د فرانسې د جمهوري ریاست انتخابات منځلاري کاندید امانوئل مکرون وګټل.
په فرانسه کې د جمهوري ریاست د ټاکنو دوهم دور پرون یکشنبه ترسره شو.
د رپوټونو پر اساس، مکرون لږ تر لږه ۶۵ فیصده رأیې وګټلې او په اسانۍ د افراطي ښي اړخي ګوند پر کاندیدې مارین لوپن بریالی شو.
د فرانسې نوي منتخب ولسمشر امانوئل مکرون د ټاکنو تر ګټلو وروسته، یو وار بیا وویل چې له اروپايي اتحادیې سره د خپل هېواد اړیکې به ټینګ کړي.
د فرانسې د جمهوري ریاست لپاره دواړو وروستیو کاندیدانو، امانوئل مکرون او مارين لوپن د خپل هېواد او اروپايي اتحادیې د اړیکو په اړه متفاوت نظرونه درلودل.
منځلاري سیاستوال امانوئل مکرون د ازاد اقتصادي بازار او پر روسیه په اوکراین کې د لاسوهنې له امله د اروپايي اتحادیې د اقتصادي بندیزونو د دوام ملاتړ کړی و.
خو افراطي ښي اړخې سیاستواله، مارین لوپن له اروپايي اتحادیې د فرانسې د وتلو ملاتړې وه او له روسیې سره د خپل هېواد د اړیکو د ښه کولو خبرې یې کولې.
د امریکا د جمهوري ریاست په ټاکنو کې د ډونالد ټرمپ تر بري او له اروپايي اتحادیې د بریتانیې تر وتلو وروسته، په فرانسه کې د منځلاري سیاستوال امانوئل مکرون بری ښايي د اروپايي اتحادیې اندېښنې کمې کړې وي.
د ټاکنو ګټونکی، امانوئل مکرون ۳۹ کلن دی چې مخکې د فرانسې د اقتصاد وزیر هم وو.
هغه تېره شپه د خپل بري په مناسبت په مراسمو کې چې د پاریس ښار لوور موزیم ته نېږدې جوړ شوي و، وویل چې فرانسه به د اروپا دفاع کوي او د فرانسویانو او اروپا اړیکې به پیاوړې کوي.
امانوئل مکرون وویل:
"د فرانسې ښځو او سړیو، ګرانو وطنوالو! تر اوږدې مودې سیالیو وروسته تاسو پرېکړه وکړه چې پر ما باور وکړئ او زهيې ډېره ستاینه کوم."
د فرانسې د جمهوري ریاست د ټاکنو لومړی دور دوه اوونۍ مخکې ترسره شو چې په هغه کې هم منځلاري سیاستوال امانوئل مکرون تر مارین لوپن مخکې شوی و.
مارین لوپن د کډوالۍ ضد سیاست درلود او غوښتل يې چې د ایرو له حوزې هم ووځي.
د اروپايي کمېسیون مشر ژان-کلود یونکر د امانوئل مکرون د بري هرکلی کړی او پر ټویټر یې لیکلي چې لهدې امله چې فرانسې له اروپايي اتحادیې سره ګډه راتلونکې غوره کړې، خوشحال دی.
د جرمني صدراعظمې انګلا مېرکل ویلي چې فرانسه کې د مکرون بری د متحدې او پیاوړې اروپا بری دی.
امانوئل مکرون به د اروپايي اتحادیې تر ټولو ځوان ولسمشر شي.
