د لاسرسۍ وړ لېنکونه

تازه خبر
پنجشنبه ۹ وری ۱۴۰۳ کابل ۰۸:۱۲

نن په ټول افغانستان کې د ماشومانو د پوليو ضد واکسين کمپاين پيليږي


انځور - ارشيف
انځور - ارشيف

نن په ټول افغانستان کې د پنځو کلونو کم‌عمره ماشومانو لپاره د پولیو یا ګوزڼ ضد ناروغۍ د واکسین څلور ورځنی کمپاین پیلیږي.

د ملګرو ملتونو د ماشومانو د ملاتړ صندوق، یونېسف د پولیو د له منځه وړلو د پروګرام د عامه اړیکو مسول کمال شاه له ټولو میندو او پلرونو وغوښتل چې خپل ماشومان د پولیو په وړاندې واکسین کړي.

د پولیو ناروغۍ د مخنیوي یوازینۍ لار همدا واکسین کول دي

نوموړي وويل: "زموږ له ټولو میندو او پلرونو دا هیله ده چې د دې کمپاین په جریان کې خپل ټول تر پنځو کلو کم‌عره ماشومان واکسین کړي، ځکه د پولیو ناروغۍ د مخنیوي یوازینۍ لار همدا واکسین کول دي. دا ناروغي هیڅ درملنه نه‌لري خو مخنیوی یې د دې واکسین له لارې کېدای شي."

افغانستان او پاکستان هغه دوه هېوادونه دي چې تر اوسه په‌کې د پولیو ناروغي شته چې، د ښاغلي کمال شاه په خبره د همدې لپاره اړینه ده چې په دغو هېوادونو کې د پولیو واکسینونه تطبیق شي.

هغه وویل چې تېر۲۰۲۲ کال یوازې دوه پېښې په افغانستان کې ثبت شوې دي حال دا چې، په دې کال په پاکستان کې د پولیو د مثبتو پېښو شمېر شلو ته رسېده چې ټولې یې په خیبرپښتونخوا ایالت پورې تړلي دي.

د ښاغلي کمال شاه په خبره په وروستیو کلونو کې په افغانستان کې د پولیو د واکسین کمپاینونو ښه نتیجه ورکړې او هدف دا دی چې، دغه ناروغي یو مخ له افغانستان څخه ورکه شي.

هغه زیاته کړه سږ کال تر اوسه د پولیو کومه مثبته پیښه نه‌ده ثبت شوې، خو ګواښ د ماشومانو په وړاندې لا هم موجود دی، ځکه سږ کال کال په ختیځه حوزه کې د پولیو وایروس په محیط کې په دوامدار ډول سره تثبيت شوی دی.

د پوليو ضد واکسين به څلور ورځې دوام وکړي.
د پوليو ضد واکسين به څلور ورځې دوام وکړي.

په ټول افغانستان کې د پنځو کلونو کم‌عمره ماشومانو لپاره د پولیو ضد واکسین د دغه کمپاین په ترڅ کې به چې روانه اوونۍ تر پنجشنبې پورې دوام کوي، ټولو هغو ماشومانو ته چې عمرونه له شپږو میاشتو تر پنځو کلونو پورې دي، ویټامین A هم ورکړل شي.

ویټامین A د ناروغیو په وړاندې د ماشومانو د بدن معافیت قوي کوي.

په افغانستان کې د پولیو د واکسین د کمپاین په ترڅ کې تنکیو ماشومانو ته د بدن د معافیت د لوړولو لپاره ویټامین A داسې مهال ورکول کېږي چې، د ملګروملتونو د بشري مرستو د همغږۍ ادارې د وروستیو شمېرو له‌مخې سږ کال به په دې هېواد کې شاوخوا ۸۷۵ زره ماشومان له سختې یا حادې خوارځواکۍ سره مخ وي.

اړوند مطالب

XS
SM
MD
LG