روسي پوځیانو د اوکراین په ختیځ کې د تېرو څلورویشت ساعتونو په ترڅ کې په لسګونه بریدونه کړي دي.
اوکرایني پوځیان خبر ورکوي چې د پرون ورځې په ترڅ کې یې د روسانو شپېته حملې شا ته تمبولې دي.
په هغه بیان کې چې نن سهار وختي د اوکراین د لوی درستیز دفتر خپور کړ په کې راغلي چې روسي پوځیان په پرله پسې ډول د اوکراین پر صنعتي برخې په ختیځ کې حملې کوي، دوی د دونیڅک په سیمه کې د لیمان، باخموت، افدیفکا او مارینکا پر ښارونو او ښارګوټو تمرکز کړی دی.
اوکرایني پوځیان وایي چې دښمنانو په تېرو څلورویشت ساعتونو کې دوه د توغندیو او پنځه دېرش هوایي بریدونه کړي، همداراز یې د راکټ لانچر له سیستمه تر څلوېښتو ډېرې حملې کړي دي.
په اوکراین کې له نویو بریدونو سره سم راپورونه وایي چې روسي ځواکونو د باخموت په سیمه کې پرمختګ کړی دی.
پرون د بریتانیا پوځي چارواکو په خپل ورځني راپور کې وویل چې روسیي ځواکونو د باخموت ښار تر منځ پورې ځانونه رسولي او د باخموتکا سیند لوېدیځه غاړه یې نیولې ده.
اته میاشتې وشوې چې روسیې او اوکرایني ځواکونه په باخموت کې په جګړه دي او د دې ښار پر سر دا جګړه د ۲۰۲۲م کال د فبروري له څلورویشتمې راپه دې خوا چې ولادیمیر پوتین پر اوکراین برید پيل کړ، تر ټولو اوږده او خونړۍ جګړه ده.
د روسیې ولسمشر ولادیمیر پوتین بیا خپلو پوځیانو ته امر کړی چې د دونیڅک، لوهانسک، زاپروژیا او خرسون سیمې په بشپړ ډول ونیسي.
مسکو دا سیمې په غیرقانوني ډول له خپلې خاورې سره یوځای کړې دي.
اوکرایني پوځیان بیا وایي چې روسیي یرغلګر ځواکونه د زاپروژیا او خرسون له اشغال شویو سیمو د کریمیا ټاپوزمه سیمې ته د ملکیانو د انتقالېدو لپاره تیاری نیسي.
دا ځواکونه دا خبره هم کوي چې دوی به ډېر ژر د اشغال شویو سیمو د بېرته نیولو لپاره عملیات پيل کړي.
بل لور ته د جمعې په ورځ د اوکراین ولسمشر ولودومیر زیلینسکي د پلازمېنې کییف په لمنو کې د مسلمانانو یوه جومات ته ورغی او له اوکرایني مسلمانو پوځیانو سره یې روژه ماتی وکړ.
زیلینسکي هغوی ته وویل چې اوکراین به بېرته کریمیا ټاپوزمه تر خپل واک لاندې راولي.
کریمیا له اصله د تاتارانو ځای دی چې مسلمانان دي.
زیلینسکي زیاته کړه چې د اوکراین پر ضد د روسیې هڅې په ۲۰۱۴م کال کې له دې سره پیل شوې چې کریمیا ټاپوزمه یې له خپلې خاورې سره الحاق کړه او د کریمیا له ازادېدو پرته بله لاره نه شته.
د اوکراین ولسمشر بیا وویل چې دی ډاډه دی چې دا بریا به د اوکراین په برخه شي.
