د نړۍ تر ۱۲ ډېرو هېوادونو په افغانستان کې له واکمنو طالبانو وغوښتل چې د ښځو د حقونو درناوی وکړي او په دې برخه کې د هغو نړیوالو کنوانسیونو پرېکړې پرځای کړي چې افغانستان لاسلیک کړې دي.
په نیویارک کې د ملګرو ملتونو د عمومي اسامبلۍ د غونډې ترڅنګ پرون د یو شمېر هېوادونو استازیو دا غوښتنه له طالبانو وکړه چې ښایي د مخالفت په صورت کې له افغان ښځو سره د تبعیض قضیه په هاګ کې د عدالت نړیوالې محکمې ته وړاندې شي.
د جرمني، استرالیا، کاناډا او هالنډ د بهرنیو چارو وزیرانو پر طالبانو غږ وکړ چې د سیداو CEDAW په نوم نړیوال کنوانسیون ته چې افغانستان په ۲۰۰۳م کال کې لاسلیک کړی، غاړه کېږدي.
د دې کنوانسیون له مخې باید له ښځو سره هېڅ راز تبعیض ونه شي.
تر دې اعلان وروسته د یو شمېر نورو هېوادونو د استازیو یوې ډلې د دې هڅو ملاتړ وکړ چې په دوی کې د البانیا، بلجیم، ایسلنډ، مالیزیا، مراکش، پاناما، سیرالیون او سلونیا استازي شامل وو.
دا اقدام یو داسې بهیر پیلوي چې په نتیجه کې یې د افغانستان پر ضد په هاګ کې د عدالت په نړیواله محکمه کې پرېکړه وشي.
مدني فعالې فروزان داودزۍ ازادي راډیو ته وویل چې دا ډول پرېکړې که په محاکمو کې هم وي باید عملي شي او د ښځو په غیاب کې پرېکړې ونه شي.
مېرمن داودزۍ وویل: که چېرته د دوحې یا مسکو په غونډو کې ښځې په واقعي شکل حضور درلودلی او د هغو افغان مېرمنو چې د ښځو د حقونو مدافعینې وې، غږ اورېدلی شوی وای، ښایي نن له داسې ستونزې سره نه وای مخامخ.
مېرمن داودزۍ وايي: "هر مشکل حللاره لري، مشکلات اکثر د مذاکراتو له لارې حل کېږي، خو په دې مذاکراتو کې باید متضرر لوری شریک وي. دا مشکل د نن ورځې نه دی، حتی د جمهوریت په وخت کې موږ دا غږ پورته کړ؛ که چېرته د دوحې یا مسکو په غونډو کې ښځې په واقعي شکل حضور درلودلی او د هغو افغان مېرمنو چې د ښځو د حقونو مدافعینې وې، غږ اورېدلی شوی وای، ښایي نن له داسې ستونزې سره نه وای مخامخ."
د هغې ګډې اعلامیې په مسوده کې چې په نیویارک کې پرون تر خبرې غونډې مخکې جرمني اژانس ترلاسه کړې وه، طالبان رسماً مسوول بلل شوي چې د ښځو د حقونو په اړه یې هغه مسوولیت نه دی پرځای کړي چې د ښځو په وړاندې د تبعیض د ټولو بڼو د له منځه وړلو په کنوانسیون کې یې یادونه شوې ده.
دغو څلورو هېوادونو، جرمني، استرالیا، کاناډا او هالنډ ویلي چې په افغانستان کې د بشري حقونو وضعیت ورځ تربلې خراب شوی دی.
د نړۍ ۱۸۹ هېوادونو سیداو تصویب کړی چې دا د ملګرو ملتونو د بشري حقونو تر ټولو پراخ تایید شوي تړونونه تشکیلوي.
هغه غړي چې د کنوانسیون له میکانېزم سره یې موافقه کړې، کولی شي چې نور غړي د کنوانسیون د ادعا شویو سرغړونو په اړه وننګوي.
د امریکا په متحدهایالتونو کې د پرانیستې ټولنې په نوم د بنسټ په وینا په داسې حال کې په نړۍ کې هېڅ هېواد طالبان د افغانستان د مشروع حکومت په توګه نه پېژني، طالبان لا هم د افغانستان نړیوالو تړونونو ته مسوول دي.
