د ښځو د حقونو یو شمېر فعالانې وايي، طالبانو په افغانستان کې پر ښځو د نویو محدودیتونو په لګولو سره هغوی له خپلو ټولو حقونو بې برخې کړي دي.
د ښځو د حقونو یوې فعالې تمنا زریاب پریانې د یکشنبې په ورځ د خپل څلورم اعتراض په پای کې چې هدف یې په افغانستان کې د ښځو پر وړاندې د طالبانو سیاست د " جنسیتي اپارتاید" په توګه په رسمیت پیژندل و، وویل: ښځې د خپل جنسیت له امله له نه ختمیدونکي تاوتریخوالي سره مخ دي.
اغلې پریاني د خپلو خبرو په یوه برخه کې چې د هغې پر ایکس پاڼې خپره شوې وویل:
" له بده مرغه، هره ورځ ښځې په افغانستان کې شکنجه کیږي د هغوی پر وړاندې نه ختمیدونکی تاوتریخوالی ترسره کیږي او جنسي تیري سره مخ کیږي، چې هره ورځ مونږ د افغان ښځو د ځان وژنې او زنداني کیدو شاهدان یوو."
په افغانستان کې د ښځو او نجونو پر وړاندې د طالبانو حکومت له پرله پسې بندیزونو وروسته، طالبانو په دې وروستیو کې په کابل ښار کې یو شمېر نجونې د د دوی په ټکو " بد حجابۍ" په تور نیولي.
یو شمېر نیول شوې نجونو او عیني شاهدانو تر دې مخکې ازادي راډيو ته ویلي وو چې د طالبانو حکومت د امر بالمعروف او نهی عن المنکر وزارت محتسبینو د پل سرخ، دشت برچي او د کابل ښار د شمال په څو سیمو کې لسګونه ښځې او نجونې نیولې دي.
د طالبانو حکومت د امر بالمعروف او نهی عن المنکر وزارت ویاند عبدالغفار سباوون د دغو ښځو د نیول کېدو په اړه یو شمېر رسنیو ته ویلي چې دوی حجاب نه و کړی او نورې مېرمنې یې" بې حجابۍ" ته هڅولې.
د دغو نیونو د غبرګونونو په دوام د طالبانو د یوې مخالفې ډلې، د افغانستان د ملي مقاومت د عالي شورا د رهبرۍ غړي محمد محقق ادعا کړې چې په کابل کې د نجونو تښتول او د هغه په وینا د" بد حجابۍ" مسلې راپورته کول انتخابي او د یوه ځانګړي ملیت د توکمیز او مذهبي سپکاوي لپاره یوه بهانه ده.
نوموړي، په خپله فیسبوک پاڼه کې زیاته کړې چې دا کار د طالبانو له خوا د بشري حقونو د سرغړونو په برخه کې یوه بله زیاتونه ده.
خو د طالبانو حکومت ویاند ذبیح الله مجاهد، له طلوع نیوز سره په یوې تازه مرکه کې د خپل سرو نیولو ادعاوو ته په اشارې سره ویلي چې دا نیونې خپلسري نه دي او د قوانینو پر بنسټ د عامه نظم او ارزښتونو د ساتلو په موخه کیږي.
ښاغلي مجاهد زیاته کړې، هیڅ اداره، هیواد یا فرد حق نه لري چې ووایي هغوی ولې نیول شوې دي.
د ښځو د حقونو او سیاسي چارو فعالې فوزیې کوفي ازادي راډيو ته وویل، په افغانستان کې ښځې له خپلو ټولو بشري حقونو بې برخې شوې دي او طالبانو د دوحې تړون ژمنې نه دي عملي کړي.
مېرمن کوفي زیاته کړه:
" طالبانو، د هغه څه خلاف چې په مذاکراتو کې یې ویلي وو، پر ښځو محدودیتونه وضع کړل چې په نړۍ فشار راوړي، او په وروستیو کې یې په موسسو کې د ښځو پر کار او دبهر ددوی په تګ راتګ محدودیتونه وضع کړي، خو هر څومره چې طالبان پر ښځو فشار راوړي په پایله کې پر دوی فشار راځي او د حکومت عمر يې لنډیږي."
اغلې کوفي، په دوحه کې طالبانو سره د سولې په مذاکراتو کې د تېر جمهوري نظام د پلاوي غړی وه.
دا په داسې حال کې ده چې یو شمېر نړیوالو سازمانونو د طالبانو له خوا د حجاب د نه مراعاتولو په تور د نجونو د نیول کېدو په اړه اندېښنه ښودلې او دا یې د ښځو پر ازادۍ د لا زیاتومحدودیتونو وضع کول بللي دي.
له دې ډلې د بخښنې نړیوال سازمان د سویلي اسیا څانګې د جمعې په ورځ په خپلې ایکس پاڼه ولیکل چې د ښځو نیول باید سمدستي ودرول شي او نیول شوي کسان باید خوشې شي.
