د سپينې ماڼۍ یوې ویاندې سارا هکابي "Sarah Huckabee" پرون په سنا کې د "FBI" د پخواني مشر جېمز کومي د څرګندونو په اړه د پوښتنې په ځواب کې وویل، زه په قاطعیت سره ویلای شم چې ولسمشر ډونالډ ټرمپ درواغجن نهدی.
مېرمن هکابي دا وینا په داسې حال کې وکړه چې خبرې یې نه ثبتیدلې.
د سپينې ماڼۍ ویانده سارا هکابي
د "FBI" پخواني مشر جېمز کومي، پرون د سنا د استخباراتو په کمېټه کې د څرګندونو پر مهال وویل، فکر کوي ټرمپ دی ځکه له کاره لېرې کړ چې د ده ادارې د ټرمپ له نژدې همکارانو سره د روسي چارواکو د اړیکو په اړه تحقیقات کول.
نوموړي زیاته کړه ټرمپ په "FBI" کې د لویو نیمګړتیاوو په اړه د درواغو په ویلو سره د دې ادارې شهرت زیانمن کړی دی.
کومي وايي:
"که څه هم له قانوني پلوه حتمي نهده چې د «FBI» د مشر د لېرې کولو لپاره دې کوم دلیل وړاندې شي خو د ولسمشر ټرمپ د ادارې انتخاب دا و چې د دې وینا په کولو سره چې په «FBI» کې ګډودي ده، اداره یې کمزوري ده او د کار خلکو یې پر خپل مشر اعتماد له لاسه ورکړی زه څه چې «FBI» یې لا بدنام کړ."
د "FBI" پخوانی مشر جېمز کومي
ښاغلي ټرمپ د کومي د لېرې کولو پرمهال ویلي و چې د هغه په کار کې نیمګړتیاوې شته خو کومي وروسته په یوه تلویزیوني مرکه کې وویل چې د ده لیرې کول ښايي د ولسمشرۍ په انتخاباتو کې د روسیې د لاسوهنو په اړه د "FBI" له تحقیقاتو سره اړیکه ولري.
ولسمشر ټرمپ په مې میاشت کې کومي له دندې لیرې کړ، خو د سنا د استخباراتو په کمېټه کې د پرونیو څرګندونو پر مهال کومي وویل، د "FBI" تحقیقات چې د ټرمپ د نژدې همکارانو او روسي چارواکو ترمنځ پر اړیکو متمرکز وو، ولسمشر ټرمپ په غوسه کړی دی او ځکه یې د ده د لېرې کولو پریکړه وکړه.
هغه څه چې لومړی د ټرمپ د همکارانو او روسي چارواکو ترمنځ د تماسونو د لړۍ په اړه پیل شول اوس د دې پوښتنو په بڼه رابرسیره کېږي چې ایا ټرمپ د خپل ملي امنیت د لومړي سلاکار مایکل فلېن په اړه د اف بي ای د تحقیقاتو مخنیوی کړی.
فلین په فبروري میاشت کې وروسته له هغه له خپلې دندې لیرې شو چې د راپورونو له مخې د روسيې له حکومتي چارواکو سره د خپلو تماسونو په اړه یې سپینې ماڼۍ ته غلط معلومات ورکړل.