د لاسرسۍ وړ لېنکونه

تازه خبر
یکشنبه ۲۶ وری ۱۴۰۳ کابل ۰۹:۱۴

د اسراییل صدراعظم د غزې له جګړې وروسته مهال په اړه یو پلان پیشنهاد کړی


د اسراییل صدراعظم بنیامین نتنیاهو
د اسراییل صدراعظم بنیامین نتنیاهو

د اسراییل صدراعظم بنیامین نتنیاهو د غزې له جګړې وروسته مهال په اړه یو پلان پیشنهاد کړی چې د خپل ډول له مخې، د هغه لومړی رسمي وړاندیز ګڼل کېږي.

د اسراییل صدراعظم بنیامین نتنیاهو د غزې د راتلونکي په اړه یو پلان پېشنهاد کړی چې په غزه کې د اسرائیل او حماس ډلې ترمنځ د جګړې له ختمېدو وروسته وضعیت په اړه د هغه لومړی رسمي پیشنهاد ګڼل کېږي.

د سند له مخې چې د اسراییل امنیتي کابینې ته د پنجشنبې په ورځ وړاندې شوی او رویټرز خبري اژانس نن کتلی، اسراییل ویلي چې د اشغال شوې لوېدیځې غاړې او غزې تړانګې په ګډون د اردن د لوېدیځ پر ټوله خاوره خپل امنیتي کنټرول جاري ساتي.

دا هغه قلمروونه دي چې فلسطینیان غواړي هلته یو خپلواک دولت رامنځته کړي.

په لیکل شویو اوږدمهالو اهدافو کې د اسراییل صدراعظم بنیامین نتنیاهو په یو اړخیز ډول د فلسطیني دولت په رسمیت پېژندل رد کړي دي.

نتنیاهو ویلي، له فلسطینیانو سره جوړجاړی یوازې د دواړو لوریو ترمنځ د مستقیمو خبرو له لارې ممکن دی، خو هغه نه دي ویلي چې دغه فلسطیني لوری به څوک وي.

دا پیشنهاد داسې وخت برابر شوی چې نن هم عیني شاهدانو د غزې تړانګې په جنوب کې د اسراییل د هوايي حملو د دوام خبر ورکړی، چې کورونه یې په نښه کړي دي.

په غزه کې د روانې جګړې یو انځور
په غزه کې د روانې جګړې یو انځور

سره له دې چې په غزې تړانګه کې د لنډمهاله اوربند پر ټینګښت د خبرو هڅې روانې دي، مرستندویو ډلو هلته بشري وضعیت ډېر نهیلی کوونکی او ناوړه بللی دی.

د اسراییل رسنیو راپور ورکړی چې د دغه هېواد د پوځي ادارې یا موساد د مشر ډېوېډ برنیا په مشرۍ یو هیئت پاریس ته روان شو چې د حماس او اسراییل ترمنځ پر تازه اوربند خبرې وکړي.

ملګري ملتونه وايي، په غزه کې د څه باندې څلور میاشتنۍ جګړې پر مهال د غزې زیاتې برخې ویجاړې شوي او د دغه قلمرو د ۲ میلیونو او ۴ لکه اوسېدونکو ډېری یې له قحطۍ، د ناروغیو له خپرېدو او نورو کړاوونو سره مخامخ دي.

د ملګرو ملتونو د بشري چارو د همغږۍ ادارې یا اوچا ویلي چې د مرستو د رسېدو مخه تر ډېره نیول شوې او روانو جګړو د مرستې رسونې چارې اغېزمنې کړې دي.

د حماس ډلې تر ولکې لاندې د غزې روغتیا وزارت نن جمعه ویلي چې د اکټوبر له اوومې په روانه جګړه کې ۲۹زره ۵۱۴ فلسطینیان وژل شوي او ۶۹زره ۶۱۶ نور ټپیان شوي دي، هغه شمېرې چې خپلواکو سرچینو تایید یا رد کړي نه دي.

د امریکا متحد ایالتونه او اروپايي ټولنه توندلارې ډله حماس، یو ترویستي سازمان ګڼي.

په غزه کې دا جګړه وروسته له هغې پیل شوه، چې لومړی حماس ډلې د اکټوبر میاشتې پر اوومه پر اسراییل په حملې سره ۱۲۰۰ کسان ووژل او شاوخوا ۲۴۰ کسان یرغمل کړل.

د یوه لنډمهاله اوربند پر مهال چې ۷ ورځې یې دوام وکړ، د لسګونو فلسطیني بندیانو د خوشې کېدو په بدل کې ګڼ یرغمل شوي کسان خوشې شول.

اسراییل وايي، په غزه کې د حماس توندلارې ډلې له وسله‌والو سره لا هم ۱۳۰ کسان یرغمل دي او ګومان کېږي چې له دې جملې به ۳۰ کسان یې مړه شوي وي.

اړوند مطالب

XS
SM
MD
LG