په افغانستان کې د ملګروملتونو مرستندویه پلاوي (یوناما) له مخدره موادو سره د مبارزې د کاري ډلې غونډه په کابل کې پرانیسته.
يوناما نن په یوه خبرپاڼه کې له مخدر موادو سره د مبارزې د کاري ډلې په اړه څرګنده کړه چې، د دې کاري ډلې طرحه د ملګروملتونو امنیت شورا ته د وړاندې شوې خپلواکې ارزونې د وړاندیز پر بنسټ وه، چې د افغانستان له اوسنیو چارواکو سره د دې هېواد د خلکو په ګټه د ښکېلتیا یو لا منسجم او همغږی بهیر تعقیب کړي.
یوناما په خبرپاڼه کې لیکلي دي چې، د ملګروملتونونو د سرمنشي ځانګړې استازې او د یوناما مشرې روزا اوتنبایوا په کابل کې له نننۍ انلاین غونډې وروسته وویل، د نشهيي موادو پر وړاندې مبارزه د افغانستان لپاره یوه مهمه موضوع ده، چې هم پر کلیوالي سیمو او هم د سیمې پر سوله او ثبات اغېز کوي.
یوناما د کاري ډلې غونډه یوه ورځ وروسته تر دې پرانیسته چې، له جرمونو او مخدر موادو سره د ملګروملتونو د مبارزې ادارې وویل، په افغانستان کې د دوه زره څلرویشتم کال په ترڅ کې د تریاکو تولید د وړم کال په پرتله دېرش په سلو کې زیات شوی دی.
د دې ادارې په وینا سږکال په افغانستان کې ۴۳۳ ټنه اپيوم تولید شوي دي.
د طالبانو د کورنیو چارو وزارت د ملګروملتونو له جرمونو او مخدر موادو سره د مبارزې دا راپور د تریاکو د تولید د زیاتېدو په برخه کې رد کړ.
د دې وزارت ویاند عبدالمتین قانع په یوه بیان کې پرون وویل، د دوی د ارزونو لهمخې د تېر یوه کال په ترڅ کې په افغانستان کې د مخدر موادو په تولید کې د پام وړ کمی راغلی دی.
د طالبانو د کورنیو چارو وزارت په ورته وخت کې پر نړیوالې ټولنې انتقاد کړی دی چې له نشهيي توکو سره په مبارزه کې یې دوی یوازې پرېښې دي.
د دوحې درېيمه غونډه د ملګروملتونو په کوربهتوب د افغانستان لپاره د یوشمېر هېوادونو د ځانګړو استازو او د یوشمېر نړیوالو استازو په ګډون د جون په ۳۰ او د جولای په اول جوړه شوې وه.
پهدې غونډه کې د افغانستان د بانکي سکټور د ستونزو، نشهيي توکو سره د مبارزې او د خصوصي سګټور د پیاوړتیا په اړوند مسایلو خبرې او بحثونه شوي وو.
مخکې ملګروملتونو ویلي و چې، پکار دي د دوحې۳ له بحثونو وروسته پهدې تړاو په کابل کې له ډیپلوماتیکو کړیو سره د خبرتيا او پوهاوي غونډې جوړې شي او د دغو غونډو په تعقیب به د دوحې۳ غونډې بحث شوي مسایل د طالبانو د حکومت او ملګروملتونو لهخوا په ګډه تعقیب شي.
