د لاسرسۍ وړ لېنکونه

تازه خبر
شنبه ۴ چنګاښ ۱۴۰۱ کابل ۰۳:۰۲

د محدودیتونو په دوام اروپايي ټولنې د زړورو افغان مېرمنو غونډه جوړه کړې


اروپايي ټولنې له لوري د زړورو مېرمنو د غونډې انځور

د افغانستان لپاره د اروپايي ټولنې استازی وايي، چې د افغان مېرمنو د وضعیت په اړه د بحث لپاره یې یوه دوه ورځنۍ غونډه جوړه کړې ده.

د افغانستان لپاره د اروپايي ټولنې ځانګړی استازی توماس نیکلاسن وايي، چې د افغاني ټولنې د بېلابېلو پوړیو د زړورو مېرمنو له یوې ډلې سره یې دوه ورځنۍ غونډه درلوده.

د نیکلاسن په وینا په دې خبرو کې په افغانستان کې د ښځو د وضعیت په اړه بحثونه وشول.

دا په داسې حال کې ده، چې نړیوالې ټولنې پر افغان مېرمنو د طالبانو د محدودیتونو له کبله سخته اندېښنه ښودلې.

په دې غونډه کې د جنسیتي انډول په چارو کې د اروپايي ټولنې سفیرې ستیلا رونر هم ګډون کړی و.

هغې پر ټویټر لیکلي، چې په دې دوه ورځنۍ غونډه کې له افغانستان او نورو ځایونو د شپېتو تنو په شاوخوا کې ښځو ګډون کړی و.

د مېرمن رونر په وینا، دا غونډه داسې مهال جوړېږي چې د بشري حقونو لپاره د ملګروملتونو ځانګړی راپور ورکوونکی ریچارد بېنیټ هم په کابل کې دی او غواړي دا ډاډ ترلاسه کړي چې د اروپايي ټولنې او ملګروملتونو ترمنځ د ښځو په برخه کې نژدې همکاري دوام کوي.

په همدې حال کې د افغانستان لپاره د ناروې سفیر اولې اندریاس لیندمن پر ټویټر په یو بیان کې ویلي دي، چې کابل ته تللی او پرون د غویي په دېرشمه یې له یو شمېر مدني فعالانو سره لیدلي دي.

نوموړي کابل ته له روانېدو مخکې په افغانستان کې پر ښځو د لګېدلو محدودیتونو له کبله اندېښنه ښودلې وه.

بل خوا د بشري حقونو د څار په سازمان کې د آسیا د څانګې څېړونکې فرشته عباسي وايي، چې دوی په افغانستان کې د ښځو روان وضعیت څاري.

نوموړې آزادۍ راډیو ته وویل، طالبان باید د افغان ښځو حقونو ته د درناوي پر ژمنه عمل وکړي.

د بشري حقونو د څار په سازمان کې د آسیا د څانګې څېړونکې فرشته عباسي
د بشري حقونو د څار په سازمان کې د آسیا د څانګې څېړونکې فرشته عباسي

هغه وايي: "زه فکر کوم د نړیوالې ټولنې پیغام واضح او څرګند دی. که طالبان نه غواړي چې د افغان ښځو حقونو ته درناوی وکړي او د هغوی لومړني حقوق ورکړي، نو نړیواله ټولنه به له طالبانو سره هېڅ راز همکارۍ ته چمتو نه وي."

له تعلیم څخه د منځنیو ښوونځیو او لیسو د زده کوونکو نجونو محرومول، د ښځو پر سفر محدودیت، د حجاب جبري کول او اوس اوس د ټلویزیونونو د ښځینه ویندویانو لپاره د مخ پټول د طالبانو هغه اقدامات دي چې د نړیوالې ټولنې سخت غبرګونونه یې پارولي دي.

د طالبانو سرپرست حکومت چې تراوسه هېڅ هېواد په رسمیت نه دی پېژندلی، استدلال کوي چې پر شرعي احکامو عمل کوي.

نړیوالې ټولنې بشري حقونو په تېره د ښځو حقونو ته درناوی له طالبانو سره د تعامل لپاره مهم شرط بللی او تل یې د هغو پر خوندیتوب ټینګار کړی.

XS
SM
MD
LG