په داسې حال کې چې سبا به د افغانستان په ګډون په اسلامي نړۍ کې د کوچني اختر لومړۍ ورځ وي، په کابل کې د امریکا سفارت په اختریز پیغام کې پر سیدالشهدا ښوونځي موټر بم حمله وحشتناکه او د افغان زدهکوونکو د زدهکړو پر حق حمله بللې ده.
په کابل کې د امریکا سرپرست سفیر راس وېلسن په دې پیغام کې ویلي چې هېواد یې په افغانستان کې د زدهکړو او بشر حقونو ملاتړ ته دوام ورکوي.
ښاغلي وېلسن ټینګار کړی چې امریکا د افغانستان په ټولو برخو په ځانګړي ډول یوې تلپاتې سولې ته د رسېدو په هدف د سولې په پروسه کې د مېرمنو ګډون غواړي.
په ورته وخت کې د افغانستان لپاره د ملګرو ملتونو د سرمنشي ځانګړې استارې دیبورا لاینز په خپل اختریز پیغام کې ویلي چې په دې حساسو شرایطو کې د ټولو افغانانو تر خوا ده او له هر څه وړاندې سوله غواړي.
اغلې لاینز ویلي چې د ملګرو ملتونو هڅه د سولې په مذاکراتو کې د ټولو اړخونو په یوځای کېدو ده.
نوموړې هیله ښودلې چې دا کوچنی اختر په افغانستان کې د تلپاتې سولې لامل شي او ټول اړخونه د سولې لپاره په یوې نوې ژمنې سره یوځای شي.
یوناما ویلي چې دغه سازمان له تېرو ۷۵ کلونو راهیسې د افغانانو ترڅنګ دی او دې همکارۍ ته به دوام ورکړي.
له بله خوا اروپايي ټولنې په افغانستان کې د جګړې په درېدو تینګار کړی دی.
په افغانستان کې اروپايي ټولنه په یوه خپره کړې وینا پاڼه کې وایي، په داسې حال کې چې د روژې مبارکه میاشت د تېرېدو په حال کې ده، دوی د یو داسې پرمختللي افغانستان هیله لري چې نارینه او ښځینه پهکې خپلو لومړنیو او اساسي حقونو ته لاسرسی ولري.
د دغې ټولنې له لوري په خپره شوې وینا پاڼه کې افغانان یووالي ته رابلل شوي او ټینګار یې کړی چې د شخصي او فردي ګتو په نظر کې نیول افغانستان خطرناکې مرحلې ته بیولی شي.
په خبرپاڼه کې ټینګار شوی چې د اوسني نازک حالت نه د وتلو یوازنۍ کیلي د افغانانو ترمنځ یووالی او یو موټیتوب دی.
خبرپاڼه وایي طالبان باید درک کړي چې د جګړې دوام او تودېدل د دوی هېواد او خلکو ته سخت زیان رسوي.
له بله خوا اروپايي ټولنې له طالبانو غوښتنه کړې چې جګړه ودروي.
دا په داسې حال کې ده چې وسلهوالو طالبانو د اختر په درېیو ورځو کې اوربند اعلان کړی، خو مبارکه روژه بیا د افغانانو لپاره خونړۍ وه.
نهیوازې دا چې له بېلابېلو ولایتونو د سختو نښتو راپورونه ورکول کېدل، بلکې په لوګر او کابل کې موټر بم حملې هغه څه وې چې سلګونه ملکیانو تهیې مرګژوبله واړوله.
افغان حکومت د اختر په ورځو کې د طالبانو د اوربند هرکلی کړی او غوښتنهیې کړې ده چې دغه ډله تلپاتیې اوربند وکړي، خو طالبانو له اختر وروسته اوربند رد کړی دی.