افغان ولسمشر محمد اشرف غني، له ټولو افغانانو وغوښتل چې د جګړې د بندېدو او پایدارې سرتاسري سولې لهپاره غږ پورته کړي.
محمد اشرف غني وايي، دی د سولې لپاره خپل سر نذرانه ورکوي، خو په خبرهیې سوله یوازې د دولت کار نهدی او ولس پورې هم اړه لري.
ښاغلي غني دغه څرګندونې د پنجشنبې په ورځ په ارګ کې په یوه غونډه کې وکړې او ویې ویل چې پایداره سوله دقت غواړي، خو اول قدم اخېستل یې جرأت دی.
نوموړي زیاته کړه:
"د افغانستان ټول خلک باید غږ پورته کړي چې سوله غواړو، د جګړې ختمول غواړو، ثبات او عزت غواړو. که زما سر د سولې لپاره غواړي په دواړو لاسو یې ورکوم، بینالافغاني مذاکرات غواړو، سوله اوس ولس پورې اړه لري، یوازې د دولت کار نهدی، پایداره سوله دقت غواړي خو اول قدم اخېستل جرأت دی."
ښاغلي غني یو ځل بیا ټینګار وکړ چې په افغانستان کې روانه جګړه هېڅ ډول مشروعیت نهلري او دغه جګړه یې سیمهییزه او نړیواله وګڼله.
افغان ولسمشر دغه څرګندونې داسې مهال کوي چې د افغانستان د سولې عالي شورا وايي، د سولې په برخه کې روان کوښښونه هیله بخښونکي دي.
د سولې د عالي شورا مرستیال عطاالرحمان سلیم د پنجشنبې په ورځ ازادي راډیو ته وویل، اوسمهال له وسلهوالو طالبانو سره د سولې د خبرو په هدف په ملي، سیمهییز او نړیواله کچه هڅې روانې دي.
نوموړی وايي:
"زموږ پروګرام دا دی چې د خبرو له لارې سوله وشي، نورې حلقې هم شته چې هغوی خپل پروګرامونه لري، خو له موږ سره په تماس کې دي او له موږ سره هماهنګ دي، انشالله څه هڅې د هغوی لهخوا، څه زموږ لهخوا، څه د سیمهییزو هېوادونو او څه هم د نړېوالې ټولنې لهخوا، زه هیله مند یم چې دا سولې ته لار هواروي."
د یادونې وړ ده چې د افغانستان د سولې په برخه کې په تر ټولو تازه اقدام کې د سې شنبې په ورځ د سعودي عربستان په پلازمېنه جده کې د اسلامي همکاریو د سازمان غونده جوړه شوه چې پهدغه غونډه کې په افغانستان کې جګړه وغندل شوه او د دغه هېواد د سولې له بهیره ملاتړ وشو.
بلخوا د طالبانو دوو مشرانو چې له امریکا سره د خبرو له بهیره خبر دي، روېټرز خبري اژانس ته ویلي چې د طالبانو د مشرتابه د یوه پلاوي په ترکیب کار کوي چې له امریکایي چارواکو سره په افغانستان کې د جګړې د پای ته رسولو پر لارو چارو بل پړاو خبرو ته کښیني.
خو د افغانستان د سولې او نجات شورا مسوولین انتقاد کوي چې حکومت د سولې په برخه کې لازمه پرېکړه نهشي کولای او پهکار ده چې پهدې برخه کې عالمان، مخورو او سیاسیون سره راټول شي.
د یادې شورا رئیس ګل رحمان قاضي ويي:
"زه فکر کوم چې حکومت لارم تصمیم نهشي نیولی، څه چې په مخه ورځې همغه کوي او عواقب یې هم نه سنجوي، داسې حالت کې باید د ملت هغه د اعتماد وړ شخصیتونه، علماء، پوهان او سیاسیون دوی سره راټول شي او د یوې افغاني ملي سولې لپاره لاره هواره کړي."
د افغانستان د ملي شورا یو شمېر غړي بیا ټینګار کوي چې د سولې د خبرو تر څنګ پر وسلهوالو طالبانو نړیواله فشارونه هم حتمي دي.
د افغانستان د مشرانو جرګې دوهم مرستیال اصف صدیقي ازادي راډیو ویلي چې هغه هېوادونو چې د افغانستان د سولې پروسې ته رامخته شوي اقدامات یې باید صادقانه وي او په یاده برخه کې خپلې ژمنې په عمل بدلې کړي.
راپور: اجمل تورمان
