په افغانستان کې د خوړو نړیوالو پروګرام وايي، په غور ولایت کې د مرستو د وېش په برخه کې د طالبانو لاسوهنې اړ کړل چې په دې ولایت کې دا لړۍ ودروي.
د غور ولایت یو شمېر اوسېدونکي وايي، له تېرې یوې میاشتې راهیسې د خوړو نړیوال پروګرام په دې ولایت کې د مرستو وېش بند کړی دی.
د دې ولایت یو اوسېدونکي غلامحیدر ازادي راډیو ته وویل، غور کې اوسمهال 'ډبلیو ایف پي' د مرستو ګودامونه تړل شوي دي.
نوموړی وايي:" یوه میاشت کېږي چې مرسته نهده راغلې. میاشت وړاندې یو څه مرسته راغلې وه او یو شمېر کورنیو ته یوه بورۍ اوړه ورکړي و، ځینو ته بیا هېڅ رسېدلې هم نهوه. خلک بېوزلۍ سره مخ دي."
د غور یوه بله اوسېدونکې خاطره فراسو وايي، له څه وخت راهیسې ورسره مرسته نهده شوې او دا یې هم اورېدلي چې طالب چارواکو په دې ولایت کې د مرستو د وېش مخه نیولې.
هغې ازادي راډیو ته وویل، چارواکي باید هر څه ژر دا ستونزه حل کړي.
نوموړې وايي: "د اسلامي امارت له چارواکو زموږ غوښتنه دا ده چې د مرستو وېش ته اجازه ورکړي، څو خلکو ته مرستې ورسېږي."
دا په داسې حال کې ده چې په افغانستان کې د خوړو نړیوال پروګرام وايي، د طالبانو سیمهییز چارواکي د بشري مرستو په وېش کې لاسوهنه کوي او له همدې امله د تېرې اپریل میاشتې راهیسې په غور ولایت کې دا لړۍ درول شوې ده.
په افغانستان کې د 'ډبلیو ایف پي' ویاند وحیدالله اماني ازادي راډیو ته وویل، په غور ولایت کې په تېره جنوري میاشت کې هم د طالبانو د سیمهییزو چارواکو لهخوا د مرستو په وېش کې د لاسوهنې له امله دا لړۍ د لنډ وخت لپاره ځنډول شوې وه، خو له اپرېل میاشتې وروسته، یوازې د ماشومانو، امیندواره او هغو مېرمنو لپاره د خوراکي موادو وېش روان و چې ماشومانو ته شېدې ورکوي.
اماني وايي:" په ښوونځیو کې د خوراکي مواد د وېش لړۍ ځنډول شوې. په غور ولایت کې د 'ډبلیو ایف پي' په دفتر کې هېڅ کارکوونکی نهشته او په دې ولایت کې د خوراکي موادو هېڅ ذخیره هم نهلرو. د اټکل له مخې، د مې میاشتې راهیسې تر راتلونکې اکټوبر به په غور ولایت کې ۴۷۰ زره تنه په شدیده خوارځواکۍ اخته شي. هغه کورنۍ چې د مرستو د ورکړې لپاره په نښه شوي، د سیمهییزو چارواکو د لاسوهنې پای ته رسېدو تر وخته به له مرستو محرومه پاتې شي."
په ورته وخت کې د غور یو مدني فعال حکمت لعلي ادعا کوي چې له یو څه وخته په دې ولایت د ملګرو ملتونو سازمان د دفتر دروازې تړلي، خو خلک بیا مرستو ته په تمه دي.
نوموړی وايي: "یو څه وخت کېږي چې غور کې د ملګرو ملتونو موسسو دروازې بندې دي. د دې موسسو په ځانګړي ډول د خوړو د نړیوال پروګرام د موسسې بندېدل خلک له ولږي سره مخ کوي. که چېرې یوه بله میاشت هم د خوراکي توکو د مرستو رسولو بهیر ودرېږي، خلک به ډېر زیانمن شي."
لعل د طالبانو له سیمهییزو چارواکو او له ملګرو ملتونو سازمان غواړي چې هر څه ژر د مرستو د وېش لړۍ پیل کړي.
خو د طالبانو د حکومت ویاند ذبیحالله مجاهد بیا د مرستو د وېش په برخه کې د طالبانو لاسوهنه نه مني.
مجاهد وايي: "د هغې تګلارې له مخې چې د اقتصاد وزارت یې د خیریه موسسو او بنسټونو لپاره لري، لومړی باید د مرستو وېش شفاف وي، اړمنو ته ووېشل شي او ناسمه ګټه ترې پورته نهشي. که چېرته کومه ستونزه ولیدل شي، نظام مجبور دی چې د خلکو ستونزه واوري او مداخله وکړي. دا موضوعات ډېر نهدي، کم دي."
دا په داسې حال کې ده چې موده وړاندې د امریکا متحدهایالاتو د بهرنیو چارو وزارت ویاند متیو میلر هم خبري غونډه کې ویلي و چې په غور، ارزګان او غزني کې د بشري مرستو وېش د طالبانو د لاسوهنې له امله درول شوی دی.
