د افغانستان په ختیځ کې د ۲۰۱ شاهین قول اردو چارواکي وايي چې د داعش په ګډون د افراطي ډلو پرضد د پراخو پوځي عملیاتو پیل ته تیاري نیسي.
د دې قول اردو ویندوی پرون جمعه ازادي راډیوته څرګنده کړه چې د ننګرهار، کونړ او نورستان په ګډون په ختیځو اومرکزي ولایتونو کې د پوځي عملیاتو پلان بشپړ شوی دی.
د ۲۰۱ سیلاب قول اردو چارواکي وايي، په راتلونکو څو ورځو کې به دا عملیات پیل شي.
د دې قول اردو مطبوعاتي مسول ډګرمن شیرین اقا فقیري د عملیاتو د پیل د د قیق وخت له څرګندولو ډډه وکړه.
ښاغلي فقیري وویل،له تفکیک پرته به د ټولو وسله والو اوسخت دریځو ډلو پرضد عملیات کېږي.
شیرین اقا فقیري زیاته کړه:
"هر څوک چې زموږ د خلکو د ژوند د ناکرار ولو او زموږ پر امنیتي ځواکونو د حملې هڅه کوي زموږ لپاره دښمن دی."
د ډګرمن فقیري په وینا، د ننګرهار په شینوارو ولسوالۍ کې د داعش فعالیت ډېر محدود شوی او د دې ولایت په نورو ولسوالیو کې هم د کمزوري کېدو په حال کې دي.
د افغانستان ولسمشر محمد اشرف غنی پرون په ننګرهار کې له خلکو سره ژمنه وکړه چې په څو اونیو کې به په دې سیمه کې د داعش پرضد پراخ پوځي عملیات پيل شي.
ښاغلي غني د عملیاتو مسولیت په ختیځ کې ۲۰۱ سیلاب قول اردوته ورکړ.
ولسمشر غني د امنیتي قواوو د تشکیل د پراختیا خبره هم وکړه او څرګنده یې کړه چې د ناټو تړون د غړیو هېوادونو په مرسته به د ملي اردو تشکیلات د قول اردوګانو ترکچې پراخ کړي.
د ولسمشر غني په وینا، د امریکا ۸۴۰۰ او د ناټود نورو غړیو ۱۱ زره عسکر به د افغانستان د پوځ او پولیسو د روزنې پروګرامونه او د دې هېواد د ستراتیژیک امنیتي پلان د عملي کولو لپاره مالي مرستې جاري وساتي.
ښاغلي غني څرګنده کړه چې په دې هېواد کې د تروریستي ډلو پرضد د مبارزې لپاره د ناټو ځواکونو صلاحیتونه هم زیات شوي دی.
په ننګرهار کې د ۲۰۱ سیلاب قول اردو مطبوعاتي مسول ډګرمن شیرین اقا فقیري په دې اړه وویل چې د ناټوځواکونه به د پوځي عملیاتو پرمهال، په حساسو شرایطو کې همکاري ورسره وکړي.
ډګرمن فقیري زیاته کړه:
"د اړتیا په وخت کې به موږ له هغوي مرسته غواړو خو زموږ په پیاده عملیاتو کې برخه نه لري، ناټو زموږ ملاتړ اعلان کړی دی، موږ د عملیاتو ډېر قوي پلان جوړ کړی چې ضربتي، کوماندو اوځانګړي ځواکونه په کې شامل دي او داړتیا په وخت کې به کابل هم مرسته راسره کوي."
د ډګرمن فقیري په وینا، د ننګرهار په کوټ، اچین، خوګیاڼو او شینوارو ولسوالیو کې د داعش زیات وسله وال او مهم قوماندانان وژل شوي دي.
په ننګرهار کې تېره اوونۍ د پاکستاني طالبانو یو قوماندان عمرنری هم د ناټو د بې پیلوټه الوتکې په حمله کې ووژل شو.
د دې خبر ترخپرېدو وروسته په پاکستان کې د افغانستان سفیر پر فیس بوک ولیکل چې ولسمشر غني په ننګرهار کې د عمرنري او د هغه پر ملګرو د دې حملې امرکړی و.
