخمن دي.

والي زیاتوي: "د امنیت د ټېنګښت لپاره ۱۲۰ تنه ګارنېزیون تشکیل شوی دی، نن یې عملاً په کار پیل وکړ، دا ګارنېزیون به د امنیه قوماندانۍ د محترم قوماندان صاحب تر امر لاندې ورسره د ملي امنیت او ملي اردو ګډ قطعات د ښار په بېلابېلو ځایونو کې عملیات کوي."

والي محمد داوود وايي، دغه ګارنېزیون یې د ولسمشر محمد اشرف غني په لارښوونه جوړ کړی دی.

د غزني امنیه قوماندان پاسوال فضل احمد شېرزاد چې د دغه ګارنېزیون مشري پر غاړه لري وايي، دغه ګارنېزیون به ۲۴ ساعته د تیارسئ په حالت کې وي او چیرته چې وغواړي عملیات کولای شي: "دوی به ۲۴ ساعته چمتووالی لري، د ښار په هرځای کې چې پېښه کېږي، دوی به ځان رسوي او دښمن ته به غاښ ماتوونکی ځواب ورکوي."

د غزني د ولایتي شورا غړي بیا د دغه ګارنیزیون جوړول ستايي خو وايي، د دغه ولایت د مرکز د ژغورنې لپاره باید نور تدابیر هم ونیول شي، که نه ستونزې به رامنځته شي.

د یادې شورا مرستیال مشر امان الله کامراني وایي: "د غزني جغرافیې ته په کتو ۱۲۰ تنه هېڅ شی نه دي، دا یې هم یو نېک ګام اخیستی، خو بیا هم زموږ غوښتنه له دوی دا ده چې زیات شمېر کسان برابر کړي چې د غزني له خلکو او د غزني له مرکزه دفاع وکړي، ځکه اوس خطونه ډېر رانږدې شوي دي، په یو کیلومټرۍ کې د ولایت کې دي، نو زما په نظر دغه کسان بسنه نه کوي."

دغه ګارنېزیون په غزني کې په داسې حال کې جوړیږي چې له تیرې یوې میاشتې د غزني مرکز امنیتي کړۍ راتنګه شوې ده، وسله وال طالبان د ښار څنډو ته رسېدلي او ډېری وخت امنیتي ځواکونه له دغه وسله والو سره په جګړو بوخت وي.

یوناما په هرات ښار کې پر خپل دفتر برید غندلی

ارشیف

په افغانستان کې د ملګرو ملتونو مرستندوی ماموریت په هرات ښار کې پر خپل دفتر برید غندلی دی.

د هرات ښار په شااوخوا سیمو کې پرون جمعه(د زمري ۸مه) د طالبانو او دولتي ځواکونو ترمنځ درنې نښتې وشوې.

یوناما په یوه بیان کې چې تېر ماښام خپور شو ویلي چې په دې برید کې یو پولیس وژل شوی او یو شمېر نور پولیس افسران ټپیان شوي دي، خو د ملګرو ملتونو کار کوونکو ته زیان نه دی اوښتی.

یوناما وايي، د دولت ضد وسله والو مخالفینو د ملګرو ملتونو د دفتر دروازه په داسې حال کې په توغندي او مرمیو په نښه کړې ده چې د ملګروملتونو نښې او علامې په روښانه ډول پرې ښکاري.

د یوناما په بیان کې یادونه شوې چې د ملګرو ملتونو پر دفتر او ملکي کار کوونکو برید د نړیوال قانون پر اساس منع دی او کېدای شي چې جنګي جرم وبلل شي.

یوناما غوښتنه کړې چې د دې برید ترسره کوونکي باید وپېژندل شي او حساب کتاب ته راکاږل شي.

چارواکي: د خوست صبریو او یعقوبیو کې ۲ ملکیان وژل شوي او ۳۰ ټپیان دي

ارشیف، د خوست روغتون

تندر قول اردو د خوست ولایت په یعقوبیو ولسوالۍ کې د ملي بیرغ د نمانځنې پر مراسمو د حملې په ترڅ کې د دوو ملکي وګړو د وژل کېدو او د لسګونه نورو د ټپي کېدو خبر ورکوي.

د ۲۰۳ تندر قول اردو د مطبوعاتي څانګې مسوول اېمل خان مومند رسنیو ته په یوه استولي غږیز پیغام کې ویلي دي چې پر دې مراسمو پرون جمعه (د زمري ۸مه) مازېګر د افغان ځواکونو په یوه اډه کې برید وشو.

