د افغانستان حکومت وايي، له طالبانو سره د مرکچي پلاوي په جوړښت کې به د سیاسي ګوندونو استازو ته ونډه ورنهکړل شي.
د ولسمشر محمد اشرف غني ویاند صدیق صدیقي د جمعې په ورځ «۱۳۹۸ کال د کب ۰۹» ازادي راډیو ته وايي، د دې پلاوي د جوړېدو په اړه له سیاسیونو او ګوندونو سره مشورې شوي، خو دا چې طالبان له افغان حکومت سره مذاکره کوي، له همدې کبله به د دې پلاوي غړي حکومتي کارکوونکي وي.
ولسمشرۍ ماڼۍ داسې مهال دا څرګندونې کوي چې له دې وړاندې یې په ځلونو ویلي، له طالبانو سره مذاکره کوونکی پلاوی به د ټول افغانستان استازولي وکړای شي.
بلخوا بیا یو شمېر ګوندونه او سیاسیون د ولسمشرۍ ماڼۍ له دې دریځ سره مخالفت ښيي.
طالبان له افغان حکومت سره مذاکره کوي، له همدې کبله به د دې پلاوي غړي حکومتي کارکوونکي وي.
ځیني دغه ګوندونه وايي، که د سولې مرکچي پلاوي کې د دوی استازي نهوي، دوی بهیې ونهمني.
د اجرائیه رياست دوهم مرستیال محمد محقق چې د افغانستان د خلکو د اسلامي وحدت ګوند مشري هم کوي د جمعې په ورځ ازادي راډیو ته وویل، که ارګ په یوازې ځان د دې پلاوي د جوړښت په اړه پرېکړه وکړي، دوی بهیې ونهمني.
ښاغلی محقق زیاتوي: "مرکچي پلاوی باید د ټولو سیاسي اړخونو استازولي وکړي او داسې جوړ شي چې ټول لوري پهکې ځان وویني، که داسې ونهشي، شاید کومې پایلې ته ونهرسېږي."
د ګلبدین حکمتیار په مشرۍ حزب اسلامي په دې اند دی چې د سولې خبرې یوازې هغه مهال پایله ورکولای شي چې یو ټولګډونه پلاوی د افغانستان د خلکو په استازولۍ له طالبانو سره د خبرو مېز ته کېني.
د دې ګوند یو ویاند فضل غني حقمل ازادي راډیو ته وویل: "که د افغانستان حکومت غواړي چې د سولې پروسه بریالۍ شي، باید د سولې خبرو لپاره یو ملي پلاوی وټاکي چې ټول لوري یې غړیتوب ولري او بشپړ واک ورکړل شي."
د جمعیت اسلامي ګوند د رهبرۍ شورا غړی محمد اسماعیل که څه هم هیله ښيي چې د امریکا متحده ایالاتو او طالبانو ترمنځ د کېدونکې هوکړې وروسته به، ولسمشرۍ ماڼۍ د مرکچي پلاوي د جوړېدو په اړه مشورې پیل کړي، خو دا هم وايي، که له طالبانو سره د مرکچي پلاوي په جوړښت کې ګوندونو او سیاسیونو ته ونډه ورنهکړل شي، دوی بهیې جوړښت ونهمني.
ښاغلی اسماعیل خان زیاتوي: "که چېرې د افغانستان حکومت په یوازې ځان له طالبانو سره د خبرو لپاره پلاوی ټاکي او په هغې کې د ګوندونو استازي او مهم سیاسي شخصیتونه ونهاوسي، لومړی خو به خپله سیاسیون د دې کار اجازه ورنهکړي او بل به طالبان هم له دې پلاوي سره د خبرو لپاره حاضر نهشي."
د افغانستان مخکېني ولسمشر حامد کرزي ته نږدې کسان هم وايي، ښاغلي کرزي له حکومت سره د مرکچي پلاوي د جوړېدو په برخه کې د دې پلاوي په ټول ګډونوالي ټینګار کړی دی.
شهزاده مسعود وايي، تر اوسه هغو مشورو پایله نهده ورکړې چې د مرکچي پلاوي د جوړېدو په اړه شوې دي.
ښاغلی مسعود وايي: "سلا مشورې شوې وې، مګر تر اوسه د دغهشان پلاوي د جوړښت په اړه چې حکومتیې وايي چې د ټولو ګوندونو او سیاسیونو پرې سلا شوې ده، داسې نهده."
له طالبانو سره د مرکچي پلاوي د جوړښت په اړه داسې مهال دا څرګندونې کېږي چې تمه ده د امریکا متحده ایالاتو او طالبانو ترمنځ د سولې هوکړهلیک سبا د شنبې په ورځ په دوحه کې لاسلیک شي.
هغه هوکړه چې له مخې بهیې د افغانستان د حکومت او طالبانو ترمنځ د مخامخ خبرو پیل ته زمینه برابره شي.
له دې وړاندې د امریکا متحده ایالاتو هم په ځلونو د افغانستان له حکومت غوښتي چې له طالبانو سره د سولې د خبرو په اړه داسې یو پلاوی وټاکي چې د ټول افغانستان استازولي وکړای شي.
خو د افغانستان حکومت وايي، مهمه ده چې له طالبانو سره د خبرو لپاره د مرکچي پلاوي د جوړېدو پر ځای د دې پلاوي د مذاکراتو د پایلې په اړه ملي اجماع موجوده وي.
هغه پایله چې د لویې جرګې لهخوا بهیې د برخلیک په اړه پرېکړه کېږي.
