د افغانستان د جنوبي ولایتونو د نشه يي موادو د رانیولو او خرڅولو په بازارونو کې د تارياکو بيې دوه برابره لوړې شوي دي.
په هلمند ولایت کې يوې سرچينې او کندهار کې د نشه يي موادو کاروباریانو ازادي راډيو ته ويلي چې، په وروستۍ اوونۍ کې د یوه من تارياکو بيه تر درو لکو پاکستانیو کالدارو پورې وه.
د افغانستان په جنوب کې د نشه يي موادو کاروباریان وايي چې، د تارياکو د بیې د لوړوالي علت له مخکيني فصل څخه لاس ته راغلي تارياک دي، ځکه بزګرانو د تېر فصل تارياک زېرمه کړي او هيله لري چې په راتلونکي ژمي کې به يې په لوړه بيه خرڅ کړي.
د کندهار د ژيړۍ ولسوالۍ د حوض مدد په سيمه کې په وروستیو میاشتو کې له جمعې پرته هره ورځ د تارياکو د رانیولو او خرڅولو بازار جوړېږي.
د دې بازار کاروباريانو تازه ازادۍ راډيو ته ويلي چې، په وروستۍ یوه اوونۍ کې یو من تارياک نژدې په دريو لکو پاکستانيو کالدارو خرڅېدل.
په ژيړۍ ولسوالۍ کې د ميوند په نوم يو بزګر چې تازه يې د خپلې ځمکې تارياک په حوض مدد کې خرڅ کړي ازادۍ راډيو ته وويل: "په دوه لکه هم دي، په دوه لکه او دېرش زره هم دي، ډېری خلک يې په دوه نیم لکه خرڅوي."
خو د هلمند ولایت په بهرامچې سيمه کې د تارياکو يو سوداګر چې نهغواړي نوم يې ياد شي، د تليفون له لارې ازادۍ راډيو ته وويل: "د سنبلې د مياشتې له شلمې نېټې څخه د يوه من تارياکو بيه له دريو لکو څخه نیولې بیا تر دريو لکو او لسو زرو پاکستانیو کالدارو پورې رسېدلې ده."
د طالبانو د حکومت د کورنیو چارو وزارت ادعا کوي چې، د دوی د مشر د فرمان تر اعلان وروسته په افغانستان کې د کوکنارو کښت صفر شوی دی، خو د دې ادعا د اثبات لپاره شمېرې نه اعلانوي.
"دلته په دوه لکه و اویا زره رانيول کېږي او خرڅېږي"
په هلمند ولایت کې د شاه جهان په نوم يو بزګر چې خپل تارياک يې بهرامچې ته نژدې په يوه بازار کې خرڅ کړي موږ ته د تارياکو د بيو توپيرونه داسې بيانوي: "دلته په دوه لکه و اویا زره رانيول کېږي او خرڅېږي، اوس دلته هم سودا کېږي، زما څخه يې من په دوه نیم لکه روپيو غواړي."
د افغانستان په جنوب کې د تارياکو بيې په ناڅاپي ډول داسې مهال لوړېږي چې، سږ کال د سرطان په مياشت کې د کندهار په حوض مدد سيمه کې یو من تارياک په يو لک او شل زره پاکستانۍ کالدارو خرڅېدل، په داسې حال کې چې د ۱۴۰۰ شمسي کال په ژمي کې د یوه من تارياکو بيه یو لک و اتیا زره کالدارې وه.
که څه هم بله اوونۍ د افغانستان په تودو يا ګرمسېرو ولایتونو کې د کوکنارو د بل فصل وخت پيلېږي، خو تر اوسه د طالبانو حکومت او مسئولو بنسټونو د سږکال د لومړي فصل د کوکنارو د کښت د اندازې په اړه د څېړنې پايلې نه دي خپرې کړي.
-----------------------
