د ۲۰۲۳م کال د نوبل د سولې جایزې مراسم د نرګس محمدي له حضور پرته یکشنبه د لیندۍ په ۱۹مه د ناروې په پلازمېنه اوسلو کې ترسره شول.
د نرګس محمدي لور وايي: "ښځه، ژوند، آزادي. کاش زما مور دلته دا جایزه پخپله اخیستې وای."
د هغې لور کیانا رحماني د خپلې مور په استازیتوب یې د ۲۰۲۳ کال د سولې نوبل جایزه ترلاسه کړه.
Watch the very moment Narges Mohammadi’s children collected this year’s Nobel Peace Prize medal and diploma on behalf of their mother who is currently imprisoned. Mohammadi was awarded the 2023 Nobel Peace Prize for her work on human rights. Learn more: https://t.co/8gkwD5Cuqb pic.twitter.com/NdB3HXNZNv
— The Nobel Prize (@NobelPrize) December 10, 2023
کیانا له خپل ورور علي رحماني سره د ناروې په پلازمېنه اوسلو کې د نوبل د سولې د جایزې په مراسمو کې ګډون وکړ.
نرګس محمدي د ایران په اېوېن زندان کې ده او له همدې امله یې په دې مراسمو کې ګډون ونه شو کړای.
خو نوموړې په خپل پيغام کې د ايران حکومت يو مذهبي استبداد او د ښځو ضد حکومت بللى او د ايران له خلکو یې د نړيوالې ټولنې د ملاتړ غوښتنه کړې ده.
Today Narges Mohammadi’s #NobelPeacePrize lecture was delivered by her children Kiana and Ali Rahmani in Oslo, Norway. Despite being in prison for her fight for human rights in Iran, Mohammadi ended her lecture on a hopeful note. Read the full lecture: https://t.co/PW3oTK7LYZ pic.twitter.com/rxKWmyGXAW
— The Nobel Prize (@NobelPrize) December 10, 2023
کیانا چې د نرګس محمدي په استازیتوب د هغې د وینا متن لوست، په یوه برخه کې یې د اغلې محمدي په حواله وویل: "زه یوه له هغو ملیونونو سرښندونکو او مقاومت کوونکو ایرانیانو څخه یمه چې د ظلم، جبر، تبعیض او استبداد په وړاندې راپاڅېدلې دي."
د اغلې محمدي په پیغام کې همدا راز راغلي چې: "د اسلامي جمهوریت رژیم د ولسي مشروعیت په ټیټه کچه کې دی او دغه حکومت د خلکو غوښتنو ته په جبر، اعدام، وژلو او زنداني کولو سره ځواب ورکړی دی."
نرګس محمدي د 'ښځې، ژوند، ازادۍ' غورځنګ ته په اشارې سره په دې باندې په تاکید چې د ایران خلک د استبداد، تبعیض او زور زیاتي په وړاندې راپورته شوي زیاته کړه: "زمونږ وروستی هدف په ایران کښې ډیموکراسي او بنسټیز بدلون دی."
د نوبل د سولې جایزې ګټونکې نرګس محمدي چې دا مهال د ایران په یوه زندان کې بندي ده.
د نوبل د سولې د جایزې لپاره د ناروې د کمېټې مشرې تر دې مخکې د ایران له حکومتي چارواکو غوښتي وو چې مېرمن محمدي دې په اوسلو کې د جایزې په کلنۍ مراسمو کې د ګډون لپاره له بنده خوشې کړي.
خو د ایران رژیم د مېرمن محمدي د خلاصون په اړه غوښتنو ته ځواب نه دی ویلی.
د کمېټې د اعلامیې له مخې نرګس محمدي په ایران کې له ښځو سره د تاوتریخوالي پر وړاندې د مبارزې او د خلکو لپاره د بشري حقونو او ازادیو د غوښتلو په خاطر د نوبل د سولې جایزه وګټله.
محبوبه سراج، چې په افغانستان کې د ښځو د حقونو یوه فعاله ده، هم د دې جایزې له وروستیو کاندیدانو څخه وه.
محبوبه سراج
د اوسلو د سولې څېړنیز انسټېټیوټ د اکټوبر په شپږمه نېټه د دغې جایزې د وروستي ګټونکي له اعلان مخکې په یوه بیان کې ویلي وو چې نرګس محمدي او محبوبه سراج په ایران او افغانستان کې د ښځو د حقونو لپاره د نه ستړي کېدونکو هلو ځلو له امله په ګډه د دې جایزې مستحقې دي.
په پای کې، دا نرګس محمدي وه چې دا جایزه یې وګټله او د بشري حقونو پنځمه فعاله او د ډیموکراسۍ غوښتونکې شوه چې په زندان یا په کور کې د نظربندۍ پرمهال دا معتبره نړیواله جایزه ګټلې ده.
د نوبل د سولې جایزې پنځه ګټونکي چې زندان کې وو/دي (له ښئ خوا): لیو ژیاوبو، الیس بیالیاټسکي، نرګس محمدي، آنګ سان سوچي او کارل وان اوسیتسکي
پاتې څلور کسان چې د زندان یا کورني نظربند پر مهال یې د نوبل سولې جایزې ګټلي په ۱۹۳۵م کال کې کارل وان اوسیتسکي، جرمنی ژورنالیست او د سولې فعال و.
آنګ سان سوچي، چې په ۱۹۹۱م کال کې د نوبل د سولې جایزه وګټله، د میانمار د ډیموکراسۍ پلوه غورځنګ مشره وه.
ليو شياوبو، د ٢٠١٠م کال د نوبل د سولې د جايزې ګټونکی، د چين د روڼ اندو له ډلې څخه او د تيانانمن په ميدان کې د لاريونونو له مشرانو څخه دی.
او الیس بیالیاټسکي، زنداني روسی فعال، په ۲۰۲۲ کې د نوبل د سولې جایزې ګټونکي په توګه وپېژندل شو.
د ۲۰۲۳م کال د نوبل د سولې جایزې ګټونکې نرګس محمدي ته د رسمي تقدیرنامې سربېره ۹ میلیونه سویډني کرونه، چې شاوخوا ۸۶۰ زره امریکايي ډالره کېږي، ورکړل شي.