د پاکستان د پوځ لوی درستیز جنرال عاصم منیر وایي، له افغانستان سره د ډيورنډ پر کرښه د ساتنې او د ترهګرو ډلو په وړاندې د پولو د مدیریت یو پیاوړی سیستم رامنځته کړی دی.
جنرال عاصم منیر د جمعې په ورځ په اسلاماباد کې د (۲۰۲۴ مارګله ډیالوګ) ناستې ته د وینا پر مهال ویلي چې، دوی دا سیستم د ترهګرو ډلو نه د پولو د ساتلو په موخه رامنځته کړی دی.
د ښاغلي منیر دا خبرې پاکستاني رسنیو ډان ورځپاڼې او سما ټلوېزیون خپرې کړې دي.
د دې رسنیو د راپورونو لهمخې، جنرال منیر پهدې اړه له نورو جزیاتو ورکولو پرته، دا هم ویلي چې په افغانستان کې د طالبانو حکومت دې دا باوري کړي چې د افغانستان خاوره د ترهګرو ډلو له لوري نه استعمالیږي.
نوموړي له طالبانو غوښتي چې پهدې اړه باید جدي اقدامات وکړي.
که څه هم عاصم منیر پر ډيورنډ کرښه د دې سیستم د جوړولو په اړه نور جزیات نهدي ورکړي، خو لهدې وړاندې د پاکستان د صدراعظم شهباز شریف په ګډون ګڼو لوړ پوړو پاکستاني چارواکو د افغانستان او پاکستان تر منځ پر ډيورنډ کرښه د ټيټيپي ځپلو لپاره د عزم استحکام په نوم د عملیاتو د پیل خبره کړې ده.
عاصم منير
د طالبانو د حکومت ویاند ذبیحالله مجاهد د دغه پاکستاني چارواکي د څرګندونوپه اړه د ازادي راډیو پوښتنې ځواب نهکړې، خو وړاندې تر دې یې په وار وار ټینګار کړی چې دوی هیچاته د ترهګریزو فعالیتونو لپاره د افغانستان له خاروې کارولو ته اجازه ور نهکړي.
"پاکستان د دې لپاره چې خپلې نورې پروژې عملي کړي، غواړي نړۍ ته دا وښیي چې افغانستان د ترهګرۍ مرکز دیشاه محمود مياخېل
په همدې حال کې د نړیوالو چارو ځیني افغان کارپوهان او پخواني سیاستوال بیا وایي، پاکستان د خپلو ګټو لپاره افغانستان نړۍ ته د ترهګرۍ د مرکز په توګه د معرفي کولو لپاره وخت ناوخت دا ډول ادعاوې کوي.
د افغانستان د تېر جمهوري نظام د ملي دفاع وزارت سرپرست شاه محمود میاخېل ازادي راډیو ته وویل: "پاکستان د دې لپاره چې خپلې نورې پروژې عملي کړي، غواړي نړۍ ته دا وښیي چې افغانستان د ترهګرۍ مرکز دی، نه پاکستان، دا واقعیت دی چې د طالبانو ځینې ډلې او اشخاص له پاکستان سره نږدې اړیکې لري نو زه فکر نهکوم چې د دوی تر منځ (پاکستان او طالبانو حکومت) اختلاف دې کچې ته رسېدلی وي چې خپلو ستراتېژیکو ګټو باندې اختلاف وکړي، ځکه د طالبانو ډېری مذهبي مشران پاکستان ته ډېر تګراتګ لري."
پخوانی ډیپلومات او د نړیوالو چارو پوه غوث جانباز بیا ازادي راډیو ته پهدې اړه وویل: "د طالبانو حکومت که هغه د ډیورند کرښې دا خوا وي یا دا تحریک طالبان پاکستان چې د کرښې هاخوا وي دا ټول د یوې ایډیالوژۍ او یو فکر یوهدف لري، پاکستان که هر څومره سیستمونه رامنځته کړي فکر نهکوم که موثره واقع شي، پهداسې حال کې چې د پاکستان د افغانستان طالبانو سره راشهدرشه لري، پاکستان د همدې طالبانو مولد دی، څنګه کېدای شي چې طالبان د د افغانستان له خاورې د پاکستان پر ضد کارولو ته اجازه ورکړي، پاکستان یوازې د خپلو کورنیو ناورینونو او ستونزو او خپلو خلکو د اذهانو بدلولو لپاره اوس ټيټيپي او افغانستان په اړه دې ډول څرګندونو ته لمن وهي."
په دې اړه نور: د ټيټيپي او پاکستان د حکومت ترمنځ د مذاکراتو وړانديز؛ اسلاماباد دا وړانديز رد کړیدا پهداسې حال کې ده چې په وروستیو کې په پاکستاني د پاکستاني طالبانو او نورو وسلهوالو ډلو حملو زور اخیستی دی.
دوه ورځې وړاندې هم د پاکستان د بهرنیو چارو وزارت ویاند ممتاز زهرا بلوچ په افغانستان کې د طالبانو له حکومته د هغه ډلو پر خلاف چې په خبره یې په پاکستان کې ناامني جوړوي، د پرېکنده اقدام غوښتنه وکړه.
نوموړې په یو خبري کنفرانس کې ویلي وو چې، طالبان باید د پاکستان صبر ونه ازمويي.
خو د طالبانو حکومت دا ډول ادعاوې تل رد کړي دي.
د تېرې دوشنبې په ورځ طالبانو د حکومت د ویاند مرستیال حمدالله فطرت ویلي و، اسلاماباد باید د پاکستان د ستونزو حل په خپل هېواد کې دننه ولټوي.
د تحریک طالبان پاکستان (TTP) ویاند محمد خراساني هم ازادي راډیو سره خبرو کې دا ردوي چې دوی په افغانستان کې حضور لري.