هنګري له اسراییل څخه د اروپايي ټولنې د هغې ګډې غوښتنې مانع شوه چې له دغه هېواده په کې غوښتنه شوې وه چې د غزې پر رفح ښار دې حمله نه کوي.
د اروپايي ټولنې د بهرني سیاست مشر جوزیپ بوریل وویل، هیله من دی چې د مونشن یا مونیخ امنیتي کنفرانس په څنډه کې وکړای شي، له اسراییل د اروپايي ټولنې د غوښتنې په اړه یوه اجماع ترلاسه او رسما له اسراییله وغواړي چې د غزې تړانګې په جنوب کې پر رفح ښار حمله ونه کړي.
خو څو ډیپلوماتانو د جرمني خبري اژانس ته ویلي چې هنګري د اروپايي ټولنې د دې غوښتنې مخه نیولې ده.
د دوی په وینا، ځکه نو جوزیپ بوریل اړ شو چې په یوازې سر دغسې یوه اعلامیه خپره کړي.
د جرمني خبري اژانس د راپور له مخې، د اروپايي ټولنې دغه مخکښ ډیپلومات له اسراییل غوښتي چې په رفح کې پوځي اقدام ونه کړي چې د ده په وینا ناوړه بشري وضعیت به لا خراب کړي.
دا مهال څه باندې یو ملیون فلسطینیان په رفح ښار کې ژوند کوي، رفح د خیمو په یوه ښار بدل شوی او زیات دېره کسان یې هغه وګړي دي چې د غزې تړانګې له نورو برخو بېکوره شوي او رفح ته یې پناه وړې ده.
د اسراییل ځینو متحدانو له دې ډلې د امریکا متحدو ایالتونو، بریتانیا او جرمني اندېښنه ښودلې چې د اسرائیل ځمکنی تهاجم کولی شي په سیمه کې ناوړه بشري وضعیت لا پسې خراب کړي.
د حماس توندلارې ډلې تر ولکې لاندې د غزې روغتیا وزارت پرون ویلي چې په مخکنیو ۲۴ ساعتونو کې ۸۳ فلسطینیان وژل شوي او ۱۲۵ نور ټپیان شوي دي.
د دغه وزارت په وینا د اکتوبر میاشتې له اوومې په غزه کې د پیل شوې جګړې په نتیجه کې د وژل شویو فلسطینیانو شمېر ۲۸زره ۸۵۸ او د ټپیانو ۶۸زره ۷۰۰ ته رسېدلی، هغه شمېرې چې خپلواکو سرچینو تایید کړي نه دي.
د امریکا متحد ایالتونه او اروپايي ټولنه توندلارې ډله حماس، یو تروریستي سازمان ګڼي.
په غزه کې دا جګړه وروسته له هغې پیل شوه چې لومړی حماس ډلې د اکتوبر میاشتې پر اوومه پر اسراییل په حملې سره ۱۲۰۰ کسان ووژل او ۲۴۰ نور کسان یرغمل کړل.
د یوه لنډمهاله اوربند پر مهال چې ۷ ورځې یې دوام وکړ، د سلګونو فلسطیني بندیانو په بدل کې په لسګونو یرغمل شوي کسان خوشې شول، خو تر سلو زیات کسان لا هم یرغمل دي.