مومند زیاته کړه: "د دفاعي امنیتي ځواکونو بېز ته څېرمه، د ملکي وګړو پر هغو مراسمو چې د ملي بیرغ د نمانځڼې په موخه جوړ شوی وو، د وسله والو طالبانو له خوا برید شوی، دوه ملکي وګړي په شهادت رسېدلي او له دېرشو زیات نور ملکیان ټپیان شوي."

د یعقوبیو ولسوال اکبر ځدراڼ او نورو سیمه ییزو چارواکو هم د ازادي راډیو له خبریال سره په خبرو کې دا حمله تایید کړې او ویلي یې دي چې په ټپیانو کې د ملي اردو دوه سرتېري هم شامل دي.

طالبانو تراوسه په دې اړه څه نه دي ویلي.

بلخ چارواکي: مزارشریف کې ماین چاودنې ۵ تنه ټپیان کړل

ارشیف، بلخ کې د یوې چاودنې عکس

د بلخ ولایت امنیتي چارواکي وايي چې په مرکز مزارشریف کې د یوه ماین چاودنې پنځه کسان ټپیان کړي دي.

د بلخ د امنیه قوماندانۍ ویاند عادل شاه عادل ازادي راډیو ته وویل چې چاودنه د کارته زراعت سیمې د تېلو په ټانک کې شوې ده.

ښاغلي عادل زیاته کړه چې په پنځو ټپیانو کې د یوه تښتول شوي ماشوم عبدالرووف د پلار محمدنبي څلور تنه ساتونکي او یو ټیکسي چلوونکی هم شامل دی: "تراوسه د دې چاودنې علت او عوامل نه دي روښانه شوي، خو په غالب ګومان، ښايي د اختطاف شوي عبدالرووف له پلار حاجي نبي سره د شخصي دښمنۍ پر اساس د برمته نیوونکو یا د هغه د مخالفانو کار وي."

ښاغلی نبي هم د خپل زوی برمته نیوونکي په دې برید تورنوي.

د محمدنبي پر موټر تېره اوونۍ هم د ماین یوه چاودنه وشوه چې په نتیجه کې یې درې کسان مړه او شپږ نور ټپیان شول.

عبدالرووف له شااوخوا لسو میاشتو راهیسې د انسان تښتوونکو له خوا برمته شوی او د هغه د ژغورنې لپاره هڅو نتیجه نه ده ورکړې.

نی: طالبانو د ارزګان 'دهراوود غږ' راډیو وسایل لوټ کړي او ودانۍ یې ورنړولې

ارشیف

د ازادو رسنیو د ملاتړ اداره، نی وايي، وسله‌والو طالبانو د ارزګان د دهراوود له نیولو وروسته په دې ولسوالۍ کې د دهراوود غږ راډیو وسایل لوټ کړي او ودانۍ یې ورنړولې ده.

د ارزګان د والي ویاند احمد شاه ساحل هم تأیید کړې چې طالبانو د دهراوود غږ راډیو ودانۍ نړولې او د راډیو وسایل‌یې لوټ کړي دي.

د رسنیو د ملاتړ ادارې، نی پر ښکېلو خواوو غږ کړی چې رسنیو او خبریالانو ته زیان وانه‌ړوي.

نی وايي، سره له دې چې طالبانو ویلي و چې له خبریالانو او رسنیو سره کار نه‌لري، خو اوس لیدل کېږي چې دوی د خپلو ژمنو خلاف عمل کوي او غړي یې د رسنیو لوټ او ویجاړولو ته دوام ورکوي.

د نی د راپور پر اساس، تر دې وړاندې طالبانو د هرات په شینډنډ ولسوالۍ کې د وطن راډیو وسایل لوټ کړي وو او د دې راډو غږ یې د تل لپاره غلی کړ.

وسله‌والو طالبانو تر اوسه د نی د دغې ادعا په اړه غبرګون نه‌دی ښودلی.

د المپيک لوبې؛ افغان لوبغاړې کیمیا یوسفي نوی ریکاډ ثبت کړ

افغان لوبغاړې کیمیا یوسفي

افغان لوبغاړې کیمیا یوسفي د توکیو په المپیک لوبو کې نوی ریکاډ ثبت کړ.

کیمیا یوسفي په المپیک لوبو کې د ۱۰۰ مترو واټن په ۱۳،۲۹ ثانیو کې وواهه او د خپل ۹ کسیز ګروپ اووم مقام‌یې وګاټه.

تر دې وړاندې کیمیا یوسفي همدومره واټن په ۱۳،۳۳ ثانیو کې کچ کړی و او په دې توګه‌یې په المپیک لوبو کې د ځان په نوم نوی ریکاډ ټینګ کړ.

نور راوښيه

XS
SM
MD
LG