د امریکا متحده ایالاتو د بهرنیو چارو وزیر وایي، امریکا دې ته ژمنه ده چې له خپلو متحدانو سره کار وکړي، څو د ایران د اټمي تړون پر ځای یوې بلې موافقتنامې ته لار هواره شي.
مایک پامپیو د چهارشنبې په ورځ «۱۳۹۷ کال د غبرګولي ۰۲» په داسې وخت کې دا خبره د امریکا د استازو جرګې یوې استماعیه غونډې ته وکړه چې د جرمني د بهرنیو چارو وزیر په همدې ورځ وویل چې تر ټولو غوره لار چې د ایران د اټمي وسلو مخه ورسره نیول کېدای شي، د ۲۰۱۵ میلادي کال لاسلیک شوی تړون دی.
د امریکا د متحده ایالاتو د بهرنیو چارو وزیر مایک پامپیو وایي، واشنګټن به له خپلو شریکانو سره هڅې وکړي چې د ایران د اټمي او غیر اټمي ګواښونو د مخنیوي لپاره یوې نوې توافقنامې ته لار هواره کړي.
مایک پامپیو د امریکا د استازو جرګې د بهرنیو اړیکو کمېټې ته د چهارشنبې په ورځ «۱۳۹۷ کال د غبرګولي ۰۲» وویل:
"د دوشنبې په ورځ «د مې ۲۱مه» ما د ایران د ستراتېژۍ له یوه نوي مسیره پرده پورته کړه. موږ په بېساري ډول فشارونه د دفاع وزارت له پوځي فشارونو سره همغږه کړل، موږ د ایران د خلکو ملاتړ کوو، خو تر ټولو مهم دا چې د یوه نوي تړون لپاره باید ایران خپل چلند بدل کړي. زموږ هر څومره شریکان، همکاران، دوستان او متحدان چې وي، د ایران د اټمي او غیر اټمي ګواښونو د مخنیوي هدف ته د رسېدو لپاره ورسره کار کوو."
ایران د نړۍ له شپږو پیاوړو هېوادونو، متحده ایالاتو، روسیې، چین، بریتانیا، فرانسې او جرمني سره په ۲۰۱۵ میلادي کال کې اټمي تړون لاسلیک کړ، د دې تړون له مخې دغو هېوادو ژمنه وکړه چې پر ایران به بندیزونه سست کړي او په بدل کې بهیې ایران د یورانیمو له غني کېدو لاس اخلي.
امریکا غواړي د ایران د اټمي او غیر اټمي ګواښونو د مخنیوي لپاره یوې نوې توافقنامې ته لار هواره شي.
د امریکا د متحده ایالاتو ولسمشر ډونالد ټرمپ له اوږدې مودې راهیسې پر دې تړون انتقاد کاوه او ویلیې چې ایران د دې تړون له روحیې څخه سرغړونه کړې ده.
ولسمشر ټرمپ د روانې میاشتې په لومړیو کې اعلان وکړ چې واشنګټن له دې تړونه بهر شو، خو د تړون نور غړي هېوادونه هڅې کوي چې دا تړون حفظ کړي.
سره له دې چې امریکا هڅه کوي چې خپل متحدان راغونډ کړي، څو د ایران د اټمي فعالیتونو د مخنیوي لپاره یوه نوي تړون ته لار پرانیزي، خو د واشنګټن د یوه نږدې متحد د جرمني د بهرنیو چارو وزیر هایکو ماس په واشنګټن کې د چهارشنبې په ورځ «۱۳۹۷ کال د غبرګولي ۰۲» ټینګار وکړ چې هېواد بهیې له ایران سره د ۲۰۱۵ میلادي کال له اټمي تړونه بهر نهشي.
هایکو ماس وویل، ده د امریکا د ملي امنیت سلاکار جان بولټون ته د چهارشنبې په ورځ «۱۳۹۷ کال د غبرګولي ۰۲» په واشنګټن کې د خبرو پر مهال د جرمني او اروپا دغه دریځ روښانه کړ.