د جرمني د پولیسو یو افسر چې ویل کېږي د یوه افغان کډوال لهخوا د چړې په ګوزارونو سخت ټپي شوی و، د یکشنبې په ورځ په روغتون کې ساه ورکړه.
د منهایم ښار د پولیسو افسر ۲۹ کلن رووېن "اېل L" له ټپي کېدو وروسته تر پرونه د ماشین په مټ څو ورځې ژوندی ساتل شوی و.
د راپورونو له مخې دا جرمن پولیس د جمعې په ورځ سهار د سلیمان "اې A" په نوم د یوه ۲۵ کلن افغان کډوال لهخوا څو چاقو په غاړه او سر وهل شوی و.
بریدګر په منهایم ښار کې له یاد پولیس مخکې لږ تر لږه پنځه نور کسان، چې د پاکس اروپا اسلام ضد ښي اړخي ډلې غړي وو په چړو ووهل او ټپیان یې کړل.
په ټپیانو کې د دې اسلام ضد ډلې د بورډ غړی مایکل ستورزینبرګر هم شامل دی.
په جرمن پولیس د چاقوګانو د ګوزارونو د تاوتریخجنې شېبې عکسونه په خواله رسنیو هم لاس په لاس کېږي چې د کډوالو ضد ګڼ غبرګونونه یې پارولي دي.
بریدګر د پولیسو په ډزو کې ټپي او له جمعې ورځې راهیسې په روغتون کې بستري دی.
پولیسو ویلي چې بریدګر د پوښتنو ګروېږنو لپاره لا نه دی چمتو.
په جرمني کې مېشت افغان کارپوه او د برلین د پوهنتون استاد اسحق اتمر ازادي راډیو ته وویل که څه هم دا د یوه کډوال شخصي عمل و، خو که داسې پېښې زیاتې شي د کډوالو عمومي پالیسۍ ته زیان رسوي.
اتمر وویل: "زه ګمان نه کوم چې دا په هغه قوانینو کې د کوم تغییر سبب شي چې په جرمني کې د مهاجرو لپاره موجود دي. په هر صورت دا پېښه بده پېښه وه. که دغه پېښې بیا تکرار شي نو بیا وروسته کيدای شي چې د کډوالو په عمومي پالیسو مخصوصاً د افغانانو پر وړاندې دا یو تغییر رامنځته کړي."
تر دې برید وروسته د ښي اړخو ګوندونو او کډوالو ضد فعالانو لهخوا لاریونونه او کلکې نیوکې شوي.
په منهایم ښار کې یکشنبه له غرمې وروسته د ښي اړخي "اېایفدي" ګوند ځوانو پلویانو د کډوالو او پناه غوښتونکو پر ضد لاریون وکړ.
د دغه لاریون ګډونوالو د رسنیو د راپورونو له مخې د کډوالو پر ضد شعارونه ورکول.
اخوا بیا د دغو ښي اړخو ځوانانو پر وړاندې د منهایم ځینې نور فعالان پاڅېدلي وو.
ښي اړخي ګوندونه د جرمنانو تر منځ هم ګڼ مخالفان لري او د کډوالو او اسلام ضد تګلارو په اړه یې خپل اعتراضونه څرګندوي.
