د ناروې په اوسلو کې د نوبل د جایزې کمېټې ایرانۍ مدني فعاله نرګس محمدي د سږ کال د نوبل د جایزې ګټونکې اعلان کړه.
په ایران کې د بشري حقونو فعاله او په دغه هېواد کې د ښځې، ژوند او ازادۍ په نوم د غورځنګ ملاتړې نرګس محمدي د نوبل د سولې د جایزې ګټونکې اعلان شوه.
د جایزې د ګټونکې په توګه د اغلې محمدي د نوم د اعلانولو په اړه د نوبل د کمېټې اعلامیه د 'ښځه، ژوند، ازادي' په شعار پیل شوې او د ایران د مذهبي پولیسو په توقیف کې د مهسا امیني وژل کېدو ته یې اشاره کړې ده.
په ناروې کې د نوبل کمېټې د جمعې په ورځ اعلان وکړ چې دا معتبره جایزه نرګس محمدي ته په دې خاطر ورکوي چې هغې په ایران کې د ښځو له ځپل کېدو سره مبارزه کړې او د بشري حقونو او ازادیو لپاره یې هلې ځلې کړي دي.
د سږ کال د نوبل د سولې جایزې ته په کاندیدانو کې د افغانستان محبوبه سراج هم کاندید وه او ډېر احتمال و چې دا جایره نرګس محمدي او محبوبې سراج ته په ګډه ورکړل شي.
د نوبل د جایزې کمېټې د نرګس محمدي په اړه ویلي: "د دې زړه وره مبارزه له ډېرو کړاوونو سره یوځای ده."
اغلې محمدي په وروستیو کلونو کې حتي له خپلې کورنۍ سره چې له ایرانه وتلو ته اړ شوې، د یوځای اوسېدو فرصت نه دی موندلی.
نرګس محمدي دوهمه ایرانۍ ښځه ده چې د نوبل د سولې جایزه ګټي.
تر دې وړاندې شیرین عبادي دا جایزه ګټلې وه.
نرګس محمدي ته په داسې حال کې د نوبل د سولې جایزه ورکول کېږي چې هغه په ځلونو بندي شوې ځکه چې د ولسي اعتراضونو له ځپلو او د اعدام له سزا سره یې مخالفت کړی او د سیاسي بندیانو د ملاتړ ترڅنګ یې نور مدني فعالیتونه کړي دي.
دا اوس هم په بند کې ده.
دې د سږ کال د سنبلې په ۲۵ مه د مهسا امیني د وژل کېدو د تلین په مناسبت له زندانه په یوه پیغام کې دا ورځ د ایران د ښځو خلاف د مذهبي استبدادي حکومت د ظلم د ثبت ورځ وبلله.
نرګس محمدي او د هغې مبارزو ته له ۱۳۸۹ څخه هغه مهال پام واوښت چې دا د ایران د بشري حقونو د مدافعانو د مرکز د مرستیالې او ویاندې په توګه ونیول شوه.
دا د یوه داسي مرکز غړې وه چې په ایران کې یې د سیاسی بندیانو پر وضعیت څارنه او د هغو دفاع یې کوله.
نرګس محمدي دوه غبرګوني ماشومان لري چې اوس په فرانسه کې اوسي.
