د طالبانو حکومت د خپلې بیا واکمنۍ په نژدې ۱۶ میاشتو کې د لومړي ځل لپاره په فرا کې یوه کس د قصاص حکم عملي کړ.
د طالبانو مرستیال ویاند بلال کریمي پر خپله ټویټرپاڼه یوه اعلامیه کې ویلي، قصاص شوی کس د هرات د انجیل ولسوالۍ اصلي اوسېدونکی دی.
په اعلامیه کې راغلي، محکوم شوي کس پنځه کاله وړاندې د فراه په پشت کوه ولسوالۍ کې یو کس په چاقو وژلی او موټرسایکل او مبایل یې ترې وړي دي.
لومړی هغه کس میدان ته راوستل شو او بیا د طالبانو ځواکونو ډزې پرې وکړې.
اعلامیه کې راغلي، د طالبانو یو شمېر لوړپوړي چارواکي لکه د رئیس الوزرا مرستیال ملا عبدالغني برادر او د طالبانو د حکومت قاضي القضات عبدالحکیم حقاني هم حاضر وو.
د فراه یوه اوسېدونکي چې د دغه ولایت په ستډیوم کې یې د قصاص دا حکم له نژدې کتلی، ازادي راډیو ته د سترګو لیدلی حال بيان کړ.
نوموړي وويل: "نن چهارشنبه له غرمې وروسته یو شمېر طالب ځواکونو له کابل او نورو ولایتونو د راغلو طالب چارواکو په حضور کې یو کس د قتل په جرم قصاص کړ، لومړی هغه کس میدان ته راوستل شو او بیا د طالبانو ځواکونو ډزې پرې وکړې. طالبانو وویل چې د امنیت په خاطر او دغه راز د اسلامي شریعت حکم جاري کولو لپاره یې دا قصاص وکړ."
اعلامیه کې راغلي، د طالبانو مشر ملا هبت الله اخندزاده د قصاص شوي کس د قصاص حکم تایید کړی دی.
تېره میاشت د طالبانو مشر ملا هبت الله اخندزاده خپلو قاضیانو ته امر وکړ چې د خاصو جرایمو په صورت کې ( حدود او قصاص) عملي کړي.
د بشري حقونو د څار نړیوال سازمان د اسیا د څانګې مرستیالې پاتریشا ګاسمن د قصاص د دغه حکم په غبرګون کې ازادۍ راډیو ته وویل، که طالبان "له بربریت او ظلم نه ډکو" اقداماتو ته بیا مخه کوي، په نړیواله کچه به وغندل شي.
د قصاص او حدودو په اړه د ملا هبت الله تر لارښونې وروسته په یو شمېر ولایتونو کې د خلکو د دورو وهلو لړۍ پیل شوه.
په تازه پېښه کې د یوې ښځې په ګډون ۷ تنه په غور کې په دورو ووهل شول.
تر دې مخکې ۳ ښځو او ۱۱ نارینه و ته په لوګر ولایت کې په عام محضر کې ورته سزا ورکړل شوه.
تېره میاشت هم د طالبانو یوې محکمې د ۹ ښځو په ګډون ۱۹ تنو ته په تخار ولایت کې سزاوې ورکړې.
په جنوبي اسیا کې د بښنې نړیوال سازمان کمپاینرې سمیرا حمیدي دغه حرکتونه" ظالمانه او ټکان ورکونکو" اقداماتو ته د طالبانو بیا ستنېدل یاد کړل.
طالبانو د خپلې واکمنۍ په لومړۍ دوره کې هم مجرمینو ته په عام محضر کې د اعدام او سنګسار په څېر سختې سزاګانې ورکولې.
