د لاسرسۍ وړ لېنکونه

تازه خبر
شنبه ۵ کب ۱۴۰۲ کابل ۰۵:۳۰

طالبان د داعش او پخوانیو افغان ځواکونو د ګواښونو شتون ردوي


په کابل کې د طالبانو غړي
په کابل کې د طالبانو غړي

طالبانو د ملګروملتونو د کارپوهانو هغه راپور رد کړی چې وايي، د دوی واکمني د داعش ډلې او د پخواني دولت د امنیتي ځواکونو له خوا تر ګواښ لاندې ده.

د طالبانو حکومت د ملګروملتونو هغه راپور رد کړی چې وايي، د دوی واکمنۍ ته د داعش او پخواني حکومت د امنیتي ځواکونو له خوا خطر متوجه دی.

د طالبانو د حکومت ویاند ذبیح الله مجاهد بېګا آزادۍ راډیو ته وویل، دا دواړه ډلې د دوی لپاره سرخوږی نه شي جوړولای.

د طالبانو د حکومت ویاند ذبیح الله مجاهد
د طالبانو د حکومت ویاند ذبیح الله مجاهد

هغه وايي: "اسلامي امارت له هغه وخته چې د ښارونو کنټرول په لاس کې اخیستی داعش پدیده په یوه حد کې وه خو اوس د نهایت ضعف حالت ته رسېدلې او په سلو کې یو هم نه دي پاتې او ظاهري وجود هېڅ نه لري. همداراز د مقاومت په نوم چې څوک په بغاوت لاس پورې کوي دفع شوي او له منځه وړل شوي دي، کوم فزیکي حضور یې موږ نه وینو، نه یې کومه جبهه وینو. د دوی د دفع کېدو لپاره اسلامي امارت قاطع دی. ډېرژر به هرڅه کنټرول او نورمال حالت ته راشي."

د ملګرو ملتونو د کارپوهانو په تازه راپور کې چې د غبرګولي په دولسمه د امنیت شورا ته وړاندې شو راغلي دي، چې د طالبانو واکمنۍ ته اصلي خطر د اسلامي دولت ډلې یا داعش او د پخواني حکومت د امنیتي ځواکونو د چریکي حملو له خوا متوجه دی.

راپور زیاتوي چې د هوا له تودېدو سره ښايي جګړې زیاتې شي ځکه داعش ډله او د مقاومت ځواکونه دواړه د طالبانو پرضد عملیات کوي.

په راپور کې همداراز یادونه شوې چې داعش او القاعده له ۲۰۲۳ کال مخکې پر نړیوالو اهدافو د حملو توان نه لري.

په امریکا کې د ډیموکراسۍ د دفاع د بنسټ مخکښ کارپوه بیل روجیو هم په دې باور دی، چې د داعش ډلې د حملو تمرکز تر ډېره پر طالبانو دی نه پر نړیوالو اهدافو.

هغه وايي: "د داعش ډلې خراسان څانګه که څه هم د طالبانو لپاره یو ګواښ ګڼل کېږي، خو لوی ګواښ نه دی. دوی پر سیمو ولکه نه لري او د جنګیالیو شمېر یې لږ دی. دا ډله په طالبانو او ګاونډیو هېوادونو کې د یوه ځوځ حیثیت لري چې تر ډېره پر خپله بقا تمرکز کوي او دومره وخت نه لري چې د لویځ پرضد بریدونه وکړي بلکې هدف یې د طالبانو نسکورول دي."

د ملګروملتونو د کارپوهانو په تازه راپور کې راغلي طالبان په داسې حال کې چې له یوې یاغي ډلې څخه په یوې واکمنې ډلې د بدلېدو لپاره هڅه کوي په دوو ډلو وېشل شوي دي؛ یوه د مصلحت غوښتونکو او بله د تندلارو ډله خو د راپور جوړوونکي وايي چې د تندلارو واک په کې ډېر دی.

راپور زیاتوي، د طالبانو په تحریک کې واک ته له رسېدو وروسته، د خپلمنځي اختلافونو لپاره ګڼ عوامل شته او دا نظر پیاوړې کوي چې د دوی حکومتولي له ګډوډیو ډکه او پاشلې ده او دا لېوالتیا پکې زیاته ده چې له خپلو پالیسیو او ژمنو څخه په شا شي.

XS
SM
MD
LG